Efesios 3

Xra sincheꞌe Pablo ngain ni jeꞌa judío

1Jaꞌan Pablo na jiaxin na ixin tjaago juajnee Jesucristo, ko thi tjaago jiꞌi tsjengijna ra jaꞌa ra xro jeꞌa judío ra. 2Ko jaꞌa ra unuꞌa ra ixin Ndo Dio kuetunna ixin rundathjo ra, thi jeꞌe undachro runcheꞌe ngajin ra ixin anto thjuaꞌa ra. 3Ko jeꞌe ndo kjuaguꞌna ndo thi undachro ndo runcheꞌe ndo ko xruꞌin kensen benuꞌe, ko jiꞌi jaꞌan undathjo ra nchion ngain thi xroon ukji̱ꞌan ra. 4Ko are jaꞌa ra tsjao ra xroon mee, jaꞌa ra tsunuꞌa ra ixin jaꞌan chunxin thi benueꞌa chujni ko thi benueꞌa na̱ ukuꞌen ngain Jesucristo. 5Ko thi benueꞌa na̱ xruꞌin chujni xrague are icha saꞌo, aro jai Ndo Dio ukjuague kain ni kuinchieꞌe Jesús saꞌo ko ni dayée juajnee Ndo Dio ixin Espíritu Santo. 6Ko jiꞌi xruꞌin kensen benuꞌe: Chujni jeꞌa judío kai sayée na̱ thi bikininxin jeꞌo ni judío ko rukjan na̱ xraa nakua rajna, ko kain na̱ yaꞌi sayée na̱ thi ndachro Ndo Dio ixin rugajon ndo, jeꞌo ixin sithikaon ni juajnee Jesucristo. 7Ko Ndo Dio binchethunna ndo juachaxin ixin sinthaꞌa xree ndo, maski jaꞌan bikininxinꞌa na rugayaa juachaxin. Ko jañaa kjuaago ndo thi kuiakunuana ndo ko thi jié juachaxin chunda ndo.

8Maski jaꞌan tununa thi icha rentheꞌa na ngagee kain chujnii Ndo Dio, aro jeꞌe ndo chjana ndo juachaxin jiꞌi ixin tsjagua chujni jeꞌa judío thi jian juajnee Jesucristo, thi juajna icha renthe jii ko xruꞌin tuyaꞌi. 9Ko kai kuetunna Ndo Dio ixin jian rukjagua chujni thi undachro ndo runcheꞌe ndo thi benueꞌa chujni are usee ixin jañaa binao ndo, ndo binchechjian kainxin thi jii. 10Ko jiꞌi kuꞌen ixin jai kain chujni dithikaon Jesucristo tsjague na̱ kain ángel chunda juachaxin nthi̱ꞌa̱ ngajni ixin tsunuꞌe ángel thi jié juaxraxauen Ndo Dio ixin jeꞌe ndo nuꞌe ndo kain. 11Ko Ndo Dio bincheꞌe kain jiꞌi inchin jeꞌe xraxaon runcheꞌe are nakuexinxon beꞌe kain ixin Nchaa ná Jesucristo. 12Ko ixin Jesucristo ko ixin uchunthia ná ngain jeꞌe, jaꞌan ná uchunda ná juachaxin tsunchieꞌen ná ngain Ndo Dio. 13Mexinxin jaꞌan nthatsaꞌan ñao ra dinthechinꞌa ra ixin jaꞌan jiaxinna. Jiꞌi jitunna ixin ndathjo ra thi jian juajnee Jesucristo, ko icha jian taꞌin ñao ra ixin jiꞌi.

Thi thjuaa ná Cristo

14Ko ixin kain thi jituꞌen jiꞌi, jaꞌan darithuxin ngathexin kon Ndo Dio, Ndudee Nchaa ná Jesucristo. 15Ko Ndo Dio thi Ndudaꞌa ixin kain chujni te nthiꞌi ngataꞌa nunthe ko kain thi jii nthi̱ꞌa̱ ngajni. 16Jaꞌan nthatsaan ñao Ndo Dio ixin thi renthe ko jié juachaxin chunda ndo, ruchjaa ra ndo juachaxin ko sinthasuji ra kunixin Espiritue ndo, 17ko ixin chunthia ra ngain Jesucristo, jeꞌe seꞌe ngain ansean ra, inchin nueꞌe naa nthaa niꞌnga jixenga ntha, jañaa tsusuji ra ko thjueꞌe choo ra. 18Ko jañaa jaꞌa ra ko icha chujni dithikaon jeꞌe, nchao tsinxin ra jian kexreen tunxin, jininxin, ningaxin ko nuinxin thi anto thjuaa ná Jesucristo. 19Ko kai ruchunxin ra kexreen jeꞌe anto thjuaa ná, maski xruꞌin chujni thinxin kexreen jiexin thi anto thjuaa ná Ndo Dio, ko ruchunda ná kain thi dajon ndo.

20Ko jeꞌe ndo thi chunda ndo juachaxin ixin sincheꞌe ndo icha tsjé ke thi jaꞌan ná danchieꞌe ná ndo, o icha ke thi jaꞌan ná xraxaon ná ixin juachaxiin Ndo Dio jii ngajin ná thjengijna ná, 21ko nthusayeꞌe ná Ndo Dio kain ná xro dithikaon ná Jesucristo, kainxin nchaꞌon. Jañaa tsuꞌen.

Currently Selected:

Efesios 3: plsNT

Highlight

Copy

Compare