Gálatas 4

1Ko jiꞌi thi jaꞌan rinaꞌo rundachrjan: Are naa chjan bikininxin sayée xan kain thi jichunda ndudee xan, aro ixin xranchiin xan, jeꞌe xan jii xan ngain nchia xraa naa ni ncheꞌe xree ndudee xan, aro naa nchaꞌon jeꞌe xan tsetuꞌan xan kain. 2Ko jii chujni dakuꞌen xan ko chujni thjengijna xan ngain xra, ruxeraja nchaꞌon kuetuꞌan ndudee xan ixin sayée xan thi jikininxin xan. 3Ko xrajeꞌo kuꞌen ngajin ná kai ixin are bechunxinꞌa ná juajnee Ndo Dio, jaꞌan ná bunthe ná inchin xan nchinnchinchjan ixin banthoꞌo ná thi bakjaago chujni. 4Ko are ubinkee nchaꞌon ixin thi ndachro Ndo Dio, jeꞌe ruaꞌan Xeꞌen, ko nchrii binchekunkjiꞌi xan ko bithikaon xan ley inchin chujni judío. 5Ko juii xan ixin bikjengijna ná xan, jaꞌan ná xro baketunna ná ley, ko jañaa Ndo Dio bayeꞌna ná ndo ko binchekjan ná ndo xeꞌen ndo.

6Ko jaꞌa ra uxeꞌen Ndo Dio kai, ko uruaꞌan ndo ngain ansean ra Espíritu juixin ngain Jesucristo, ko Espíritu jiꞌi nthanichja ná: “¡Suixin Ndudana!” 7Ko jaꞌa ra ijeꞌa ni nchexra ra; jai jaꞌa ra uxeꞌen Ndo Dio, ko ja̱ uxeꞌen Ndo Dio ra, jikininxin sayéꞌe ra thi ndachro ndo ixin Cristo.

Pablo ta juachjaon ixin kain ni gálatas

8Are saꞌo jaꞌa ra xrabechunxinꞌa ra juajnee Ndo Dio; ko binthe ra inchin ni ncheꞌe xra ngain thi banchegiꞌin ra dio, aro jeꞌa dio. 9Aro jai ixin uchunxin ra Ndo Dio, o icha jian rundachrjan ixin Ndo Dio uchunxin ra jaꞌa ra, mexinxin, ¿unda jaꞌa ra xra rukjan ra ngain thi xruꞌin renthe ko thi nduaꞌa tjaago chujni? ¿A xra rinao ra rukjan ra ni nchexree thi nduaꞌa? 10Jaꞌa ra xradithikaunxin ra nchaꞌon kiai, kunithjao ko kain kiai deꞌe ngaa nano inchin ncheꞌe ni judío. 11Jaꞌan anto xraon na ixin thi xra juinthaꞌa ngajin ra sincherentheꞌa ra xra.

12Jaꞌa ra xan chian xan anto thjuaa, nthatsaꞌan ñao ra ncheꞌe ra inchin jaꞌan, ixin jaꞌan are icha saꞌo anto bachunthia ley ko jai kjan na inchin jaꞌa ra ixin chunthiaꞌa ra ley bayée Moisés. Jaꞌan rinichjaꞌa jiꞌi jeꞌa ixin chrujan jianꞌa banchena ni ra. 13Ko jaꞌa ra jian nuꞌa ra ixin are nakjuaguaxion ra thi jian juajnee Jesucristo, kjuaguꞌa ra ixin see bariꞌi ngajin ra ixin benina. 14Ko maski benina ko bathueꞌe ra tangi ixin jaꞌan, jaꞌa ra kjuanuaꞌa ni ra ko banchejeꞌa ni ra ixin chinꞌna. Ko jaꞌa ra bayeꞌna ni ra jian, inchin rugayeꞌe ra naa angeel Ndo Dio o inchin rugayeꞌe ra Jesucristo. 15¿Keꞌe kuꞌan ra?, ¿kja thi chujni anto bachee are mee? Are mee jaꞌan benuna, ja̱ nchao rugantsjengi ra makon ra ixin ruchjana ni ra, jaan, runcheꞌe ra. 16Ko jai ajeꞌo ixin ndathjo ra thi ndua, ¿aningakunna ni ra?

17Thi chujni tjaago xraa anto rinao tsjengijna ra, yaa jeꞌa ndua. Jeꞌo rinao na̱ santsjenda ra na̱, kuthimejan jauka ra rurueꞌe ra na̱. 18Jaan, nchao jii sinao ni icha chujni ja̱ ndua rinao na̱ tsjengijna ra na̱. Aro jaꞌa ra ja̱ ndua rinao ra tsjengijna ni ra, ncheꞌe ra mee kain nchaꞌon ko jeoꞌa are riꞌi ngajin ra. 19Jaꞌa ra inchin xan nchinnchinchjanꞌna, ko tangi tunna xraa naa janaꞌa are sinchekunkjiꞌi xeꞌen jan; ko xratangi tsunna sijija nchaꞌon are jaꞌa ra ruxraxaon ra inchin Cristo. 20Jaꞌan rujinaꞌo rugariꞌi ngajin ra jai ixin icha jian runichjaꞌa ra; ¡ixin taa juachjaon ixin thi jituꞌen ngajin ra!

Thi tjagua ná Agar ko Sara

21Ndachjejin ni ra jaꞌa ra xro rinao ra sithikaon ra ley bayée Moisés: ¿Unda thinxinꞌa ra jian thi jitaxin ley? 22Ixin nthi̱ꞌa̱ jitaxin ixin Abraham bechunda yoo xeꞌen xan xii. Naa xan ngain nchri nchexree, ko inaa xan ngain chriꞌi. 23Ko xeꞌen nchri ncheꞌe xra kunkjiꞌi xan ixin jeꞌe na̱ jañaa xraxaon na̱, aro chjan binchekunkjiꞌi chriꞌi guan xan ixin bikuꞌen thi kjuauthexin Ndo Dio ngain Abraham. 24Yaa kuꞌen ixin xraguaxin ná ixin yui nchrii jiꞌi tjagua ná yoo thi kjuauthexin Ndo Dio ngain chujni. Ko Agar nthaxraxaon ná thi ley bajon Ndo Dio ngain Moisés nthi̱ꞌa̱ ngain jna Sinaí, ko kain chujni chunthia ngain ley kjan na̱ inchin ni ncheꞌe xree ley mee. 25Mexinxin nchao nthugiꞌin ná Agar “jna Sinaí” jii ngain nunthe Arabia, ko kai nchao sinthugiꞌin ná jna Sinaí “rajna Jerusalén” ixin chujnii rajna dikjan na̱ inchin ni ncheꞌe xra xengeꞌa ꞌna ngain ley. 26Aro nchao nthugiꞌin ná Sara “Jerusalén jii ngajni” thi te ná kain ná ixin chunthia ná thi ndachro Ndo Dio. 27Ixin ngain Xruen ndo ndachro:

¡Chaꞌa jaꞌa ixin chroꞌa nchekunkjiꞌi chjan!

¡Suji tuyao ko chaꞌa ixin jaꞌa chunxinꞌa kexreen thiin nchri nchekunkjiꞌi chjan!

Ixin thi nchrii ndakuinthuꞌe xixiꞌi, nchrii mee ruchunda nchra icha tsjé chjan ke thi nchrii jikaꞌo xixiꞌi.

28Kain ná xro choo ná ixin dithikaon ná Jesucristo, jaꞌan ná inchin Isaac ixin jañaa ndachro Ndo Dio ixin rukuꞌen. 29Ko inchin kuꞌen are mee, xan bechundakaꞌo Abraham ngain Agar, banchegato tangi Isaac, xan kunkjiꞌi kunixin juachaxiin Espíritu Santo. Ko inchin kuꞌen xan, jañaa jituan ná jai. 30Aro, ¿keꞌe ndachro ngain Xruen Ndo Dio? “Dengi nchri ncheꞌe xra kunixin xeꞌen nchra ixin jikininxinꞌa xan sayée xan thi sayée xeꞌen nchri chriꞌa.” 31Jañaa, kain ná xro dithikaon ná Jesucristo, jaꞌan ná jeꞌa inchin xeꞌen thi nchri ncheꞌe xra; jaꞌan ná inchin xeꞌen thi nchri thetuꞌan ngain nchia.

Currently Selected:

Gálatas 4: plsNT

Highlight

Copy

Compare