Gálatas 3

Espíritu dayée ni ixin chunthia ni Jesucristo

1¡Unda atho cha thinxin ra jaꞌa ra, chujni Gálatas! ¿Kensen diantunga ra?, ixin dithikaonꞌa ra thi jian juajna, thi jaꞌan ná ukjuaguꞌa ra jian ixin Jesucristo beꞌen ngain ntha cruz. 2Ko jai dathena ni ra jiꞌi: ¿A bayéꞌe ra Espíritu Santo ixin bincheꞌe ra kain thi thetuꞌan ley o ixin anto chunthia ra thi jian juajna? 3¿Unda atho cha thinxin ra? Ixin are saꞌo jaꞌa ra anto chunthia ra ngain Ndo Dio ixin Espíritu Santo. ¿Unda jai xraxaon ra rukjan ra jian chujni ixin jeꞌo tuenao ra ixin jian tencheꞌe ra? 4¿Axruꞌin xree thi anto tangi bathuꞌe ra? ¡Nduaxin rukjengijna ra thi tangi bathueꞌe ra! 5Are Ndo Dio chjaa ra Espíritu Santo ko binchexrueꞌen ndo ni niꞌi ngayaꞌa ra, ¿a mee bincheꞌe ndo ixin ncheꞌe ra kain thi thetuꞌan ley o jeꞌo ixin chunthia ra thi jian juajnee ndo?

Thi kjuauthexin Ndo Dio ngain Abraham

6Ko jañaa kai Abraham bithikaon ngain Ndo Dio, mexinxin Ndo Dio bayée ndo Abraham inchin naa chujni jian. 7Mexinxin jaꞌa ra rugunda tsunuꞌa ra ixin kain ni chunthia ngain Ndo Dio, ni teꞌi ndua xeꞌen Abraham. 8Ko ngain Xruen Ndo Dio ujitaxin thi dindachro ndo are usee ixin chujni jeꞌa judío sitjañeꞌe na̱ jie̱ jeꞌo ixin ruchunthia na̱. Ko are mee ndache ndo Abraham thi jian juajna jiꞌi: “Chujni nguixin nunthe tsunchaon na̱ ixin jaꞌa.” 9Mexinxin Ndo Dio nchenchaon kain chujni chunthia ngain ndo, xrajeꞌo inchin binchenchaon Abraham are chunthia ngain ndo.

10Kain chujni chunthia ixin jeꞌo ley tsjengijna, chujni mee setsingataꞌa na̱ thi jianꞌa ixin ngain Xruen Ndo Dio ndachro: “Kainxin chujni ncheꞌa thi thetuꞌan kain thi jitaxin ngain ley bayée Moisés, chujni mee jitsingataꞌa thi jianꞌa.” 11Ko jañaa jian dikon ni ixin xruꞌin chujni sitjañeꞌe jie̱ ngathexin kon Ndo Dio ixin jincheꞌe na̱ thi thetuꞌan ley ixin ngain Xruen ndo ndachro: “Chujni ndachro Ndo Dio ixin jian na̱, chujni mee sechon na̱ kainxin nchaꞌon ixin chunthia na̱ ngain Ndo Dio.” 12Ko ley bayée Moisés ndachroꞌa ixin ruchunthia ni ngain Ndo Dio, jeꞌo ndachro ixin sithikaon ni thi ndachro ley ixin ley ndachro: “Thi ni sincheꞌe kain thi jitaxin ngain ley jiꞌi, ni mee sechon kainxin nchaꞌon.”

13Jesucristo kjuenga ꞌna ixin isetsingataꞌa ná thi jianꞌa dajon ley, ko jeꞌe betsingataꞌa thi jianꞌa ixin jaꞌan ná ixin ndachro ngain Xruen Ndo Dio: “Kain chujni terianda na̱ ngain naa nthaa detsingataꞌa thi jianꞌa.” 14Ko jañaa kuꞌen ixin Ndo Dio nchao sinchenchaon chujni jeꞌa judío ixin Jesucristo, inchin binchenchaon ndo Abraham. Ko ixin chunthia ná ngain Ndo Dio ko ixin jeꞌe ndo ndachro ndo, nchao sayée ná Espíritu Santo.

Ley bayée Moisés ko thi ndachro Ndo Dio sincheꞌe ndo

15Jaꞌa ra xro dithikaon ra Jesucristo, jaꞌan rundathjo ra naa thi tuꞌen ngain nunthe jiꞌi: Are naa xii kji̱n xa ngain naa xroon kexreen ruchjeeya kain thi chunda xa ko nchekinga xa ndajni ngain xron, ixruꞌin chujni nchao tsentuxiꞌin o tsentaxin ngain xroon mee. 16Ko Ndo Dio ndachro ixin runchenchaon ndo Abraham nganinxin thi rugachrjeninxin jeꞌe. Aro ngain Xruen Ndo Dio jitaxinꞌa ixin “kain ni rugachrjeninxin jeꞌe”, jeꞌo jitaxin “thi rugachrjeninxin jeꞌe” ko mee Jesucristo. 17Ko thi jaꞌan rindachrjan ruchro jiꞌi: Thi kjuauthexin Ndo Dio ngain Abraham, ley chroꞌa sasingixin ixin batho noo renkia ko kanthe nano kuthejan bigeꞌe ley, ko ley chroꞌa runcherentheꞌa thi undachro Ndo Dio ixin runchegayée Abraham. 18Ja̱ tsunchaon ni jeꞌo ixin sincheꞌe ni thi ndachro ley, mee ruchro ixin irentheꞌa thi kjuauthexin ndo ngain Abraham. Aro Ndo Dio binchegayee ndo Abraham thi ndachro ndo ixin jañaa binchekininxin ndo.

19Mexinxin, ¿keꞌe bincheꞌe ley remee? Tsjé nano batho, kuthimejan bigeꞌe ley ixin xraguxin thi jianꞌa ncheꞌe chujni. Aro ley jeꞌo kunchrjeꞌen juija thi bachrjeninxin Abraham inchin ndachro Ndo Dio. Jeꞌe ndo ruaꞌan ndo tsjé ángel ixin juiaꞌo ley Moisés ko Moisés kjuaago ley mee ngain chujni. 20Ko are Ndo Dio ndache Abraham ixin thi runchegayée ndo, juinchegundaꞌa ndo inaa chujni runichjaxin ndo, ixin jeꞌe ndo nichja ndo.

¿Unda beꞌe ley bayée Moisés?

21¿A ley bayée Moisés ncherentheꞌa thi ndachro Ndo Dio? Naꞌi, jeꞌa jamee ixin ja̱ ley nchao runchekjan ni inaa chujni narua ko xruꞌin nchaꞌon seꞌen ni, ja̱ jamee rukuꞌen, Ndo Dio nchao runchetjaaña jie̱ jeꞌo ixin sincheꞌe ni thi thetuꞌan ley. 22Aro ngain Xruen Ndo Dio ndachro ixin jaꞌon ná chroꞌa tsjeꞌe ná cha thi jianꞌa. Ko jeꞌo ixin ruchunthia ná ngain Jesucristo sayée ná thi ndachro Ndo Dio.

23Are xrabenuaꞌa ná ixin nchao ruchunthia ná ngain Jesucristo, ley kjui xraa nchianduꞌa xiiso thi biaxian ná, juija nchaꞌon are xraago ixin nchao ruchunthia ná ngain Jesucristo. 24Ko ley kjui inchin naa xi tjaago ko kjuagua ná juija Cristo. Ko jañaa Ndo Dio juinchetjaaña jie̱ ja̱ chunthia ná ngain Cristo. 25Aro jai ke uchunthia ná ngain Jesucristo, ley ithetuanꞌa ná ley.

26Ko kain ra uxeꞌen Ndo Dio ra ixin chunthia ra ngain Cristo Jesús. 27Ko kain ra xro bigithe ra, jai uncheꞌe ra inchin rinao Jesucristo. 28Ko jai ijeꞌa icha renthe chujni judío, o griego, o chujni dikuchji ngain naa xi najni o naꞌi, o nchrii o xii. Jai kainxin ná xrajeꞌo renthe ná ngathexin kon Jesucristo. 29Ko ja̱ uchujnii Jesucristo ra, jiꞌi ruchro ixin jaꞌa ra kai chujnii Abraham ko sayéꞌe ra kainxin thi ndachro Ndo Dio.

Currently Selected:

Gálatas 3: plsNT

Highlight

Copy

Compare