Mátiyu 4

Sétanu l'adale Jisọsu

(Mak. 1:12-13; Luk. 4:1-13)

1Ọo ya bụ, Ume Chileke bya eduta Jisọsu duba l'echi-ẹgu tẹ Oshifutuswe data iya. 2O rwua ẹka ono je anọo ụkporo abalị ugbo labọ, eswe l'ẹnyashi, swịkota ẹgu. E megelewho ẹgu gụlahaa ya. 3Nwandata ono, bụ Oshifutuswe byakfuta iya bya asụ iya: “Ọ -bụru l'ị bụ Nwa Chileke, sụadaa ẹwhuru-a t'ọ ghọshia nri.”

4Jisọsu sụ iya: “E deru iya ede l'ẹkwo Okfu Chileke sụ: ‘Ọ tọ bụdu nri kpụ bẹ bụ iwhe madzụ l'egudeje nọdu ndzụ. Iwhe madzụ l'e-gude nọdu ndzụ bụ iwhe bụ-zhia okfu, shi Chileke l'ọnu.’ ”

5Tọ dụ iya bụ, Oshifutuswe ono duta iya bahụ l'obodo ono dụ nsọ, bụ Jerúsalẹmu, duru iya je edobe l'ọnunu swọngu swọngu eze-ụlo Chileke, 6sụ iya: “Ọ -bụru l'ị bụ Nwa Chileke, shinu l'eli ẹka-a kfụdaada l'alị, nkele e deru iya l'ẹkwo Okfu Chileke sụ:

“ ‘Chileke l'e-kfuru-a ndu

ojozhi-imigwe iya tẹ whẹ leta ghu ẹnya.

Whẹ egbobe ẹka pata ghu pafụ

nggẹ t'ị kpọpyashi ọkpa l'ẹwhuru.’ ”

7Jisọsu sụkwa iya whọ: “Obenu l'e dekwaru iya who l'ẹkwo Okfu Chileke sụ: ‘Be ejekwa ọdata Onye-Nwe-Ọha, bụ Chileke ghu.’ ”

8Ọo ya bụ, Oshifutuswe ono dutakwawho Jisọsu ọdo, bya eje enyihu eze ugvu ọbu, halẹwho l'eli g'ọo gụnu, je egoshikota iya alị-eze ndiwhe g'ọ ha swịikpamu mẹe iwhe lile, dụ ree, dụkota iya nụ. 9Ọ sụ Jisọsu: “Ọo ghu bẹ mu l'a-nụkota iwhe lile-e g'ọ ha, m'ọ -bụ-zhiaru-a l'ịi-da kpube iwhu l'alị, baarụ mu ẹja.” 10Ọo ya bụ, Jisọsu sụ iya: “Gbeshi l'ẹka ono Sétanu; l'e deru iya ede l'ẹkwo Okfu Chileke sụ: ‘Ọo Onye-Nwe-Ọha, bụ Chileke ghu bẹ bụ onye l'ịi-barụ ẹja, ọ bụkwaru iya whọ kpụ bụ onye l'ịi-nọ ejeru ozhi.’ ”

11Tọ dụ iya bụ lẹ Oshifutuswe ono aparụ iya haa, ndu ojozhi-imigwe bya eyelahaaru iya ẹka.

Jisọsu l'awata ozhi okfu Chileke lẹ Gálili

(Mak. 1:14-15; Luk. 4:14-15)

12O rwulewho nteke Jisọsu nụru l'a tụwaru Jọnu mkpọro, o gbeshi dawhu azụ lẹ Gálili. 13Ọ gbeshi lẹ Názaretu lashia je eburu lẹ Kapániyọmu. Obodo ono bẹ dụkube agụga eze-ẹnyimu Gálili, mbụ l'alị Zébulọnu mẹe l'alị Náfutali. 14Ọo ya bụ nggẹ iwhe ono Ayizáya onye nkfuchiru Chileke kfuru a-vụkota, ọwhu sụru:

15“Gụbe alị Zébulọnu mẹe alị Náfutali,

dụ l'ụzo eze-ẹnyimu Jọ́danu azụ iya ọwhu.

Gụbe Gálili, bụ ẹka ndu mba gẹ mba ha bu.

16Ndu ono, nọkwadua l'ime ẹkpuroochi

bẹ l'ee-megee whụa iwhoro parụ ẹka.

Ndu ono, buwaa ebu l'alị ono, gbakọtaru tsụrikiti ono,

mbụ alị ono, bụ anwụhu dụkota iya ono;

ndu ono bẹ iwhoro nwuakwaru whoo.”

17O noo ya, ọ bụru nteke ono bẹ Jisọsu shilewho wata anọ arya ozhi-ọma ono shi l'ẹka Chileke aryarya sụ: “Unu daa onwunu ụta haa ome iwhe-dụ-ẹji, unu l'emegbabe lwakfuta Chileke; o noo lẹ nteke Chileke bya l'e-goshi l'ọo ya bụ eze bẹ tẹekwaru l'ụkfu.”

Jisọsu l'eku ndu mbụ, watarụ otso ụzo iya

(Mak. 1:16-20; Luk. 5:1-11)

18O be nteke Jisọsu tsoru agụga eze-ẹnyimu, dụ lẹ Gálili ogologo, ọ whụa unwune labọ bụ ndu l'egbu ẹma. Onye lanụ bẹ ẹwha iya bụ Sáyịmonu, l'eekuje Pyita. Ẹwha nwune iya ọwhu bụ Ánduru. Ọ whụa whẹ gẹ whẹ l'agha ụgbu l'eze-ẹnyimu. 19Jisọsu sụ whẹ: “Unu bya etsoru mu tẹ mu mee unu ndu l'e-rwutaje madzụ gẹ l'eerwutaje ẹma.” 20O bebelewho ekfutsuta iya, whẹ hakọta ụgbu, whẹ gude egbu ẹma tsolahaa ya. 21O shi l'ẹka ono jeliberu nwanshị, ọ whụkwaa unwune labọ ọdo: Jémusu nwa Zébedi mẹe Jọnu nwa Zébedi gẹ whẹ lẹ nna whẹ Zébedi tụkoru nọdu l'ime ugbọ whẹ, edokwa ụgbu whẹ edokwa. Jisọsu kua whẹ. 22Ekuku l'ooku whẹ, whẹ halẹkwawho ụgbo ono, haa nna whẹ tsolahaa ya.

Jisọsu l'ezhi iwhe; arya iya aryarya; emekwawho tẹ ndu ẹhu l'eme mehukota

(Luk. 6:17-19)

23Jisọsu tụko Gálili g'ọ ha jegbakota, ezhi okfu Chileke l'iwhe bụkota ụlo-ndzuko ndu Ju, ekfukwawho okfu Chileke asụje whẹ lẹ Chileke byaakwaa l'e-goshi l'ọo ya bụ eze. O mekwaawho t'iwhe bụkota ndu ẹhu, dụ iche iche l'eme, mẹwaro ndu iwhe-ememe mmaanụ ọdo, dụ iche iche l'emekaa; o mee whẹ, whẹ mehukota, m'e -beta ọ bụru ọga ẹhu, dụ ọdu agha. 24Ẹwha Jisọsu degbakota Siriya mgburumgburu. Whẹ tụko apatakaarụ iya iwhe bụ ndu ẹhu l'adụa mma, mẹe iwhe bụkota ndu ẹhu mmaanụ ọdo, dụ l'iche l'iche l'emekaa, mẹe ndu iwhe l'eme whẹ nu l'emenuka whẹ ẹhuka shii, mẹe ndu ọgvu bu l'ẹhu, mẹe ndu ndakfụkfu l'atụje, mẹe ndu iwhe lọnwu-geeru ibe ẹhu lanụ. O noo ya, Jisọsu mekota whẹ gẹ whẹ ha, whẹ mehukota. 25Igweligwe madzụ shi lẹ Gálili tsoru iya, mẹe ndu shi Obodo-iri, mẹe ndu shi Jerúsalẹmu, mẹe ndu shi Judíya, mẹe ndu shi azụ ẹnyimu Jọ́danu azụ iya ọwhu. Whẹ tụko wụru gidigidi tsoru iya.

Currently Selected:

Mátiyu 4: Ezaa

Highlight

Copy

Compare