Zakaráya 8
8
Onye-Nwe-Ọha l'ekwe ụkwa lẹ ya l'e-dobewhu Jerúsalẹmu azụ l'ọnodu iya
1Onye-Nwe-Ọha, bụ Onye-ishi-igwe-ọgu bya ekfuru okfu yeru mu. 2Ọ waa iwhe Onye-Nwe-Ọha bụ Onye-ishi-igwe-ọgu l'ekfu: “Okoowhoo gbuakwaru mu egbu l'okfu ẹhu Záyọnu, okoowhoo ẹhu iya bẹ l'enwukwa mu whuruwhuru l'ẹhu.” 3Ọ waa iwhe Onye-Nwe-Ọha l'ekfu ndọwa: “Mu l'a-lwawhuta azụ lẹ Záyọnu, mu l'e-buru eburu lẹ Jerúsalẹmu. E kulahaa Jerúsalẹmu Obodo ire-lanụ, kulahaa ugvu nke Onye-Nwe-Ọha bụ Onye-ishi-igwe-ọgu Ugvu, dụ Nsọ.” 4Ọ waa iwhe Onye-Nwe-Ọha bụ Onye-ishi-igwe-ọgu l'ekfu: “Unwoke ọgurenya mẹe ụnwanyi nochee l'a-wata adọkobe ọdo l'ọma nggamgbo Jerúsalẹmu, onyenọnu apageeru mkpụru ọgurenya iya l'ẹka. 5Unwokoro l'ụnwumgboko l'a-nọ atsụ rụkfurukfu l'ọma mkpụkpu ono egvu egvuregvu.”
6Ọ waa iwhe Onye-Nwe-Ọha bụ Onye-ishi-igwe-ọgu l'ekfu: “Iwhe ono l'a-dụkwa biribiri l'ẹnya ndu whọduru nụ nteke ono, obenu l'ọ tọ dụdu biribiri l'ẹnya nke mbẹdua.” O nokwa iwhe Onye-Nwe-Ọha, bụ Onye-ishi-igwe-ọgu l'ekfu ndono. 7Ọ waa iwhe Onye-Nwe-Ọha bụ Onye-ishi-igwe-ọgu l'ekfu: “Mu l'a-dzọfuta ndibe mu l'ẹka ndu alị ụzo ẹnyanwu-awata mẹe l'ẹka ndu alị ụzo ẹnyanwu-arịba. 8Mu l'e-dulatawhu whẹ azụ tẹ whẹ bya eburu lẹ nhamụnha Jerúsalẹmu. Whẹ abụru ndibe mu, mu abụru Chileke whẹ l'ire-lanụ mẹe l'ụzo dụ chịriri.”
9Ọ waa iwhe Onye-Nwe-Ọha bụ Onye-ishi-igwe-ọgu l'ekfu: “Unubẹ ndu l'anụ okfu-a ntanụ, bụ okfu ono, ndu nkfuchiru Chileke shi nteke e gbuberu ukfu ụlo Onye-Nwe-Ọha-a bụ Onye-ishi-igwe-ọgu kfuta; t'ẹka ba atsụkwa unu mmẹe nggẹ a tụa eze-ụlo ono tụfu iya l'ishi. 10Tẹmenu a wata ọtu ukfu ụlo ono bẹ l'eete eshidua akfụje madzụ ụgwo-ozhi ọwhu l'eewhoro anụmanu, tọ dụroo onye shi akpajẹ lẹ ntụsaru-ẹhu l'iswi ọhogu nkele mu shi mee onyenọnu t'ọ bụru ọgu dụru ibe iya. 11Obenu lẹ ntaa ọwa bẹ mu l'abyahẹkwaa l'e-me ndu ọwhu whọduru nụ gẹ mu meru ndu nke mbụ ono. O nokwa iwhe Onye-Nwe-Ọha bụ Onye-ishi-igwe-ọgu l'ekfu ndono. 12Whẹ l'e-gude ẹhu guu mebe iwhe l'alị, vayịnu eyelahaa mebyi, alị emetalahaa iwhe, igweli achịlahaa mini. Iwhe ono g'ọ ha bẹ mu l'e-doberu ndu ono whọduru nụ t'ọ bụru nkewhe. 13Ọ kwa ẹgube ono mba lile shi egudeje unubẹ ọzo-ụlo Juda mẹe ọzo-ụlo Ízurẹlu atụ lẹ ntọnu, o nokwa gẹ mu l'a-dzọfuta unu ndono, unu abụru ndu a gọru ọnu-ọma nụ. Unu ba atsụkwa egvu, ẹka eje atsụkwa unu mmẹe.”
14Ọ waa iwhe Onye-Nwe-Ọha bụ Onye-ishi-igwe-ọgu l'ekfu: “Ọ kwa ẹgube ono mu shi tubua lẹ mu l'eme unu ejo-iwhe nteke ono, nnajị unu whẹ kpatsuru mu oke ẹhu-eghughu, obu te ekwe jizeta mu, o nokwa iwhe Onye-Nwe-Ọha bụ Onye-ishi-igwe-ọgu l'ekfu ndono; 15o nokwawho gẹ mu tubuwaru ntaa lẹ mu l'e-meru ndu Jerúsalẹmu yẹle ọnu-ụlo Juda ree. Unu ba atsụshi egvu. 16Ọ waa bụ iwhe unu l'e-mejezhiawho: Unu kfujee ire-lanụ l'ẹka ibe unu nọ, unu ekpeje ikpe kfụru nhamụnha l'ụlo-ikpe unu, mbụ ikpe ọwhu l'emeje tẹ nchị dụ ndoo. 17Unu ba agbajẹkwaru madzụ ibe unu ejo égò l'ime obu unu, unu eje akpapyabẹjekwa iwhe unu meru gụa ẹnwa. Iwhe lile ono bẹ mu kpọkotakwaru ashị. O nokwa iwhe Onye-Nwe-Ọha l'ekfu ndono.”
18Onye-Nwe-Ọha, bụ Onye-ishi-igwe-ọgu bya ekfuru okfu yeru mu ọdo. 19Ọ waa iwhe Onye-Nwe-Ọha bụ Onye-ishi-igwe-ọgu l'ekfu: “Unu wota ẹgu ono, unu l'aswịje l'ọnwa ẹno mẹe l'ọnwa ise mẹe l'ọnwa ẹsaa mẹe l'ọnwa iri, mee ya t'ọ bụru unu oge ẹhu-ụtso mẹe oge ote ẹswa, t'ọ bụru ori oge ẹhu-ụtso l'ẹhu ọzo-ụlo Juda. Iwhe unu l'e-me bụ; t'unu yee ire-lanụ obu yẹle nchị-ọdu-ndoo.”
20Ọ waa iwhe Onye-Nwe-Ọha bụ Onye-ishi-igwe-ọgu l'ekfu: “Lẹ mgbe l'iwhu bẹ ndu ha l'igweligwe l'e-shigee lẹ mkpụkpu ha l'igweligwe awụ abya Jerúsalẹmu. 21Ndu bu lẹ mkpụkpu ọdo l'a-gbalihu je asụ ndu ọdo: ‘Unu bya t'anyi kpakọ dzebe je aryọo Onye-Nwe-Ọha t'o meeru anyi iwhe-ọma, unu bya t'anyi kpakọ je achọo Onye-Nwe-Ọha bụ Onye-ishi-igwe-ọgu. Mbẹmua l'e-jeshiakwa.’ 22Ikpoto madzụ mẹe mba nweru ọkpehu l'a-wụru bya ọcho Onye-Nwe-Ọha bụ Onye-ishi-igwe-ọgu lẹ Jerúsalẹmu, whẹ abyakwawhọ tẹ whẹ ryọo ya t'o meeru whẹ iwhe-ọma.” 23Ọ waa iwhe Onye-Nwe-Ọha bụ Onye-ishi-igwe-ọgu l'ekfu: “Nteke ono bẹ ụmadzu iri, shi lẹ mba ọdo, l'ekfukaa okfu alị dụ l'iche l'iche l'a-byajẹ alọta ẹka jịkfu jịkfu l'uwe onye Ju asụje iya: ‘Tẹ anyi tsoru ghu l'anyi nụru lẹ Chileke swiru unu eswiru.’ ”
Currently Selected:
Zakaráya 8: Ezaa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
