2 Corintios 9

Tumi xra tse ixin tsjengijnanxin ni chujni dithikaon Jesucristo

1Irugundaꞌa rukji̱ꞌan ra ixin thi tumi tsjengijnanxin ra chujni dithikaon Jesucristo. 2Jaꞌan nuna ixin ndua rinao ra tsjengijna ra chujni teꞌi. Jaꞌan anto chaꞌna are thekian ni Macedonia ixin xro te ra ngain nunthe Acaya, jaayo bithja nano anto binao ra rukjengijna ra na̱. Ko are ni Macedonia kuiꞌin na̱ jiꞌi, ukain na̱ binao runcheꞌe na̱ thi jaꞌa ra tencheꞌe ra. 3Aro jaꞌan ruaꞌan Tito ko kayui xan choo ná ixin tsjengijna ra xan, ixin satse ra tumi. Ko jañaa sikon ni ixin ndua thi ndachrjan ixin jaꞌa ra. 4Ixin jeꞌa jian ja̱ chrujan ni Macedonia sasukian ko sikon na̱ ixin jaꞌa ra xra xruꞌin tumi digatse ra. Ko jiꞌi naa juasuaxin ixin jaꞌan ná anto chunthia ná ngajin ra. Ko ja̱ jañaa tsuꞌen, jaꞌa ra icha tsusuaꞌa ra. 5Mexinxin jaꞌan ndachrjan ixin icha jian saꞌo ruruaꞌan xan choo ná teꞌi, ixin tsjengijna ra xan tsjejo ra tumi, thi ndachro ra rugajon ra. Ko jañaa jaꞌa ra tsjaago ra ixin anto chaꞌa ra dajon ra tumi, ko jeꞌa jinthaniꞌa ra sajon ra tumi.

6Xraxaon ra jiꞌi: thi tsjéꞌa thenga, kai tsjéꞌa datsiin, ko thi thenga tsjé, kai tsjé datsiin. 7Nanaa ra dajon ra inchin uxraxaon ra ngathe ansean ra, ko ncheꞌa ra inchin chujni dechiin are dajon o dajon ra ixin danchiaꞌa ra na̱. Ixin Ndo Dio thjueꞌe Ndo chujni chee are dajon. 8Ndo Dio nchao ruchjaa ra ko sinthathuꞌan ra kain thi jian ko xruꞌin sitjanꞌa ra, ko ruchaꞌa ra ixin sincheꞌe ra thi jian. 9Inchin chro ngain Xruen Ndo:

Ndo Dio anto tsjé bajon ndo ngain chujni nua,

ko thi jian bincheꞌe ndo, kainxin nchaꞌon seꞌe.

10Jeꞌe ndo dajon ndo tsee dinga, ko kai chjaa ná ndo thi junthe ná. Ko sinchetsjé ndo tsee tsenga ra, ko jañaa nchao tsjengijna ra icha chujni. 11Ko jaꞌa ra tsjé ruchunda ra, ko jañaa nchao tsjé sajon ra kai. Thi tumi batse ra ko chjana ni ra ixin tsjiꞌan ná ngain ni choo ná, ko ixin tumi jiꞌi jeꞌe na̱ anto tsexruxinxin na̱ Ndo Dio. 12Ixin thi dajon ra ngain ni choo ná teꞌi, jeoꞌa thjengijna ra na̱ ixin thi rugundeꞌe na̱, kai jiꞌi thjengijna na̱ ixin nchesayeꞌe na̱ Ndo Dio. 13Thi tethjengijna ra na̱ jiꞌi tjaguxin ra ixin ndua chunthia ra ko dithikaon ra thi jian juajnee Jesucristo. Mexinxin jeꞌe na̱ tsexruxiꞌin na̱ ko sinchesayeꞌe na̱ Ndo Dio, ixin nuꞌa ra dajon ra ngain na̱ ko ngain kain ni rugundeꞌe. 14Ko jeꞌe na̱ sanchieꞌe na̱ Ndo Dio ixin jaꞌa ra, ixin anto thjuaꞌa ra na̱ ixin Ndo Dio anto jian bincheꞌe ndo ngajin ra ko binthanchaon ra ndo. 15¡Thexruxian Ndo Dio ixin thi chjaa ná ndo, ko chroꞌa rundachro ná kexreen tsjengexin ná ndo ꞌna!

Currently Selected:

2 Corintios 9: plsNT

Highlight

Copy

Compare