Zakaráya 6
6
Ọwhulenya ụgbo-ịnya ẹno
1Mu bya apalikwaawho ẹnya ọdo whụ ụgbo-ịnya ẹno gẹ whẹ shi lẹ mgbakụ ugvu labọ ekpushi. Ugvu ono bụ ugvu ope. 2Ụgbo-ịnya nke mbụ bụ ịnya, l'ekekaa uswe-uswe bẹ lọkpu iya nụ, nke ẹbo bụru ịnya, l'ejikaa uji bẹ lọkpu iya nụ, 3nke ẹto bụru ịnya, l'achakaa ụcha bẹ lọkpu iya nụ, nke ẹno bụru ịnya, tụkashiru iwhe l'ẹhu bẹ lọkpu iya nụ. Ịnya ono g'ọ ha bẹ nwekotaru ọkpehu. 4Mu bya ajịa Ojozhi-imigwe ono shi ekfu eyeru mu ono sụ iya: “?Ọo gụnu bẹ iwhe ono fụtaru Onye-nwe-mu nụ?”
5Ojozhi-imigwe ono bya eyeeru mu ọnu sụ mu: “Ọ kwa whẹrewhere, l'eshije lẹ mgburẹku ẹno nke mgboko ewhe bẹ whẹ bụ. O zhiawhọ ntaa ntaa bẹ whẹ shi l'iwhu onye nwe mgboko l'owhu fụta. 6Ịnya ọwhu l'ejikaa uji bẹ lọkpu ụgbo nkiya chebe ụzo isheli. Ịnya ọwhu l'achakaa ụcha lọkpuru nkiya chebe ụzo ẹnyanwu-arịba, ịnya ọwhu tụkashiru iwhe l'ẹhu lọkpuru nkiya chebe ụzo ọhuda.”
7Ịnya ono wụfuta kwojilahaa tẹ whẹ je etsoru mgboko l'owhu ghajẹ vulavula. Ojozhi-imigwe ono sụ whẹ: “Unu tụgburu je aghawheje lẹ mgboko.” Whẹ tụgburu je awata aghawhe lẹ mgboko. 8Tọ dụ iya bụ, Ojozhi-imigwe ono ryaku mu sụ: “Leenu, ịnya ọwhu tụgburu ụzo isheli meekwaru t'obu jizeta mu l'alị isheli.”
Okpu-eze e kpuberu Jóshuwa
9Onye-Nwe-Ọha bya ekfuru okfu yeru mu sụ: 10“Nata mkpọla-ọcha yẹle mkpọla-ododo l'ẹka Heludayi mẹe Tobayija mẹe Jedaya, bụ ndu shi lẹ Bábyilọnu, bụ ẹka e shi kpụa whẹ lẹ ndzụ lwa. Gudekwawho ujiku lanụ ono jee ibe Josáya nwa Zéfanaya. 11Mkpọla-ọcha ono yẹle mkpọla-ododo ono bẹ l'ịi-nata gude mee okpu-eze kpube onye ishi ndu l'agbajẹ ẹja nụ Chileke, bụ Jóshuwa nwa Jehozadaku l'ishi. 12Gụ asụ iya lẹ Onye-Nwe-Ọha, bụ Onye-ishi-igwe-ọgu bẹ sụru agha: ‘Lee nwoke ọbu ẹwha iya bụ Ekalị-Oshi. Oo-shi l'ẹka ọ kakfụru mokashihu je atụkwaa eze-ụlo Onye-Nwe-Ọha. 13Ọo yẹbedua l'a-tụkwa eze-ụlo Onye-Nwe-Ọha, ya anata ugvu, rwuberu onye eze, ya anọdu l'oshi-eze iya chịlahaa. Onye l'agbajẹ ẹja nụ Chileke l'a-nọkubekwa oshi-eze iya ono nchị adụ whẹ labọ doo.’ 14Okpu-eze ono bẹ l'ee-dobe l'eze-ụlo Onye-Nwe-Ọha t'ọ bụru iwhe l'ee-gudeje nyata Heludayi mẹe Tobayija mẹe Jedaya mẹe Josáya nwa Zéfanaya.”
15“Ndu bu otẹnya l'a-bya eyeta ẹka t'a tụa eze-ụlo Onye-Nwe-Ọha ono. Nteke ono bẹ unu l'a-ma l'ọo Onye-Nwe-Ọha, bụ Onye-ishi-igwe-ọgu bẹ zhiru mu tẹ mu byakfuta unu. Iwhe ono l'e-mekotakwa mẹ unu lezhita ẹnya anụru Onye-Nwe-Ọha, bụ Chileke unu okfu.”
Currently Selected:
Zakaráya 6: Ezaa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
