2 Corintios 10

Pablo nichja jian ixin xree

1Jaꞌan Pablo na, ko rinthatsaꞌan ñao ra chrjuin inchin Jesucristo jian ngajin ná. Ixin ndachro ra ixin are riꞌi ngayaꞌa ra jaꞌan xraon na, ko are kjín riꞌi xraa anto chrintho na. 2Mexinxin nthatsaꞌan ñao ra ixin are sasutsjaꞌa ra rinaoꞌa tsuchrintho na ixin sinthaꞌa thi uxraxaꞌon ngain chujni nichja ixin jaꞌan ná nthaꞌa ná inchin rinao nthauꞌna ná. 3Maski te ná nthiꞌi ngataꞌa nunthe aro nthoꞌa ná thi jianꞌa inchin ncheꞌe chujni jii nthiꞌi ngataꞌa nunthe. 4Thi chjaa ná Ndo Dio tsetuxin ná nthiꞌi jeꞌa xraa thi tjayaxin chujni nthiꞌi ngataꞌa nunthe. Thi bayée ná jichunda icha jié juachaxiin Ndo Dio, ko jiꞌi thi tunxanthe kain juachaxiin espíritu jianꞌa jii nthiꞌi ngataꞌa nunthe. 5Ko jaꞌin tunxanthe ná kain thi jianꞌa nichja chujni ixin thi jian juajnee Ndo Dio ko ixin juachaxiin ndo daxingixin na̱ thi jianꞌa xraxaon na̱ ko duthikaon na̱ Jesucristo. 6Ko jaꞌan ná xraxaꞌon ná sinthaꞌa ná jie̱ ngain kexeꞌo chujni ncheꞌa inchin thetuꞌen Jesucristo, ko jiꞌi tsuꞌen are kain ra jian sincheꞌe ra inchin jeꞌe rinao.

7Jaꞌa ra jeꞌo tsjeꞌe ra thi ncheꞌe chujni, ko tsjeꞌa ra thi jii ngain anseen na̱. Ja̱ chrujan ra ndua dithikaon ra Jesucristo, kai tunuꞌa ra ixin jaꞌan ná kai dithikaꞌon ná Jesucristo. 8Maski icha tsaꞌin ñaꞌo ixin juachaxin chunda ná Jesucristo chjaa ná, ixin jañaa sinthasuji ra ixin sithikaon ra ngain Jesucristo ko jeꞌa ixin sinthatjajin ra. 9Jaꞌan rinaoꞌa ixin jaꞌa ra ruxraxaon ra ixin jaꞌan jeꞌo rinaꞌo sinthaxraon ra ixin thi kji̱ꞌan ra ngain xroon ruaꞌan ra. 10Thuꞌa ra ndachro ra ixin jaꞌan anto suji nichja ngain thi xroon kji̱ꞌan ra ko kai ndachro ra ixin are riꞌi ngajin ra nthaxraonꞌa ra ixin sujiꞌa nichja, mexinxin ncherentheꞌa ni ra. 11Aro thi chujni ndachro kain jiꞌi rugunda tsunuꞌe na̱ ixin jañaa inchin nichja ná ngain xroon kji̱n ná, jañaa kai runichja ná are sasutsjaꞌa ra.

12Jaꞌan ná rinaoꞌa ná tsuyaꞌi ná inchin chujni teꞌi ixin jeꞌe na̱ jeꞌo na̱ turenthe na̱. Aro chujni tuyaꞌi ngain inaa chujni, chujni teꞌi xraxaonꞌa jaa. 13Jaꞌan ná chroꞌa tsaꞌin ñaꞌo ná, jeꞌo taꞌin ñaꞌo ná ngain thi ruaꞌan ná Ndo Dio ixin binthaꞌa ná xra, ko jeꞌe chjana ná juachaxin kjuaguꞌa ra nthiꞌi Corinto. 14Ko jaꞌan tsainꞌa ñaꞌo icha, aro jaꞌan thi saꞌo baso ngajin ra ko kjuaguꞌa ra thi jian juajnee Jesucristo. 15Chroꞌa tsaꞌin ñaꞌo ná ixin xra bincheꞌe inaa chujni. Aro chuan ná ixin jaꞌa ra icha ruchunthia ra ngain Jesucristo, ko jañaa icha tsjaago ná thi jian juajnee jeꞌe. 16Ko jañaa nchao tsjiꞌo ná juajnee Jesucristo ngain rajna te icha kjín. Ko tsainꞌa ñaꞌo ná ixin xra jincheꞌe inaa chujni.

17Ko ja̱ chrujan chujni rinao tsaꞌin ñao, ncho taꞌin ñao ixin dithikaon Nchaa ná. 18Jeꞌa jian tsusayeꞌe chujni turenthe jeꞌo, icha jian tsusayeꞌe chujni nichja jian ixin Ndo Dio.

Currently Selected:

2 Corintios 10: plsNT

Highlight

Copy

Compare