Imbombo 20

U Pabuli akudumusannya mu Makedoniya na mu Gilisi

1Bo ivyongo vila vyamala, u Pabuli akabitizya poka abamanyili nukubalagha na mazyu aghakubakazya. Po akanyamuka nukubuka ku Makedoniya. 2Akadumusannya muvigaba vilavila nukubakazya abantu na mazyu aminji. Po pabumalilo akafika mu Gilisi, 3nukwikala mulamula amezi matatu. Bo ali papipi pakubuka ku Siliya nu bwato, akazyaghannya ukuti aba Yuda bakabatika pakumughogha, po akinong'ona pakunyokela ukwendela ku Makedoniya 4U Sopata umwana uwa Pili uwamu Beleya, akabuka poka nawe; u Alisitalika nu Sekunda uwamu Tesalonika; u Gayi uwamu Delibe; u Tikika nu Tulofimo, aba muchigaba icha Asiya nu Timoti. 5Bakalongolela nukutulindilila aswe mu Tulowa. 6Loli tukanyamuka nu bwato mu Filipi, bo lwamala Ulusekelo ulwa Chibama chicho chite ni chilungo. Bo ghachilapo sona amasiku fayivi tukabakonka mu Tulowa. Mulamula tukikalamo usabata weka.

Ubulendo ubwabumalilo ubwa Pabuli mu Tulowa

7Pa Chibelusi#20.7 Pa Chibelusi: Pamo Pa Sabata. pachamabwila tukabungana pakumenyannya ichibama ukumukumba u Mwene. U Pabuli akanena na bantu mupaka pakasi pabusiku pakuti indabi yache akafumaghapo. 8Muchipinda chicho chikaba pamwanya pachamwabo mumo tukabungana poka, mukaba inyale inyinji. 9Bo u Pabuli achili pakunena, umulumendo yumo yuyo akaba we Yutika akikalagha pibwindo. Po akanda pakusyupila nukughona utulo utukulu, akawa pasi ukufuma muchipinda ichabutatu pamwanya. Bo bakumuseba, bakagha afuye. 10Loli u Pabuli akika pasi nukwisumba mu mulumendo yula nukumukukila. Akati, “Mutakapasyanje achili mumi!” 11Po akakwela sona muchipinda chila, akamenyannya ichibama ukumukumbuka u Mwene nukulya. Bo anena nabo akabalilo akatali mupaka kubuche, akabuka. 12Bakamusenda umulumendo yula nukubuka nawe kunyumba mumi, sona bakasangalusiwa nkani.

Ukufuma mu Tulowa ukubuka mu Mileta

13Tukalongolela pakukwela ubwato ubukulu nkani nukubuka ku Asosi, kuko tukalondagha pakumusenda u Pabuli. Umwene u Pabuli akatubuzya ukuti tubombe bunubu pakuti akalondagha ukwenda pisila. 14Bo akomana naswe mu Asosi, akakwela mu bwato ubukulu poka naswe, po tukabuka ku Mitileni. 15Tukepako kulakula, po indabi yache tukafika piloboko ilya Kiyo. Pisiku ilyabutatu tukafika mu Samo, po ilyandabi, tukafika mu Mileta. 16U Pabuli akadumula ukulobokela kwisila ilya mu Efeso, ukuti atakataghe akabalilo muchigaba icha Asiya. Akachimbililagha ukuti afike mu Yelusalemu pisiku ilya Pentekositi nanti chingabombiwa.

U Pabuli akulaghana na basongo aba chipanga mu Efeso

17Ukufuma mu Mileta u Pabuli akatuma amazyu ku Efeso pakubalaba abasongo aba chipanga ukuti bakomane nawe. 18Bo bafika, akababuzya akati, “Mumenye mumo nkikalila namwe akabalilo kosi ukwandila pisiku ilyakwanda, lilyo nkafikilagha muchigaba icha Asiya 19Nu kwiyisya kwane kosi, sona na masozi nkamubombela u Mwene napapo nkayimba nkani ni njelo izya ba Yuda. 20Muzimenye ukuti intakafisapo nachimochimo chicho chingaba chakubavwa. Nkalumbilila nukumanyisya pabuzelu, sona na munyumba zyinyu. 21Aba Yuda na bantu babo bate ba Yuda, nkabalaba umwakulambilizya nkani ukuti bazileke imbibi zyabo nukupindukila kwa Chala nukusubila mwa Mwene u Yesu. 22Po ilelo pakumwivwila u Muzimu Umuzelu nkubuka mu Yelusalemu ukusita ukuzimanya zizyo zikwiza pakumbonekela mulamula. 23Chene chicho inchimenye ichakuti mukaya akakulu nkani kosi u Muzimu Umuzelu akunsoka ukuti ijelo nintamyo vikundindilila. 24#2 Tim. 4.7Loli intakupasyapo nizya bumi bwane ukuti bwapamwanya kukwane. Pakuti chicho nkulonda chakuti imalizye imbombo yane, sona nu butumiwa bubo u Mwene u Yesu akampa ubwakulumbilila Amazyu Amiza aghakunena nizya chisa icha Chala.

25“Ilelo inzimenye ukuti amwe mwebosi mwe nabendela nukulumbilila Ubumwene ubwa Chala, mutakwiza pakuchennya sona icheni chane. 26Po naloli nkubabuzya amwe ilelo ukuti nanti umuntu yumo uwa amwe angasobela, ane nasukusula munyobe. 27Pakuti intakafisapo nachimochimo kukwinyu, loli nkalumbilila zyosi zizyo u Chala akulonda. 28Po mwisungilile mwebene, sona nu mudimo ghosi ghugho u Muzimu Umuzelu abikite munyobe zyinyu. Mubanje mwe badimi aba chipanga icha Chala,#20.28 Chala: Amasimbo ghamo aghakale ghasimbite ukuti u Mwene. chicho akachitabula ni banda ilya mwana wache.#20.28 ni banda ilya mwana wache: Pamo ubufwe ubwache nu bwache. 29Inzimenye ukuti bo nabuka impumpi inkali zitakwiza pakughuleka bulo umudimo. 30Akabalilo kakwiza kako abantu bamo aba mu kabukatila kinyu bakwiza pakunena ubumyasi nukubadeba abamanyili ukuti babakonke. 31Po mubanje maso! Mukumbukaye ukuti pamaka matatu, umusanya nu busiku intakalekapo nalumolumo pakubamanyisya mwebosi na masozi.

32“Po ilelo nkubabika munyobe izya Chala na mumazyu agha chisa chache ghagho ghangabasunga nukubapa ulusayo lulo u Chala abasungiye abantu bache bosi. 33Intakanyonywapo indalama izya muntu pamo amenda agha muntu awe. 34Amwe mwebene muzimenye ukuti nabombezyanga inyobe zyane ukuti ivyaghe ivintu vivyo ane na bamanyani bane tukasobelwanga. 35Muvintu vyosi nabalanjizya ukuti pakubomba nkani imbombo bunubu, tubaghiye pakubavwa abadedebazu. Mukumbukaye amazyu ghagho u Mwene u Yesu akanena ukuti, ‘Ukupa kukumusaya umuntu nukuchila ukupokela bulo.’ ”

36Bo u Pabuli amalizya, akafughama nukwiputa poka nabo. 37Bosi bakalilagha bo bakumukukila nukumufyofyonta nukulaghana nawe. 38Bakaba ni chitima nkani pachifukwa icha mazyu ghagho akanena ukuti bate bakachennye sona icheni chache. Po bakamusindikila ku bwato ubukulu nkani.

Currently Selected:

Imbombo 20: LMBNT2016

Highlight

Copy