Mátiyu 2
2
Abyabya ndu mmamagụ, shi ụzo ẹnyanwu-awata
1Tọ dụ iya bụ, ọ bụru nteke Hẹ́rodu shi bụru eze b'a nwụru Jisọsu lẹ mkpụkpu Bẹ́tulehemu dụ l'alị Judíya. A nwụle iya whọ, ndu mmamagụ shi l'ụzo ẹnyanwu-awata byatashia Jerúsalẹmu. Whẹ rwua bya akpawhede ishi asụje: 2“Ndẹnu nwata ọbu a nwụru, l'a-bụ eze ndu Ju? O noo nkele anyi whụru kpokponde l'ụzo ẹnyanwu-awata, l'egoshi l'aanwụru iya. Anyi byatashia t'anyi bya abaarụ iya ẹja.”
3Tọ dụ iya bu, eze ono bụ Hẹ́rodu nụlewho iwhe ono whẹ kfuru, ẹhu rwụrwuhu iya, rwụrwuhukwawho ndu Jerúsalẹmu l'owhu. 4Ọ bya ekukobe ndu ishi ndu l'agbajẹ ẹja nụ Chileke gẹ whẹ hakọta mẹe ndu o-zhi-iwu whẹ dzua. Ọ jịlahaa whẹ ẹka l'aa-nwụ-zhia Kuráyisutu ọbu. 5Whẹ sụ iya: “Ọ kwa lẹ Bẹ́tulehemu, dụ lẹ Judíya bẹ l'aa-nwụ iya. O noo l'onye nkfuchiru Chileke deru iya l'ẹkwo sụ:
6“ ‘Gụbe Bẹ́tulehemu, dụ l'alị Juda,
m'ọ tọ bụkwa ghu bẹ kakọta ọlwa alị
l'iwhe bụ mkpụkpu a marụ ẹwha iya l'alị Judíya.
O noo l'ọo l'ime ghu bẹ onye ishi l'e-shi lụfuta,
bụ iya bụ onye ishi, l'a-nọ eleta ndu nkemu,
bụ Ízurẹlu ẹnya lẹge onye l'eche atụru l'eletaje atụru iya.’ ”
7Tọ dụ iya bụ, Hẹ́rodu bya ekua ndu mmamagụ ono, shi l'ụzo ẹnyanwu-awata ono l'edomi, bya akpafụta whẹ ishi ẹgube oge nteke kpokponde ono lụfutaru gẹdegede. 8Ọ bya ezhi whẹ tẹ whẹ jeshiwaro Bẹ́tulehemu ọbu. Sụ whẹ: “Unu je atọ-zhiawho nwẹhu chọo nwata ọbu. Unu -whụle iya whọ t'unu dawhukwa azụ bya akarụ mu, nke ọwhu mu l'e-jekwawho je abaarụ iya ẹja.”
9Ọo ya bụ, whẹ nụ-gelewho ozhi ono, eze zhiru whẹ, whẹ jịbe iya jeshia. Alụfuta whẹ l'alụfuta, gụbe kpokponde-e, whẹ whụhawaruro l'ụzo ẹnyanwu-awata whọ lụfutakwa ọdo bya evutakwaru whẹ whọ ụzo ọdo. O jezhiawho jeye o jerwua ẹka nwata ono nọ. O keshita l'ẹka ono, keleruwho jịngu jịngu l'imeli. 10Whẹ whụlewho kpokponde ono ẹhu tsọshia whẹ ụtso ike. Whẹ wata oote ẹswa. 11Whẹ bya abahụ l'ime ụlo ono bya awhụa nwata ono, whụa Méri bụ ne iya. Whẹ bya ebyishi ikpere l'alị baarụ nwata ono ẹja, bya atọhaa ẹkpa, whẹ yeru ẹku whẹ wofuta iwhe nyakogee nwata ono. Iwhe ọbu, whẹ nyakoru iya bụ, mkpọla-ododo, mẹe furankisẹnsu, mẹe mẹru. 12Tọ dụ iya bụ, Chileke byakfuta whẹ lẹ nrọ bya asụ whẹ tẹ whẹ ba adawhuhebukwaa azụ l'ibe Hẹ́rodu. Whẹ kwe tụgbua, shia ụzo ọdo lashia alị whẹ.
Jósẹfu whẹ l'agba ala alị Íjiputu
13Tọ dụ iya bụ, ndu mmamagụ ono tụgbuleruwho, ojozhi-imigwe shi l'ẹka Onye-Nwe-Ọha byakfuta Jósẹfu lẹ nrọ bya asụ iya: “Gbeshi duta nwata ono yẹle ne iya gbagbua lashia Íjiputu. Unu nọdu l'ẹka ono jeye nteke mu l'e-zhi unu t'unu lụfuta. Lẹ Hẹ́rodu byakwa l'achọ nwata ono l'ẹnya mmee t'iya gbua ya.”
14Tọ dụ iya bụ, Jósẹfu gbeshi l'ẹnyashi duta nwata ono yẹle ne iya, whẹ jịbe iya lashia Íjiputu. 15Whẹ nọ-zhiawho l'ẹka ono jeye Hẹ́rodu nwụhu.
Ọ bụru iya bụ l'iwhe ọbu, Onye-Nwe-Ọha kfuru avụa, mbụ ọwhu o shi l'ọnu onye nkfuchiru Chileke kfuhawaa sụ: “Ọo l'alị Íjiputu bẹ je ekufuta Nwa mu.”
Hẹ́rodu l'egbushi ụnwegirima-nshịi lẹ Bẹ́tulehemu
16A nọnyalewho Hẹ́rodu marụ lẹ ndu mmamagụ ono bẹ bụ edoha bẹ whẹ doharu iya, ọ vọru ọku ghụa ẹhu. Ọ bya atụa iwu t'e gbushikota iwhe bụ ụnwegirima unwoke, a nwụru l'alị Bẹ́tulehemu l'owhu, mẹe ndu ọwhu a nwụru lẹ mkpụkpu lile ọdo, dụ-wheru whẹ mgburumgburu. E shizhia ya who egbugbu lẹ ndu a nwụru nke ọwhuu je akpaa lẹ ndu nọwaru awha labọ. Iwhe meru o mee ya nno bụ ajị whọ, ọ jịru ndu mmamagụ whọ, whẹ kọoru iya oge nteke kpokponde whọ beberu fụta.
17Ọ buru nno bụ g'o shi vụa mbụ iwhe ono, Jeremáya onye nkfuchiru Chileke kfuhawaru sụ:
18“A nụru ụzu-ẹkwa lẹ Rema,
mbụ ẹkwa anwụhu yẹle oke nggụmawhu.
Ọ kwa Réchẹlu l'arya ẹkwa ụnwu iya
to kwe t'e gbota iya egbota,
nkele ụnwu iya bẹ gvụwaru nụ.”
Jósẹfu whẹ shi lẹ Íjiputu alwa
19Tọ dụ iya bụ lẹ Hẹ́rodu abya anwụhulewho, ojozhi-imigwe shi l'ẹka Onye-Nwe-Ọha bya abyakfuta Jósẹfu lẹ nrọ gẹ whẹ nọkwadu l'alị Íjiputu, bya asụ iya: 20“Gbeshi duta nwata ono yẹle ne iya lashia alị Ízurẹlu, o noo lẹ ndu shi achọ ishi nwata ono bẹ nwụshihukotawaru nụ.”
21Ọ gbeshi duta nwata ono yẹle ne iya whẹ lashia alị Ízurẹlu. 22Tọ dụ iya bụ, Jósẹfu nụlewho lẹ nwa Hẹ́rodu, ẹwha iya bụ Akiléyọsu bẹ bụwaa eze, l'achị Judíya l'ọzori nna iya bụ Hẹ́rodu, ọ tsụlahaa egvu gẹ ya l'e-me je eburu l'ẹka ono. A bya anmaarụ iya ọkwa ọdo lẹ nrọ. Ọ bụwaru iya rọo meru ọ tụgbua lashia Gálili. 23O je akwata uwhu buru lẹ mkpụkpu Názaretu. Ọ bụru nno bụ g'e shiwaro iwhe ndu nkfuchiru Chileke kfuhawaru vụkota. Nkele whẹ kfuru sụ: “Ee-ku iya onye Názaretu.”
Currently Selected:
Mátiyu 2: Ezaa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
