Efesios 1

Pablo chjee juajna chujni Éfeso

1Jaꞌan Pablo na, thi kuinchieꞌe Jesucristo ixin thjiꞌan juajnee. Ko mee kuꞌen ixin Ndo Dio bajon juachaxin. Ko ruaꞌan juajna ngajin ra, xro thinthueꞌa ra nthiee ko dithikaon ra Jesucristo, ko te ra ngain rajna Éfeso. 2Ko Ndo Dio Ndudaa ná, ko Nchaa ná Jesucristo sinthanchaon ra ko ruchjaa ra thi chrjuin tsunuꞌe ansean ra.

Pablo thexruxiꞌin Ndo Dio

3Nthusayeꞌe ná Ndo Dio, Ndudee Nchaa ná Jesucristo, thi binthanchaon ná kunixin kain thi jian thixin ngajni ko ngain Espíritu, ko jiꞌi tuꞌen ixin Cristo. 4Ko Ndo Dio ukuinchiaa ná ndo icha saꞌo ke are binchechjian ndo nunthe, ko jeꞌe ndo ukuinchiaa ná ndo jaꞌan ná ixin kjan ná chujnii ndo ko ixruꞌin jianꞌa sinthoꞌo ná ngathexin kon jeꞌe ndo. 5Ko ixin anto thjuaa ná ndo binthakininxin ná ndo kjan ná xeꞌen ndo ixin Jesucristo, ko jamee kuꞌen ixin jañaa binao ndo. 6Ixin kainxin nchaꞌon sinthusayeꞌe ná Ndo Dio ixin thi anto jian ndo ngajin ná, ko ixin Xeꞌen ndo bayáa ná ndo, thi xan anto thjueꞌe ndo. 7Ko jeꞌe xan kjuenga xan ꞌna ixin jaꞌan ná kunixin jnii xan ko bitjañaa ná kain thi jianꞌa binthoꞌo ná. Ko jiꞌi kuꞌen ixin anto thjuaa ná ndo. 8Ko Ndo Dio kjuagua ná ndo thi anto thjuaa ná ndo ixin jeꞌe ndo nthaxraxaon ná ndo jian ko nthakinxin ná ndo jian. 9Ko jeꞌe binthagatsuan ná thi benuaꞌa ná ko undachro thi rukuꞌen, ko ngain Jesucristo rukuꞌen thi ndachro. 10Ko are sinkee nchaꞌon ixin tsuꞌen kain thi undachro ndo ixin sajon ndo juachaxin ixin Jesucristo tsetuꞌen kain thi jii ngajni ko kain thi jii nthiꞌi ngataꞌa nunthe.

11Ko icha saꞌo ke Ndo Dio binchechjian nunthe, jeꞌe ndo ukuinchiaa ná ndo ixin sayée ná thi ukjuauthexin ndo. Ko Ndo Dio undachro ixin jañaa rukuꞌen, ko jeꞌe ndo, jaan, ncheꞌe ndo thi tjauthexin ndo. 12Ko jañaa jaꞌan ná, xro saꞌo bithikaon ná Jesucristo, sinthusayeꞌe ná Ndo Dio ixin kain juachaxin chunda. 13Ko ixin jeꞌe, jaꞌa ra kai bithikaon ra are kuiꞌin ra thi juajna ndua, ko juajna mee binthakjan ra inaa chujni narua ixin bithikaon ra Jesucristo, ko jaꞌa ra bayeꞌe ra Espíritu Santo ko mee inchin naa xruꞌe ixin kjan ra chujnii jeꞌe inchin undachro ixin rukuꞌen. 14Ko jaꞌa ra bayéꞌe ra Espíritu ko mee tjaago ixin sayéꞌe ra kain thi binthakininxin ra ndo, ruxethjaja ni chujnii ndo ixin thi ukjuenga ndo ꞌna, ko nthusayeꞌe ná ndo ixin kain juachaxin chunda ndo.

Pablo nichjee Ndo Dio ixin niꞌngo jii Éfeso

15Ko are jaꞌan kununa ixin jaꞌa ra jian chunthia ra ngain Nchaa ná Jesús ko ixin anto thjueꞌe ra kain ni uchujnii Ndo Dio, 16are mee ko jai kainxin nchaꞌon xraxaꞌon ra ko thexruxian Ndo Dio ixin anto chunthia ra ndo. 17Jaꞌan danchiaa Ndo Diue Nchaa ná Jesucristo, ndudaa ná, ndo jikininxin kain juasaaya, sinthakinxin ra ndo kunixin Espíritu Santo ko tsinxin ra jian thi jeꞌe ndo rundathjo ra ndo ko ruchunxin ra jian jeꞌe ndo. 18Ko kai danchiaa ndo ixin sinchengasaan juaxraxauan ra ixin ruchunxin ra thi techueꞌen ra ko tsunuꞌa ra jian unda bayáꞌa ra ndo. Ko kai ruchunxin ra kain thi anto renthe dajon Ndo Dio ngain chujnii ndo. 19Ko kai rinaꞌo ruchunxin ra ixin xruꞌin thi tuyaꞌi thi jié juachaxiin Ndo Dio, thi juachaxin thjengijna ná. Ko xrajeꞌo juachaxin jiꞌi binchegunda Ndo Dio 20are binchexechon Jesús ngayexin ni ndadigeꞌen ko bakeꞌe ndo ngain rajianxin ndo nthi̱ꞌa̱ ngajni. 21Ko Jesús bayée juachaxin mee ixin thetuꞌen kain thi thetuꞌan nthi̱ꞌa̱ ngajni ko nthiꞌi ngain nunthe ko jeoꞌa ngain nchaꞌon teꞌi thetuꞌan, kai tsetuꞌan are rukjan tsii inaa. 22Ko Ndo Dio chjee juachaxin Cristo tsetuꞌan kain, ko kai bakeꞌe ndo Cristo ixin tsetuꞌan ni niꞌngo, ni udithikaon. 23Ko kain ni udithikaon kjan na̱ inchin nthauꞌe Cristo. Ko Cristo thi thetuꞌan kain, mexinxin ningue jichunda kain.

Currently Selected:

Efesios 1: plsNT

Highlight

Copy

Compare