Zakaráya 7
7
Onye-Nwe-Ọha jịkaru ọswi ẹgu l'erwua l'ọhu ẹwho
1L'ime awha kwe Daríyọsu awha ẹno ọ watarụ ọbu eze, be Onye-Nwe-Ọha kfuru okfu yeru Zakaráya l'abalị ẹno l'ọnwa tete, bụ ọnwa Kisilevu.#7:1 Kisilevu bụ ọnwa tete l'ọgu awha ndu Híburu. 2Nteke ono bẹ ndu Bẹtelu zhiwaru Shareza yẹle Regemu-mẹleku mẹe ndibe whẹ ọdo tẹ whẹ je aryọta iwhe-ọma l'ẹka Onye-Nwe-Ọha, 3yẹle tẹ whẹ jịta ndu l'agbajẹ ẹja l'eze-ụlo Onye-Nwe-Ọha bụ Onye-ishi-igwe-ọgu mẹe ndu nkfuchiru Chileke sụ whẹ: “?Mu l'a-tsọ áwhụ swịa ẹgu l'ọnwa ise ẹgube ono, mu shi meta iya eshi awha olemole ntaa?”
4Ọ kwa iya bụ lẹ Onye-Nwe-Ọha bụ Onye-ishi-igwe-ọgu abya ekfuru okfu yeru mu sụ mu agha: 5“Kfuru ndu alị-a gẹ whẹ ha mẹe ndu l'agbajẹ ẹja nụ Chileke sụ whẹ agha: ‘Ẹgu ono unu l'aswịje, tsọo áwhụ l'ọnwa ise mẹe l'ọnwa ẹsaa, eshi ụkporo awha ugbo ẹto l'awha iri ntaa, bẹ bụ nke mmaka; ọ tọ bụkwa mbẹdua bẹ unu l'aswị-turu iya. 6Ọdo bụ l'iwhe-eriri mẹe iwhe angụngu ono, unu l'anọje eri angụ bụkwa nke ẹhu unu. 7Ọ kwa iya bụ okfu ọbu, Onye-Nwe-Ọha shi l'ọnu ndu nkfuchiru iya kfua l'oge ndụ-ichee nteke ono, Jerúsalẹmu yẹle mkpụkpu, nọ-wheru iya mgburumgburu shi bụru ẹka madzụ bu ebu, bụru ẹka iwhe bụ ụpete, mbụ nteke ono, madzụ shi bugeeru l'echi-ẹgu ọhuda mẹe l'ọkpa-ugvu, dụ l'ụzo ẹnyanwu-arịba.’ ”
8Onye-Nwe-Ọha byakwa ekfuru okfu yeru Zakaráya sụ: 9“Ọ waa bụ iwhe Onye-Nwe-Ọha bụ Onye-ishi-igwe-ọgu l'ekfu: ‘Unu dobejekwa ire-lanụ l'iwhe unu l'eme eme, unu egoshije obu-ọma yẹle obu-imiko l'ẹka ndu ọdo nọ. 10Unu ba anọjekwa akpapyashị nwanyị-mbunu mẹe nwa-nwogbee mẹe onye byarụ abyabya yẹle onye ụkpa ishi, ya adụjekwa onye l'agbarụ ibe iya ejo égò l'ime obu iya.’
11“Ọle whẹ te ekwedu ngabẹ nchị, whẹ nyalahaa mgbaaku woru iwhe swọ-chishia nchị tẹ whẹ ba anụ iwhe ono. 12Whẹ meru obu whẹ ọ nmaa mkpigbi g'ọo ẹwhuru, jịka lẹ whẹ ta angadụ nchị l'iwhe iwu l'ezhi, mẹe l'okfu ono, Onye-Nwe-Ọha, bụ Onye-ishi-igwe-ọgu shi l'ẹka Ume nkiya kfuru nụ whẹ, mbụ ọwhu o shi l'ọnu ndu nkfuchiru Chileke ọwhu, gbarụ nteke ndụ-ichee kfua. Ọ bụru iwhe ono meru Onye-Nwe-Ọha bụ Onye-ishi-igwe-ọgu vọru oke ẹhu-eghughu tukoshi whẹ. 13Eshi-ọwhu mu kuru whẹ oku whẹ ta angabẹru mu nchị, whẹbedua l'e-kukwa mu whọ oku, mu ta angadụru whẹ nchị, o nokwa iwhe Onye-Nwe-Ọha bụ Onye-ishi-igwe-ọgu l'ekfu ndono. 14Mu gude uburu-aga zhikashia whẹ nnanụ nnanụ, whẹ dzuru mba gẹ mba ha, whẹ l'ẹte amahawaa. Alị ono bya abụru ẹka whẹ parụ haa ọ bụru ochuwhu, tọ dụhe onye l'anọjekwadu eje eje alwa alwa l'ime iya. Ẹguru alị ono bẹ whẹ meru ọ bụru ochuwhu.”
Currently Selected:
Zakaráya 7: Ezaa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
