Imbombo 21

U Pabuli akubuka ku Yelusalemu

1Bo twalaghana nabo tukanyamuka nu bwato, tukagholoka mupaka piloboko ilya Kosi. Indabi yache tukafika mu Lodi. Ukufuma kulakula tukendelela pakubuka mu Patala. 2Kulakula tukabwagha ubwato ubukulu nkani bubo bukabukagha ku Fonike, po tukakwela nukubuka. 3Tukafika pabuzilo bumo bubo tukennyanga akasungo aka Sayipulasi, po tukenda kuntende kwache ukwa kasungo kala nukufika mupaka mu Siliya. Tukenda pisila pakubuka ku Tile, kuko ubwato ubukulu nkani bukabukagha pakwisya ukatundu. 4Kulakula tukabagha abamanyili bamo nukwikala nabo usabata weka. Pakulongoziwa nu Muzimu Umuzelu bakamubuzya u Pabuli ukuti atakabukemo mu Yelusalemu. 5Loli bo akabalilo akakwikalila nabo kamala, tukanyamuka nukwendelela nu bulendo bwitu. Abamanyili bosi poka na bachi na bana babo bakatusindikila mupaka kuzi ukwa kaya kalakala. Kulakula pa bwima tukafughama nukwiputa. 6Po tukalaghana nukukwela mubwato ubukulu nkani, bo abene bakunyokela mutwaya twabo.

7Tukendelela nu bulendo bwitu ukufuma mu Tile nukufika mu Putolema. Kulakula tukabalamuka abitiki nukwikala nabo isiku lyoka. 8#Imbo. 6.5, 8.5Indabi yache, tukanyamuka nukufika mu Kesaliya. Mulamula tukikala munyumba iya mulumbilili yuyo akaba we Filipu, weka uwa bantu seveni bala. 9Akaba na balindu folo abasita kusendwa, babo bakanenagha amazyu agha Chala. 10#Imbo. 11.28Bo tuli kulakula amasiku aminji, umulaghuzi yumo yuyo akaba we Agabasi akafika ukufuma muchigaba icha Yudeya. 11Akiza kukwitu nukusenda ulamba uwa Pabuli, akipinya ivinama ni nyobe zyache nukuti, “U Muzimu Umuzelu akuti, ‘Umwenecho uwa lamba yunuyu akwiza pakupinyiwa bunubu naba Yuda aba mu Yelusalemu, po bakwiza pakumubika munyobe izya bantu babo bate ba Yuda.’ ”

12Bo aswe na bantu babo bakaba palapala twivwa zinizi, tukamulaba u Pabuli ukuti atakabuke ku Yelusalemu. 13Loli u Pabuli akamula akati, “Nkimba choni chicho mukulila nukumpa ichitima? Intiyanizye kwene pakupinyiwa, loli na pakufwa bulo mu Yelusalemu pachifukwa icha Mwene u Yesu.”

14Bo twapotwa nawe, tukamuleka bulo nukuti, “Ubwighane ubwa Mwene bubombiwanje.”

15Bo amasiku ghitu aghakwikalila mulamula ghamala, tukiyannya nukubuka ku Yelusalemu. 16Bope abamanyili bamo babo bakafuma mu Kesaliya bakabuka naswe nukutubika munyumba iya muntu yuyo akaba we Munasoni, kuko bakabatika ukuti twikalayeko.#21.16 nukutubika…twikalayeko: Pamo nukwiza nu muntu, yuyo tukalonda ukwikalamo munyumba yache. Umwene akaba uwamu Sayipulasi, sona akaba weka uwa bamanyili abakwanda.

U Pabuli akumwendela u Yakobo

17Bo twafika mu Yelusalemu, abitiki bakatupokela nu moyo ghosi. 18Indabi yache u Pabuli akabuka naswe pakumwennya u Yakobo, po abasongo bosi aba chipanga bakabako. 19U Pabuli akabalamuka nukubabuzya zyosi zizyo u Chala akabomba mubantu babo bate ba Yuda ukwendela mu butumiwa bwache. 20Bo bivwa zinizi, bakamupala u Chala. Po bakanena kwa Pabuli bakati, “Mukamu Pabuli, ukwennya amasabuzani na masabuzani agha ba Yuda, babo baba bitiki, sona namumo biyipiye pakukonka Indaghilo izya Mozesi. 21Babuziwe ukuti wamanyisyanga aba Yuda bosi babo bakikalagha muvyisu ivya bantu babo bate ba Yuda ukukana Indaghilo izya Mozesi, ukubabuzya ukuti batakasilimulaye abana babo pamo bakonkaye inyiho izya Chiyuda. 22Po nkimba tubombe choni? Naloli bakwiza pakwivwa ukuti wafika. 23#Ukb. 6.13-21Bomba chicho tukukubuzya. Pali abanavuli folo pano babo balapite pamaso pa Chala. 24Bukagha poka nabo nukubomba inyiho izyakwiswefya nukubalipilila ukuti babamwanje isisi kumitu yabo.#21.24 kumitu yabo: Ennya mwa Imbo. 18.18. Po abantu bosi bakwiza pakumanya ukuti zyosi zizyo wanena zyabumyasi, sona ukuti naloli awe ukukonka Indaghilo izya Mozesi. 25#Imbo. 15.29Loli abantu babo bate ba Yuda, babo baba bitiki twabasimbila ukalata pakubabuzya ukuti batakalyanje ichakulya chicho chibikiwe ku vifwani ukuti chibanje chakwiyipa, batakalyanje ibanda, batakalyanje ichinyamana chicho chanyongiwa bulo, sona batakalowe.”

26Indabi yache u Pabuli akabasenda abanavuli folo bala nukubomba nabo inyiho izyakwiswefya. Po akinjila mu Nyumba iya Chala nukubabuzya abantu amasiku aghakwiswefezya, sona ni vyakwiyipa vivyo umuntu wesi abaghiye pakubika.

U Pabuli alemiwa mu Nyumba iya Chala

27Bo amasiku seveni ghali papipi pakumala, aba Yuda bamo aba muchigaba icha Asiya bakamwennya u Pabuli mu Nyumba iya Chala. Bakasonjelezya ichilundilo chosi, po bakamulema u Pabuli. 28Bakakolomoka nkani bakati, “Mwe ba Izilayeli! Zagha mutwavwe! Uyu we muntu yuyo akubamanyisya abantu bosi kosi na kosi pakulusamula uluko lwitu, Indaghilo izya Mozesi ni Nyumba iya Chala iyi. Ukonjelezya pazinizi abinjizya sona abantu babo bate ba Yuda mu Nyumba iya Chala nukunyazya Ubuzilo Ubuzelu ubu!” 29#Imbo. 20.4(Bakanena zinizi pachifukwa ichakuti bakaba bakuti bamwennya u Tulofimo uwamu Efeso poka nu Pabuli mukaya mulamula, sona bakinong'ona ukuti akaba we Pabuli yuyo akamwinjizya mu Nyumba iya Chala.)

30Akaya kosi kala kakizula ni vyongo, sona abantu bosi bakachimbilila poka, pakumulema u Pabuli nukumuwesela kuzi ukwa Nyumba iya Chala. Panapo na panapo imilyango iya Nyumba iya Chala yikighaliliwa. 31Bo abantu bakuyezya pakumughogha u Pabuli, amazyu ghakatumiwa kwa songo uwa basilikali aba Chiloma ukuti akaya kosi aka Yelusalemu kizuye ni vyongo. 32Panapo na panapo usongo uwa basilikali yula akasenda abasongo bamo na basilikali nukuchimbilila ku chilundilo kula. Bo abantu bamwennya usongo uwa basilikali na basilikali bala, bakaleka pakumukoma u Pabuli. 33Usongo uwa basilikali yula akafika palapala nukumulema u Pabuli, akalamula ukuti apinyiwe ni mpingu zibili nukulalusya ukuti, “Nkimba wewenu umuntu yunuyu, sona abomba cho choni?” 34Bamo muchilundilo mulamula bakakolomoka nkani ichintu choka, abanji bope ichinji, umwakuti usongo uwa basilikali akapotwa pakuchagha ichenecho chicho chikabombiwa pachifukwa icha vyongo, po akalamula ukuti bamusende u Pabuli nukumubika mwilinga. 35Bo bafika pamakwelelo agha lupaso lula, abasilikali bakamunyamulila mumwanya pakuti ichilundilo chikakalala nkani. 36Abantu bosi babo bakamukonkagha mwisinda bakakolomoka nkani bakati, “Mughoghe bulo!”

U Pabuli akwiyimila mwene

37Bo abasilikali bali papipi pakumwinjizya u Pabuli mwilinga, akamulaba usongo uwa basilikali akati, “Nkimba utanganyitikizya ukuti inenepo zimo?”

Usongo uwa basilikali yula akamulalusya akati, “Nkimba uchimenye Ichigiliki? 38Nkimba ute we muntu uwa muchisu icha mu Ijiputi yuyo akandizya ivyongo nukughalongolela amavyondongo 4,000 munkolongo?”

39U Pabuli akamula akati, “Ane ne mu Yuda, nkapapiwa mukaya akamanyikwe aka Talisa muchisu icha Kilikiya. Nalamba, unyitikizye ukuti inene na bantu aba.”

40Usongo uwa basilikali yula akamwitikizya, po u Pabuli akimilila pamakwelelo agha lupaso nukupumizya ichongo ni nyobe zyache. Bo baba myee, u Pabuli akanena nabo mu Chihebeli akati:

Currently Selected:

Imbombo 21: LMBNT2016

Highlight

Copy