Hágayi 1

Onye-Nwe-Ọha l'eku ndu Ízurẹlu tẹ whẹ tụkwaaru iya eze-ụlo iya

1L'awha kwe Daríyọsu awha labọ ọ watarụ ọbu eze ndu Peshiya, l'abalị mbụ l'ọnwa nke ishii, bẹ Onye-Nwe-Ọha shi l'ọnu onye nkfuchiru iya bụ Hágayi kfuru yeru ọ-chị-ọha, l'achị alị ndu Juda, bụ Zerúbabelu nwa Sheyalutiyẹlu yẹle onye ishi ndu l'agbajẹ ẹja nụ Chileke, bụ Jóshuwa nwa Jehozadaku sụ whẹ: 2Ọ waa iwhe Onye-Nwe-Ọha, bụ Onye-ishi-igwe-ọgu l'ekfu: “Ndu-a l'anọje ekfu sụ l'oge teke erwudua nteke l'aa-tụkwa eze-ụlo Onye-Nwe-Ọha.” 3Ọo ya meru Onye-Nwe-Ọha shi l'ọnu onye nkfuchiru iya ono, bụ Hágayi ezhi ozhi-a sụ: 4“?Oo gbechia bụru unu b'ọ gbarụ nke t'unu buru l'ụlo a tụru ọ dụ ree, l'ẹka unu l'elekwaa l'eze-ụlo yẹbe Onye-Nwe-Ọha bụ mkpọkoro ụlo?”

5Ọ waa iwhe Onye-Nwe-Ọha, bụ Onye-ishi-igwe-ọgu l'ekfu ndọwa: “Ngwa, unu lenua ẹnya whụ gẹ l'ọonwuru unu! 6Unu kọru iwhe shii l'alị, unu kpata iya iwhe l'ẹte abaa nwishi. Unu l'erije nri, ẹwho te ejidu unu, unu angụa iwhe-angụngu, unu eje angụ-ji ẹwho. Unu l'eyeje uwe, oyi atsụlee unu. Ndu l'aakfụ ụgwo ọrwu l'anatajẹ ụgwo whẹ chịru ye l'ẹkpa fuhuru ụzo.”

7Ọ waa iwhe Onye-Nwe-Ọha, bụ Onye-ishi-igwe-ọgu l'ekfu: “Unu lenua ẹnya whụ gẹ l'ọonwuru unu! 8Unu jeshia l'ugvu je egbukoo oshi bya egude mekwaa eze-ụlo Onye-Nwe-Ọha ono nke ọwhu ẹhu l'a-tsọ mu ụtso, a nọdukwa iya whọ kwabẹ mu ugvu.” O nokwa iwhe Onye-Nwe-Ọha l'ekfu ndono. 9“Unu leru ẹnya t'unu seta iwhe ha shii, ọ bụru iwhe l'ẹte abaa nwishi bẹ unu setaru. Unu bya ewolahu iwhe ọbu, unu setaru l'uwhu, mu whụa ya ọnu o whụkashihu. ?Ọo gụnu kparụ iya? O noo iwhe Onye-Nwe-Ọha bụ Onye-ishi-igwe-ọgu l'ajị. Iwhe kparụ iya nụ bụ l'ụlo mu bụ mkpọkoro ụlo, unu haa ya, onyenọnu whuchiru l'omezhi ụlo nkiya. 10Ọo iwhe ono meru, igweli chị-buhu mini, alị te emetajehe iwhe. 11Mbụ lẹ mu kuwaru anwụ-akpọkpo oku t'ọ bya akpọbe l'alị mẹe l'eli ugvu mẹe lẹ witi mẹe lẹ mgbu vayịnu mẹe l'oshi ólivu mẹe l'iwhe bụ-zhia iwhe l'eemetaje l'alị, je akpaa lẹ madzụ mẹe l'elwu mẹe l'anya, madzụ seru esese.”

12Tọ dụ iya bụ, Zerúbabelu nwa Sheyalutiyẹlu yẹle onye ishi ndu l'agbajẹ ẹja nụ Chileke ono, bụ Jóshuwa nwa Jehozadaku mẹe iwhe bụ ndu whọduru lẹ ndu Ízurẹlu kweta bya emee iwhe Onye-Nwe-Ọha bụ Chileke whẹ kfuru, mbụ whẹ mee iwhe ono Hágayi, bụ onye nkfuchiru Chileke kfuru whẹ, ẹgube ono Onye-Nwe-Ọha, bụ Chileke whẹ zhiru iya t'o zhia whẹ. Ndu Ízurẹlu tsụlahaa Onye-Nwe-Ọha egvu. 13Nteke ono Hágayi, bụ onye ozhi Onye-Nwe-Ọha ono bya ezhia ndu Ízurẹlu ozhi, Onye-Nwe-Ọha zhiru whẹ sụ: “Mu nọkwa-a swiru unu.” O nokwa iwhe Onye-Nwe-Ọha l'ekfu ndono. 14Onye-Nwe-Ọha bya akpalia obu Zerúbabelu nwa Sheyalutiyẹlu, onye bụ iya bụ ọ-chị-ọha, l'achị alị Juda, kpalia obu Jóshuwa nwa Jehozadaku, onye bụ iya bụ onye ishi ndu l'agbajẹ ẹja nụ Chileke bya akpalia obu ndu whọduru lẹ ndu Ízurẹlu gẹ whẹ ha. Whẹ tụko bya eyeko ẹka l'ọrwu, dụ l'eze-ụlo Onye-Nwe-Ọha ono bụ Onye-ishi-igwe-ọgu, mbụ Chileke whẹ. 15Ọ bụru g'ọnwa ishii ono dụ l'ụkporo abalị l'abalị ẹno l'awha ono, kwe eze bụ Daríyọsu awha labọ ọ watarụ ọbu eze ndu Peshiya bẹ whẹ watarụ ọrwu ono.

Currently Selected:

Hágayi 1: Ezaa

Highlight

Copy

Compare