2 Aba Tesalonika 3
3
Mutwiputilayeko
1Pabumalilo, bakamu bitu, mutwiputilayeko ukuti amazyu agha Mwene ghendelelaye pakusata umwalubilolubilo, sona nukuti abantu baghapokele nu muchizi ukuyana namumo ghakabombela mumwinyu. 2Mwiputaye sona ukuti u Chala atupoke munyobe izya bantu abambibi, sona naku babibi pakuti, bate bantu bosi babo bali nu lwitiko, awe.
3Loli u Mwene we musubiliwa, sona akwiza pakubakazya amwe nukubasungilila akiza ukuti Umubibi yula atakabanangannye. 4U Mwene akutupa ulusubilo ulwakuti mukubomba zyosi zizyo tukubalamula amwe, sona nukuti mukwiza pakwendelela pakuzibomba.
5U Mwene alongozye inyinong'ono zyinyu ukuti mulwivwisye ulughano ulwa Chala, sona nu bufisalyoyo ubwa Kilisitu umwakufikapo.
Akubasoka nizya bukata
6Bakamu bitu, tukubalamula mwitabwa ilya Mwene Yesu Kilisitu ukuti mubaleghuke abitiki bosi babo bakata, sona na babo ubumi bwabo butakuyana ni vimanyisyo vivyo tukabapa. 7Pakuti amwe mwebenecho muzimenye bulo ukuti mubaghiye pakweghelela kukwitu. Aswe tutakaba bakata, bo tuli poka namwe. 8Aswe tutakalyapo ichakulya icha muntu yumo ukusita ukulipila. Loli tukendelela pakubomba imbombo umusanya nu busiku, umwakuti tutakamutamyepo nayumo umuntu. 9Kute kokuti tutakaba nu bulaghili ubwakulabila ubwavwilizi kukwinyu, awe. Loli tukalondagha ukuti tubanje chifwanikizyo kukwinyu.
10Pakuti napapo bulo bo tuli poka namwe tukabalamula ukuti, “Umuntu wesi yuyo akukana pakubomba imbombo, atakalye nukulya bulo.”
11Tukunena zinizi pakuti tukwivwa ukuti mumwinyu balimo abantu bamo babo bakata, sona batakulonda nukubomba imbombo napo panandi, loli kwene ko kwinjilila pazya bantu abanji. 12Abantu banaba tukubalamula nukubasoka mwitabwa ilya Mwene u Yesu Kilisitu ukuti babombaye imbombo zyabo nu bwachimyeka umwakuti bavyaghaye ivyakulya.
13Loli amwe, mwe bakamu, mutakalitaye pakubomba ubwiza. 14Nanti alimo weka mumwinyu yuyo atakwivwila amazyu ghagho twasimba mwakalata uyu, mumwenelezye akiza, sona mutakamanyane nawe ukuti isoni zimuleme. 15Mutakamupimaye pakuba mulwani, loli mumusoke pakuti mukamu winyu.
Amazyu aghabumalilo
16U Mwene, umwenecho uwa mutende abapanje umutende pakabalilo kosi, sona na muzila zyosi. U Mwene abanje namwe mwebosi.
17Ni nyobe iyane ni yane, nkusimba amazyu aghakuti: Mwaghona. Nene Pabuli. Chinichi cho chimanyilo chane mubakalata bosi. Umu momumo nkusimbila. 18Ichisa icha Mwene witu u Yesu Kilisitu chibanje namwe mwebosi.
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Learn More About Ulufingo Ulupya