Imbombo 22

1“Mwee bakamu na batata bane, ivwa kuno, bo nkunena amazyu ghane aghakwipokela nemwene!” 2Bo bamwivwa akunena na mu Chihebeli, bakaba myee.

Po u Pabuli akati, 3#Imbo. 5.34-39“Ane ne mu Yuda, nkapapiwa mukaya aka Talisa muchisu icha Kilikiya, loli nkakulila mu Yelusalemu ngati ne mumanyili uwa Gamaliyeli. Nkamanyisiwa akiza nkani Indaghilo izya banyenya bitu, sona nkiyula nkani pambombo iya Chala ukuyana namumo mwebosi muli pano ilelo mubeleye. 4#Imbo. 8.3, 26.9-11Nkabavwima nukubaghogha abantu babo bakakonkagha Izila iya Mwene. Nkabalema abanavuli na bakolo nukubighalila mujele. 5Umuputi usongo na kabukatila kosi aka balongi aba Chiyuda bangasimikila ukuti nkunena ubwanaloli. Nkapokela abakalata abakufuma kukwabo nukubuka nabo kuba Yuda mu Damasika. Po nkabuka kulakula pakubalema abantu banaba nukwiza nabo bapinyiwe ni mpingu mu Yelusalemu ukuti bafundiwanje.

U Pabuli akulingannya nizya kupinduka kwache

(Imbo. 9.1-19, 26.12-18)

6“Bo napalamila kukaya akakulu nkani aka Damasika pamusanya, umwakuchenusya bulo ulukozyo ulwakulama nkani ulwakufuma kumwanya lukandamila. 7Nkawa pasi nukwivwa izyu likunena nane likuti, ‘Wee Sabuli, wee Sabuli! Choni chicho ukunvwima?’ 8Nkalalusya nkati, ‘Nkimba wewenu awe, Mwene?’ Akambuzya akati, ‘Nene Yesu uwamu Nazaleti, yuyo ukumuvwima.’ 9Abantu babo nkendagha nabo bakennya ulukozyo lula, loli batakivwa izyu ilya yuyo akanenagha kukwane. 10Nkalalusya nkati, ‘Mwene, nkimba imbombe choni?’ Po u Mwene akambuzya akati, ‘Nyamuka bukagha mu Damasika. Mulamula ukwiza pakubuziwa zyosi zizyo u Chala akubatikiye ukuti ubombe.’ 11Nkafwa maso pachifukwa icha lukozyo ulwakulama nkani lula, po abantu babo bakaba nane bandema inyobe nukwinjila nane mu Damasika.

12“Mukaya akakulu nkani mula mukabamo umuntu yumo yuyo akaba we Ananiya, umuntu uwakumwiputa u Chala, yuyo akakonka Indaghilo zyitu, sona akachindikiwa nkani naba Yuda bosi babo bakikalagha mulamula. 13Akiza nukwimilila papipi nane nukumubuzya ukuti, ‘Wee mukamu Sabuli, anda pakwennya sona.’ Pakabalilo kalakala nkennya sona nukumwenelezya yuyo. 14Akati, ‘U Chala uwa banyenya bitu akusalite awe ukuti umanye ubwighane bwache, sona ukuti wennye Umubombi wache Umugholosu nukumwivwa yuyo akunena amazyu ghache kukwako. 15Pakuti ukwiza pakuba we kaboni wache pakubabuzya abantu bosi zizyo wazyennya nukwivwa. 16Po ilelo nkimba ukulindilila ichoni? Nyamuka nukoziwa ukuti imbibi zyako zisukiwe pakumwiputa.’ ”

U Pabuli itiziwa pakulumbilila pakasi pabantu babo bate ba Yuda

17“Nkanyokela mu Yelusalemu, loli bo indi pakwiputa mu Nyumba iya Chala, nkennya ichisetuka. 18Nkennya u Mwene akumbuzya akuti, ‘Lubilolubilo epamo mu Yelusalemu muno pakuti abantu kuno batakwiza pakwitikizya ubwakaboni bwako bubo bukunena nizya ane.’ 19Nkamula nkati, ‘Mwene, naloli bazimenye ukuti nkabukagha kunyumba izyakwiputilamo pakubighalila mujele nukubakoma babo bakasubilagha mumwako. 20#Imbo. 7.58Sona bo ukaboni wako u Sitefani akughoghiwa, ane nkaba palapala ukusimikila pakughoghiwa kwache, sona nene nkaba musungi uwa nkazo izya babo bakamughogha.’ 21Po u Mwene akati, ‘Bukagha pakuti nkwiza pakukutuma kubutali nkani na bantu babo bate ba Yuda.’ ”

22Abantu bakateghelezya kwa Pabuli mupaka bo anena amazyu ghanagha. Loli bakanda pakukolomoka ukuti, “Umuntu yunuyu mumuzimizye bulo! Atabaghiye pakuba nubumi!” 23Bakakolomokagha nkani nukusumbila amenda ghabo mumwanya, sona bakachupusya ulufumbi mumwanya pakulanjizya ubukali. 24Usongo uwa basilikali yula akalamula ukuti babukaye nu Pabuli mwilinga mula, sona akababuzya ukuti bamusyempe ukuti umwene achimanye ichifukwa chicho abantu bakamobezezyanga bunubu. 25Loli bo bamupinya ukuti bamusyempe, u Pabuli akamulalusya usongo uwa basilikali yuyo akimilila palapala akati, “Nkimba indaghilo zyinyu zikwitikizya pakumusyempa umwenekaya uwa Chiloma, bo mutalongite inongwa yache?”

26Bo usongo uwa basilikali yula ivwa zinizi, akabuka kwa songo nkani uwa basilikali nukumulalusya ukuti, “Nkimba ukubomba choni? Umuntu uyu mwenekaya uwa Chiloma.”

27Po usongo yula akabuka kwa Pabuli nukumulalusya ukuti, “Mbuzya, nkimba awe we mwenekaya uwa Chiloma?”

U Pabuli akamula akati, “Eee!” 28Usongo yula akati, “Nkaghula ubwenekaya bwane ni ndalama inyinji nkani.” U Pabuli akamula akati, “Loli ubwenekaya bwane bwakupapiwa nabo.” 29Panapo na panapo abantu babo bakalondagha pakumulalusya u Pabuli, bakaleka. Po usongo yula zikamoghofya, bo azyaghannya ukuti u Pabuli akaba mwenekaya uwa Chiloma, sona nukuti bakamupinya ni mpingu.

U Pabuli pamaso pa balongi aba Chiyuda

30Usongo yula akalondagha ukuti achimanye ichifukwa chicho aba Yuda bakamusitakila u Pabuli, po indabi yache bakamusatula nukulamula ukuti abaputi abasongo na kabukatila ka balongi bakomane. Polelo bakamusenda u Pabuli nukumwimika pamaso papabo.

Currently Selected:

Imbombo 22: LMBNT2016

Highlight

Copy