Efesios 6

1Ko jaꞌa ra xro xan nchinnchinchjan, dithikaon ra ndudaa ra ko janaa ra, inchin jikininxin sincheꞌe chjan dithikaon Jesucristo. 2“Chundeꞌe ra juasaaya ndudaa ra ko janaa ra” ixin jiꞌi naa thi kuetuꞌan Ndo Dio, ko jiꞌi thi saꞌo dajin ixin jian tsjiꞌi ni, ja̱ sithikaon ni, 3ko jian sinthe ni ko tsjé nano seꞌe ni ngataꞌa nunthe jiꞌi.

4Ko jaꞌa ra, xro ndudaꞌa ra, ncheñaunkuaꞌa ra xaꞌan ra; icha jian nchekueꞌen ra xan sithikaon xan kain thi tsetuꞌen ra xan, ko nchekueꞌen ra xan kexreen sithikaon xan Nchaa ná Jesucristo.

5Ko jaꞌa ra xro kueꞌna ra naa xi najni, dithikaon ra thi tsetuꞌan ra ni najnia ra nthiꞌi ngataꞌa nunthe, dithikaon ra na̱ kunixin juasaaya, ko xraguꞌen ra na̱, ko ansean ra sachrjexin ixin sithikaon ra na̱. Jañaa inchin ja̱ rujincheꞌe ra xree Jesucristo.

6Dingaxin ñao ra ncheꞌe ra xree na̱ ko jeꞌa jeꞌo are tatetsjeꞌe na̱ ixin sithuaxin ra jian ngain xa, icha jian ncheꞌe ra xra inchin ni nchexree Jesucristo ixin ngain anseen ni dachrjexin ncheꞌe ni thi rinao Ndo Dio. 7Ko jian ncheꞌe ra xra, jañaa inchin runcheꞌe ra xree Nchaa ná ko jeꞌa inchin ncheꞌe ra ngain chujni. 8Ixin jaꞌa ra unuꞌa ra ixin Jesucristo ruchjaa ra thi jikininxin sacha ra ixin kain thi jian ncheꞌe ra, maski ncheꞌe ra xra ngain xi najni o xruꞌin xi najni chunda ra.

9Ko jaꞌa ra, xro najni ra, xrajeꞌo ncheꞌe ra ngain ni nchexraa ra, ko inchexraonꞌa ra na̱. Xraxaon ra jian ixin jaꞌa ra ko jeꞌe na̱ xrajeꞌo nakua Nchaa ra thjen ngajni chunda ra ixin jeꞌe tsjeꞌa kensen icha renthe ixin kain ná xrajeꞌo renthe ná.

Thi dajon Ndo Dio ixin sacha chujnii ndo ngain espíritu jianꞌa

10Ko xrarundathjo ra, jaꞌa ra xro choo ná, tusuji ra kunixin juachaxin dajon Nchaa ná ko ixin dithikaon ra ngain jeꞌe ndo. 11Ko nchegunda ra kain juachaxin chjaa ra Ndo Dio, inchin chia dengaa ni theto, ixin jañaa suji sinthe ra are nchiijin sinao sinthayaꞌa ra. 12Ixin jeꞌa chujni thetukoꞌo ná, thi tethetukoꞌo ná mee espíritu jianꞌa. Ko espíritu mee chrji ngatauꞌen chrintho, ko espíritu mee chunda juachaxin thetuꞌan nthiꞌi ngataꞌa nunthe. 13Mexinxin jaꞌa ra dayéꞌe ra kain juachaxin dajon Ndo Dio, ko mee inchin chia dengaa ni theto, jañaa kai nchao tsixiꞌan ra are tsii nchaꞌon tangi tsuꞌan ra, ko are utsixiꞌan ra kain, dinthe ra suji kainxin nchaꞌon. 14Ko dinthe ra suji, xraa xi soldado dinthedunga rua, jañaa tenchjiꞌan ra thi ndua chjaa ra Ndo Dio. Ko thi jian ncheꞌe ra tsjengijna ra, inchin thi chia dinthengaa xi soldado ixin diduꞌa xa chijno are theto xa. 15Tjaago ra thi jian juajna nchekunuꞌe chrjuin anseen ni ixin mee thi jian juajna, jañaa inchin xi soldado jichjanga xa theruee xa ixin tsji xa tseto xa. 16Ko thi icha rugunda, ixin jaꞌa ra chunthia ra ngain Ndo Dio, ko mee inchin naa chia jié kayakuenxin ra kain chijno jianꞌa jiyaa xruꞌi ruruaꞌan ra nchiijin, jañaa inchin chia kayakuenxin xi soldado chijno tja xi thetukaꞌo xa. 17Ko thi ukjan ni inaa chujni narua, mee inchin naa chia nchekjinga jaa ra, inchin xi soldado. Ko juajnee Ndo Dio nchegunda ra inchin chia taade, ixin yaa thi chjaa ra Espíritu Santo. 18Ko nchetseꞌen ra ñao Ndo Dio ixin nchao sincheꞌe ra kain thi jian; ko kainxin nchaꞌon danchieꞌe ra ndo kunixin juachaxiin Espíritu Santo. Ko kain nchaꞌon tsjeꞌe ra jian thi ncheꞌe ra ko tunchrjenꞌa ra ixin danchieꞌe ra ndo ixin kain chujni chunthia ngain ndo. 19Kai nchetseꞌen ra ñao Ndo Dio ixin rundachjejin na ndo thi jaꞌan runichja ko ruxraonꞌa na are rundathjan icha chujni juajnee ndo, thi juajna bechunxinꞌa na̱ are saꞌo. 20Ko Ndo Dio chjana xra ixin nichja juajna jiꞌi. Ko mexinxin jiaxinna jai ngain nduꞌa xiiso. Nchetseꞌen ra ñao Ndo Dio ixin tsjengijna na ixin ruxraonꞌa na rundathjan icha chujni thi jian juajnee ndo, inchin jikininxin.

Pablo juexin kji̱n xroon ko ruaꞌan juajna

21Tíquico xan choo ná, xan anto thjueꞌe ná ixin dithikaon xan Jesucristo, xan thjengijna ná kainxin nchaꞌon ngain xree Jesucristo. Jeꞌe xan tsekiꞌan ra xan kain thi jitunna ko kain thi rinthaꞌa. 22Mexinxin jaꞌan ruaꞌan Tíquico ngajin ra ixin rundathjo ra kexreen te ná jaꞌan ná nthiꞌi, ko jañaa jaꞌa ra ruchaꞌa ra.

23Ko Ndo Dio Ndudaa ná ko Nchaa ná Jesucristo ruchjee ni choo ná, ni dithikaon Jesucristo, thi chrjuin tsunuꞌe anseen na̱, ko thi ruthjueꞌe choo na̱ ko thi ruchunthia na̱. 24Ko Ndo Dio sinchenchaon kain chujni thjueꞌe Nchaa ná Jesucristo, thi ni xruꞌin nchaꞌon thinthuꞌe na̱ thi thjueꞌe na̱ Jesucristo. Jañaa tsuꞌen.

Currently Selected:

Efesios 6: plsNT

Highlight

Copy

Compare