Efesios 2

Ndo Dio binthakjan ná inaa chujni narua ixin anto thjuaa ná ndo

1Are saꞌo jaꞌa ra binthe ra xraa chujni undadigeꞌen ixin thi jianꞌa bancheꞌe ra, 2ko jaꞌa ra bancheꞌe ra inchin ncheꞌe chujni dithikaonꞌa Jesucristo, ko bagithikaon ra kain thi baketuꞌan espíritu baketuꞌan icha espíritu jianꞌa ko jeꞌe thi nchencheꞌe chujni ixin dithikaonꞌa na̱ ngain Ndo Dio. 3Ko are icha saꞌo kai jaꞌan ná banthoꞌo ná xraa jeꞌe na̱, ixin banthoꞌo ná thi jianꞌa bakiakuꞌen ná ko thi jianꞌa baxraxaon ná. Mexinxin jaꞌan ná bekininxin ná rugayee ná jie̱ sincheꞌe Ndo Dio ngain icha chujni. 4Aro Ndo Dio anto kuiakunuaa ná ndo ixin anto thjuaa ná ndo, 5maski jaꞌan ná xraa chujni undadigeꞌen ixin thi jianꞌa banthoꞌo ná. Aro jeꞌe binthakjan ná inaa chujni narua, are binchexechon ndo Cristo, ko isayeꞌa ná jie̱ ixin thi anto thjuaa ná Ndo Dio. 6Ko jiꞌi ruchro ixin Ndo Dio binthaxechon ná ndo are binchexechon ndo Jesucristo, ko ukuiin ná ndo jaꞌan ná chrikee Jesucristo nthi̱ꞌa̱ ngajni. 7Ko jañaa bincheꞌe ndo ixin sikon kain chujni sigeꞌe ndue rejngi ixin anto thjuaa ná ndo ko anto tsjé thi jian ncheꞌe ndo ngajin ná ixin dithikaon ná Cristo Jesús. 8Ixin thi anto thjuaꞌa ra Ndo Dio, jaꞌa ra bitjañaꞌa ra jie̱, jeꞌo ixin chunthia ra ngain ndo ko jeꞌa ixin runcheꞌe ra tsjé thi jian. Jiꞌi kuꞌen ixin thi binthathuan ná Ndo Dio. 9Ko kuenꞌa jiꞌi ixin thi jian ncheꞌe chujni, mexinxin xruꞌin chujni tsaꞌin ñao. 10Ixin Ndo Dio binthachjian ná ko Jesucristo binthakjan ná inaa chujni narua ixin sinthoꞌo ná thi jian nthiꞌi ngain nunthe, inchin jeꞌe undachro ixin rukuꞌen are icha saꞌo.

Cristo thi nthakjan ná xraa nakua chujni

11Ko xraxaon ra jaꞌa ra ixin kexreen bancheꞌe ra; jeꞌa judío ra ixin jañaa guan ra ko nthagiꞌin ra na̱ chujni chundaꞌa xruꞌe, jañaa ndathjo ra chujni judío, ni nchegayee choo xruꞌe kunixin raa na̱. 12Ko xraxaon ra ixin jaꞌa ra bagithikaonꞌa ra Jesucristo, kjín binthexin ra ngain ni judío, ko bechunxinꞌa ra thi kjuauthexin Ndo Dio ngain Abraham ixin thi jian ndachro ndo rugajon ndo, ko bachunthiaꞌa ra Ndo Dio ko bechunxinꞌa ra ndo. 13Aro jai, ixin Cristo Jesús, jaꞌa ra xro kjín binthexin ra ngain Ndo Dio, ukunchieꞌen ra ngain ndo ixin Jesucristo beꞌen ngain ntha cruz ko bingo jnii. 14Ko Jesucristo, thi nchekunuꞌe chrjuin ngain ansean ná, bincheꞌe ixin ni judío ko ni jeꞌa judío binchekjan na̱ nakua rajna ixin Jesucristo kunxanthe thi baningakuꞌen choo na̱. 15Are Jesús beꞌen, jeꞌe kunxanthe thi kukueꞌen ni judío ko thi baketuꞌan ley bayée Moisés. Ko jañaa bincheꞌe ixin ni judío ko ni jeꞌa judío kjan na̱ nakua rajna ko kjan na̱ chujnii jeꞌe ko sakao choo na̱. 16Ko ixin Cristo beꞌen nganito ntha cruz, binchexanthe thi baningakuꞌen choo ni jeꞌa judío ko ni judío, ko ni teꞌi kjan ná inchin nakua chujni. Ko Ndo Dio binchetjaaña jie̱ ko jian sinthe na̱ ngathexin kon ndo.

17Ko Jesucristo juii ngataꞌa nunthe jiꞌi ixin kjuaago thi jian juajna nchekunuꞌe chrjuin ngain anseen ni, ko juajna jiꞌi uxraguꞌa ra, xro kjín binthexin ra ngain Ndo Dio, ko kai xrague ni chiaon binthexin ngain ndo. 18Ko ixin Jesucristo kainxin ná unchao tsunchieꞌen ná ngain Ndo Dio Ndudaa ná ixin chunda ná xrajeꞌo Espíritu Santo. 19Mexinxin jai jaꞌa ra ijeꞌa chujni chunxinꞌa ni ko kjín dithuꞌe rajnee. Jai jaꞌa ra uchujni rajnee ni udithikaon Ndo Dio ko ukjan ra ni nchianduꞌa ndo. 20Ko jaꞌa ra inchin naa nchia jié jingathjen suji ixin te ra ngataꞌa thi xro xenga saꞌo, xro binthekiin kain ni saꞌo kuinchieꞌe Jesús ko ni bagayée juajnee Ndo Dio, ko thi xro icha renthe ko keꞌe nchia, mee Jesucristo. 21Ko Jesucristo mee thi xro xenga saꞌo ko ngataꞌa xro jiꞌi jidithe thjarioꞌo ko jian jitunchjian naa niꞌngo, sikunja ni naa niꞌngo ncheꞌe jian ixin jii ngain Jesucristo. 22Ko jañaa jaꞌa ra, inchin niꞌngo jitunchjian ixin te ra ngain Jesucristo, ko kjan ra inchin nakua nchia thi nchao seꞌe Espiritue Ndo Dio.

Currently Selected:

Efesios 2: plsNT

Highlight

Copy

Compare