2 Aba Tesalonika 2
2
Nizya Muntu Umubibi
1 #
1 Tes. 4.15-17
Mwee bakamu bane, ilelo nkulonda inene sona ukuyana nizya kwiza sona ukwa Mwene witu u Yesu Kilisitu, sona nizya kukomana kwitu poka nawe. Nkubalaba ukuti, 2imitu yinyu yitakavulunganaye, pamo ukuchenukila na mazyu aghakuti, “Isiku ilya Mwene lyafika,” napapo bakunena ukuti amazyu agha ghakufuma kwa Muzimu Umuzelu, pamo ukuti sweswe twaghanena, pamo ukuti twabasimbiye mwakalata uyu. 3Patakabepo nayumo umuntu uwakubazimbula napo panandi, pakuti isiku lila litakwiza mupaka papo ukumusambukila u Chala ukwabumalilo kwabombiwa, sona umuntu Umubibi yula aboneke, yuyo ubumalilo bwache ko kuzimila. 4#Dan. 11.36; Ezk. 28.2Akwiza pakususya nukwikwezya mwene pamwanya pa bachala bosi sona na pamwanya pa vintu vyosi vivyo abantu bakuvyiputa. Akwiza pakwinjila nukwikala mu Nyumba iya Chala nukwiyitizya mwene ukuti we Chala.
5Nkimba mutakukumbuka ukuti nkababuzyanga zyosi zinizi, bo indi poka namwe? 6Loli nilelo bulo muzimenye ukuti chilipo ichintu chimo chicho chikumukanizya, umwakuti avumbuliwe pakabalilo kache akiza. 7Pakuti ilelo amaka aghakubusyefu agha mbibi ghandite kale pakubomba imbombo. Loli chikwiza pakuba kubusyefu mupaka papo efiwapo yuyo akuchikanizya. 8#Yes. 11.4Po umuntu umubibi yula akwiza pakuvumbuliwa. Loli u Mwene u Yesu akwiza pakumunangannya nu muyi uwa mumulomo wache, bo akwiza mubuchindamu bwache ubwakunyezimila. 9#Mat. 24.24Umuntu umubibi yula akwiza na maka agha Satana nukubomba ivyika ivyabumyasi ni viswigho ivyakulekanalekana. 10Akwiza pakubomba ivintu ivyinji nkani pakubazimbula abantu abinji babo bakwiza pakuzimila. Abene bakwiza pakuzimila ichifukwa bakakana pakupokela nukubughana ubwanaloli ukuti bapokiwe. 11Pachifukwa chinichi, u Chala akubatumila amaka agha buvulunganu pakubomba mumwabo umwakuti basubile chicho chabumyasi. 12Polelo ubumalilo bwache bwakuti bosi babo batasubiye ubwanaloli, loli bahobokite nkani nukubomba imbibi, bakwiza pakususyiwa.
U Chala akabasala ukuti mupokiwe
13Loli aswe tubaghiye pakumupalizya u Chala akabalilo kosi pachifukwa icha mwemwe, bakamu bitu, mwemwe u Mwene abaghanite. Pakuti u Chala akabasala amwe po pabwandilo na maka agha Muzimu Umuzelu ukuti abapoke pakubapaghula pakuba bantu bache abazelu, pachifukwa icha kumusubila kwinyu mubwanaloli. 14U Chala akabitizya amwe ukwendela mu Mazyu Amiza ghagho tukalumbilila kukwinyu ukuti mugabane nabo ubuchindamu ubwa Mwene witu u Yesu Kilisitu. 15Polelo bakamu bitu, mwimaye nkani, sona mukakatile inyiho zizyo tukabamanyisya amwe, manyi mumazyu, manyi mubakalata bitu.
16U Mwene witu u Yesu Kilisitu nu Tata witu u Chala yuyo akatughana aswe, sona yuyo muchisa chache akatupa ulukazyo lwache lulo lutakupotwapo nalumo, sona nu lusubilo ulwiza, 17abakazye nukubapa amaka ukuti mubombaye imbombo zyosi inyiza, sona na mumazyu bulo.
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Learn More About Ulufingo Ulupya