Mátiyu 3

Ozhi, Jọnu baputizimu l'ezhi

(Mak. 1:1-8; Luk. 3:1-18; Jọn. 1:19-28)

1A bya anọta-be rwua nteke ọbu, Jọnu ọwhu l'emeje baputizimu byabya anọdu l'echi-ẹgu Judíya, kfulahaa okfu Chileke sụ: 2“Unu daa onwunu ụta haa ome iwhe-dụ-ẹji unu l'emegbabe, lwakfuta Chileke, o noo lẹ Chileke byakwa l'egoshi l'ọo ya bụ eze.” 3Ọ kwa Jọnu bẹ bụ onye ọbu Ayizáya onye nkfuchiru Chileke kfuru okfu ẹhu iya sụ:

“O nweru onye l'echi mkpu l'echi-ẹgu asụje:

‘Unu mechaaru Onye-Nwe-Ọha ụzo.

Unu mee ogborogbo ụzo iya t'ọ kfụ-geeru nhamụnha.’ ”

4O noo ya, uwe Jọnu l'eyeje l'ẹhu bụ uwe ọbu e gude ẹji ịnya-kamẹlu kpaa; l'oogudeje ajị e gude akpọ-anụ mee kebuta iya l'ukfu. Iwhe bụ nri iya bụru igube yẹle mmanụ-ẹnwu. 5Tọ dụ iya bụ lẹ Jerúsalẹmu l'owhu, mẹe Judíya l'owhu, mẹwaro ndu lile, buwhekotaru Jọ́danu mgburumgburu tụko zafụtakota, eze gbigbigbi, awụ awụ-kfu iya tẹ whẹ je anụta iwhe l'ookfu. 6Whẹ bya anọdu adụshikaa iwhe-dụ-ẹji, whẹ metagbaberu; l'oomeje whẹ baputizimu l'ẹnyimu Jọ́danu.

7Tọ dụ iya bụ, ọ whụlewho igweligwe ndu Fárisii mẹe ndu Sádusii, l'awụ abya t'e mee whẹ baputizimu, ọ sụ whẹ: “Unubẹ ụnwu, oguji-nwaka nwụshiru-a! ?Ọo onye bya agbaarụ unu ama t'unu gbalaarụ oke-ẹhu-eghughu ono, Chileke l'a-bya tẹ ya tụfuru unu ono? 8Unu mịa mebyi g'ọo oshi-ọmi. Mebyi unu l'a-mịta bụ umere, l'e-goshi l'unu dawarụ onwunu ụta hawaa ome iwhe-dụ-ẹji unu l'emegbabe lwakfutawaa Chileke. 9T'unu ba arịkwa l'unu l'a-sụ: ‘Mbẹ Ébirihamu bụroo ochee-oroke anyi.’ L'o be nke t'ọ dụ nno bẹ Chileke l'a-dụkwa ike mekota ẹwhuru-a dụ-gee ẹgube-ẹ, t'ọ bụkotaru ụnwu Ébirihamu. 10Mbụ lẹ ntaa b'a dabẹekwaru ogbunkụ l'ọgbaragbu iwhe bụkota oshi. Ọo ya bụ l'iwhe bụ oshi, l'amịa mebyi dụ ree, e gbutsua ya chee l'ọku. 11Lẹ mbẹdua, bụ Jọnu kwa mini bẹ mu l'egudeje eme unu baputizimu, gude goshi l'unu dawarụ onwunu ụta, hawaa ome iwhe-dụ-ẹji, lwakfutawaa Chileke. Ọle onye ọwhu l'abyanụ bẹ kakwa mu l'ishi ka mu l'ọkpa. Onye ono bẹ mu l'ete edzuzhiduanu gẹ mu l'a-chịru iya akpọkpa. O noo onye ọwhu l'e-gude Ume-Dụ-Nsọ mẹe ọku mee unu baputizimu. 12O gudewaa ẹka-epete iya l'ẹka, l'oo-gude whụshia ẹswa lẹ witi iya vuta ọwhu bụ witi vuba l'ime mkpu witi. Ya ekpota ọwhu bụ ẹswa iya nwuru ye l'ọku, bụ agbanyi agbanyi, ya ekepyashia ya.”

Jọnu l'eme Jisọsu baputizimu

(Mak. 1:9-11; Luk. 3:21-22)

13O noo ya, Jisọsu shi lẹ Gálili byatashia Jọ́danu, Jọnu mee ya baputizimu. 14Jọnu melahaa t'iya jịka sụ iya: “Ọ kwa mbẹdua bụ Jọnu b'o gbechia rwube tẹ mu bya t'i mee mu baputizimu, i gbechia bya asụ l'ọo tẹ mu mechia ghu baputizimu.”

15Tọ dụ iya bụ, Jisọsu sụ iya: “Haarọ t'e mee ya roo nno nta-a. Nkele o noo g'anyi l'e-shi medzukota iwhe lile Chileke sụru t'anyi mee.”

Tọ dụ iya bụ lẹ Jọnu ekweta.

16Emege, l'eemege Jisọsu baputizimu ono, o shilewho lẹ mini ono fụtade eli-mgboko, igweli bukahulewho ẹbo gheru ọnu. Ọ whụa Ume Chileke g'ọ dụ-zhiawho g'ọo ndo ewhezeta iya l'ẹhu. 17O noo ya, a nụa olu-okfu shi l'imigwe ono sụ: “Ọo onye ọwa bụ Nwa mu, mu yeru obu; oomeje ẹhu atsọ mu ụtso.”

Currently Selected:

Mátiyu 3: Ezaa

Highlight

Copy

Compare