Efesios 5

Thi jikininxin sincheꞌe chujnii Ndo Dio

1Jaꞌa ra uxeꞌen Ndo Dio, xan anto thjueꞌe ndo, mexinxin ncheꞌe ra inchin jeꞌe ndo ncheꞌe ndo. 2Thjueꞌe choo ra, jañaa inchin Jesucristo thjuaa ná, ko xrajon beꞌen ixin jaꞌan ná ixin bitjañaa ná thi jianꞌa banthoꞌo ná, jañaa inchin baguen na̱ kuleko ixin bagitjañenxin na̱, ko banchesayexin na̱ Ndo Dio inchin naa thi anto chrjuin xrajni.

3Ko ixin jaꞌa ra uchujnii Ndo Dio ra, ngayaꞌa ra ijikininxinꞌa tsiꞌin ni ixin dinthechrikoꞌo ra nchrii jeꞌa chriꞌa ra o xii jeꞌa xixiꞌa ra, o ixin tencheꞌe ra thi jianꞌa xraxaon ra o ixin anto thiakuꞌen ra sinthechunda ra tsjé tumi. 4Tengaꞌa ra reka, nichjakuaꞌa ra thi xruꞌin xree ko thekinꞌa ra chijni kunixin reka ixin chujnii Ndo Dio jikininxinꞌa runichja na̱ jañaa; icha jian thexruxiꞌin ra Ndo Dio. 5Ko tunuꞌa ra jian ixin chujni dejuakaꞌo nchrii jeꞌa chriꞌi o xii jeꞌa xixiꞌi, o anto jianꞌa ncheꞌe, o anto thiakuꞌen sechunda tsjé tumi, ko jiꞌi inchin ja̱ runchesayeꞌe diuchjan dikunchjianxin xroo o nthaa. Ko kain chujni ncheꞌe jiꞌi chroꞌa sixiꞌin na̱ thi thetuꞌan Cristo ko Ndo Dio. 6Dithuaxinꞌa ra ixin sinthayaꞌa ra chujni nichja thi xruꞌin xree ixin jiꞌi thixin thi anto suji jie̱ ncheꞌe Ndo Dio ngain thi chujni dithikaonꞌa ndo. 7Dixintheꞌa ra ko ncheꞌa ra inchin jeꞌe na̱.

8Are saꞌo jaꞌa ra binthe ra ngain thi naxin xeꞌe, aro jai ixin dithikaon ra ko te ra ngain Jesucristo, ute ra ngain thi dingasaan 9ixin Espiritue ndo thjengijna ni ncheꞌe ni thi jian inchin jikininxin ko thjengijna ni chujni ko nthanichja ná jeꞌo thi ndua. 10Ko ncheꞌe ra jeꞌo thi rinao Nchaa ná Jesucristo. 11Dixintheꞌa ra ko ncheꞌa ra thi jianꞌa ncheꞌe chujni chunxinꞌa Ndo Dio, icha jian ndache ra na̱ ko nchesatheꞌe ra na̱ ixin jeꞌa jian thi tencheꞌe na̱. 12Ko anto chjee ni juasuaxin are nichja ni ixin thi jeꞌe na̱ jimao ncheꞌe na̱. 13Ko are thi dingasaan tjaago ixin nchaoꞌa jii, jañaa tatununxin ixin nchaoꞌa beꞌe. 14Mexinxin ndachro ngain Xruen ndo:

Xingamaꞌa, jaꞌa ke tarichrin,

dingathjenxin ngayee ni ndadigeꞌen,

ko Jesucristo sinthangasaꞌan.

15Tsjeꞌe ra jian kexreen tencheꞌe ra. Ncheꞌa ra inchin chujni rinaoꞌa dithikaon, icha jian ncheꞌe ra inchin chujni chunxin thi jian. 16Ko are nchao sincheꞌe ra thi jian, ncheꞌe ra thi jian ixin ngain nchaꞌon teꞌi anto tsjé thi jianꞌa jituꞌen. 17Ko ncheꞌa ra xraa chujni xraxaonꞌa, icha jian thinxin ra keꞌe rinao Ndo Dio sincheꞌe ra. 18Kuanꞌa ra ixin thi kuan ni ndanchetjajin juaxraxauen ni. Icha jian tjaago ra ixin Espíritu Santo thjengijna ra. 19Nchesuji choo ra kunixin salmo, ko tsje ra himno ko coro, ko jañaa nchesayeꞌe ra Nchaa ná kunixin ansean ra. 20Ko thexruxiꞌin ra Ndo Dio Ndudaa ná ixin kain thi tuꞌen, kunixin juachaxiin Nchaa ná Jesucristo.

Thi rugunda sincheꞌe ni tekaꞌo choo

21Dithikaon choo ra, ixin Ndo Dio jikininxin juasaaya. 22Jaꞌa ra xro nchrii ra dithikaon ra thi tsetuꞌan ra xixiꞌa ra, jañaa inchin dithikaon ra ngain Jesucristo 23ixin thi xii jikininxin thetuꞌan ngain nchri chriꞌi, jañaa inchin Jesucristo thetuꞌan ngain ni niꞌngo, ixin kain ná, xro dithikaon ná, kjan ná inchin nthauꞌe jeꞌe, ko jeꞌe binthakjan ná inaa chujni narua. 24Ko jañaa inchin kain chujnii Jesucristo dithikaon na̱ thi thetuꞌan jeꞌe, jañaa kai, kain nchrii sithikaon nchra thi tsetuꞌan xixiꞌi nchra.

25Jaꞌa ra xro xii ra thjueꞌe ra chriꞌa ra, jañaa inchin Jesucristo thjueꞌe ko xrajon beꞌen ixin ni niꞌngo, 26ko jiꞌi bincheꞌe ixin kjan ná jian chujni ngathexin kon Ndo Dio. Ko jeꞌe bintharua ná ixin bigithe ná ngain jinda ko ixin kuinxin ná juajnee ndo. 27Ko jañaa bincheꞌe ixin jeꞌe sakeꞌe ná ngathexin kon jeꞌe inchin niꞌngo anto chrjuin ko xruꞌin thi jianꞌa jii ngain, xraa naa luntho narua ko dikuliguiꞌa luntho. Ko juxon ná, xro chujni jian ná, sunthe ná ngain jeꞌe. 28Ko jañaa ni xii rugunda ruthjueꞌe xa nchrichriꞌi xa, jañaa inchin thjueꞌe xa nthauꞌe xa. Ko thi xii thjueꞌe nchrichriꞌi, thjueꞌe xa nthauꞌe xa. 29Ixin xruꞌin chujni ningakuꞌen nthauꞌe; icha jian chjee nthao thi rugundeꞌe nthao ko dakuꞌen nthao, jañaa inchin Jesucristo ncheꞌe ngain ni niꞌngo, 30ixin jaꞌan ná kjan ná nthauꞌe Cristo, inchin naa ruthee o raa. 31Mexinxin ndachro ngain Xruen Ndo Dio: “Xii sachrjendeꞌe xa ndudee xa ko janee xa, ixin sekao xa chriꞌi xa, ko kayui na̱ rukjan na̱ inchin nakua chujni.” 32Ko jiꞌi naa thi benueꞌa chujni ko anto renthe, ko jaꞌan rinichja ixin Jesucristo ko ixin ningue. 33Aro kai ruchro ixin nanaa ra thjueꞌe ra nchrichriꞌa ra, inchin thjueꞌe ra nthauꞌa ra. Ko jaꞌa ra xro nchrii ra chundeꞌe ra juasaaya xixiꞌa ra.

Currently Selected:

Efesios 5: plsNT

Highlight

Copy

Compare