Hágayi 2
2
Aatụ ọnu gẹ eze-ụlo Onye-Nwe-Ọha l'a-dụ-be biribiri
1O be g'ọnwa nke ẹsaa gbarụ ụkporo abalị l'abalị lanụ, Onye-Nwe-Ọha shi l'ọnu onye nkfuchiru iya bụ Hágayi kfua sụ: 2“Kfuru yeru Zerúbabelu nwa Sheyalutiyẹlu onye bụ iya bụ ọ-chị-ọha, l'achị alị Juda, gụ ekfuru yeru Jóshuwa nwa Jehozadaku onye bụ iya bụ onye ishi ndu l'agbajẹ ẹja nụ Chileke mẹe iwhe bụ ndu whọduru lẹ ndu Ízurẹlu. Sụ whẹ agha: 3‘?Ọo onye l'ime unu bẹ whọduru lẹ ndu whụru gẹ eze-ụlo-ọ shi dụ-be biribiri lẹ mbụ? ?Ọo dụ unu agha l'ẹnya ntaa? ?Tọ dụdu unu g'ọo iwhe mmaanụ? 4Ọle t'obu shia ghu ike ntaa gụbe Zerúbabelu. O nokwa iwhe Onye-Nwe-Ọha l'ekfu ndono. T'obu shia ghu ike Jóshuwa nwa Jehozadaku, gụbe onye bụ onye ishi ndu l'agbajẹ ẹja nụ Chileke. T'obu shia unu ike g'unu ha bụru ndu alị-a l'owhu. O nokwa iwhe Onye-Nwe-Ọha l'ekfu ndono. Unu kebe ẹhu l'ọrwu ono nkele mu nọkwa-a swiru unu. O noo iwhe Onye-Nwe-Ọha, bụ Onye-ishi-igwe-ọgu l'ekfu ndono. 5Nteke unu shi l'alị Íjiputu fụta bẹ mu kweru unu ụkwa lẹ mu l'e-swiru unu. Ume mu nọkwa l'echilabọ unu. Unu ba atsụkwa egvu!’ ”
6“Ọ waa iwhe Onye-Nwe-Ọha bụ Onye-ishi-igwe-ọgu l'ekfu ndọwa: ‘Ọ bụa nwanshị ntaa, mu anmaa igweli yẹle mgboko yikayika, nmaa eze-ẹnyimu yẹle alị ọkponku yikayika. 7Mu anmaa mba gẹ mba ha yikayika. Iwhe ono ndu mba lile l'achọshi ike abụru pẹtee. Mu emee t'eze-ụlo-ọ l'owhu jifuta l'ọdu-biribiri. O noo iwhe Onye-Nwe-Ọha bụ Onye-ishi-igwe-ọgu l'ekfu ndono. 8Mkpọla-ọcha bẹ bụ mu nwe iya, mkpọla-ododo bụru mu nwe iya. O noo iwhe Onye-Nwe-Ọha bụ Onye-ishi-igwe-ọgu l'ekfu ndono. 9Eze-ụlo ọ̀whúú ọwa bẹ ọdu-biribiri iya l'a-kakwa shii amamẹ ọdu-biribiri nke akahụ iya. O noo iwhe Onye-Nwe-Ọha bụ Onye-ishi-igwe-ọgu l'ekfu ndono. Ọ bụru l'ẹka-a bẹ mu l'a-nụ ndibe mu ẹhu-ọdu-guu.’ ” O noo iwhe Onye-Nwe-Ọha bụ Onye-ishi-igwe-ọgu l'ekfu ndono.
Ajị, a jịru ndu l'agbajẹ ẹja nụ Chileke
10O be g'ọnwa tete gbarụ ụkporo abalị l'abalị ẹno l'ime awha kwe eze bụ Daríyọsu awha labọ ọ watarụ ọbu eze, Onye-Nwe-Ọha kfuru okfu yeru onye nkfuchiru iya, bụ Hágayi sụ iya: 11“Ọ waa iwhe Onye-Nwe-Ọha bụ Onye-ishi-igwe-ọgu l'ekfu: ‘Jịadaa ndu l'agbajẹ ẹja nụ Chileke iwhe iwu kfuru l'ọnodu-a: 12Ọ -bụkwanuru lẹ madzụ bẹ wotaru anụ, e doberu nsọ, pyaa ogboromọnu uwe iya apyapya gude parụ anụ ono; ogboromọnu uwe iya ono jịru lẹ buredi m'ọ bụ l'owhe, e teru etete m'ọ bụ lẹ mmẹe m'ọ bụ lẹ mmanụ m'ọ bụ l'ọ jịru l'ọga nri ọdo, dụ iche. ?O meru tẹ nri ọbu dụ nsọ?’ ”
Ndu l'agbajẹ ẹja nụ Chileke ono sụ iya: “Waawa.”
13Hágayi jịkwa whẹ ọdo sụ: “Ọ -bụkwanuru lẹ madzụ bẹ byiru odzu ẹka, shi nno merwua onwiya; onye ọbu harụ ụnwu iwhe ono byia ẹka. ?O meru t'iwhe ono bụru iwhe e merwuru emerwu?”
Ndu l'agbajẹ ẹja nụ Chileke ono sụ iya: “Ee.”
14Hágayi bya ekfua sụ: “Ọ kwa nno bụ g'ọ dụ ndu-a, mbụ ọha-a mu l'ele ẹgube-ẹ yẹle iwhe lile, whẹ l'eme eme. Ọ bụkwaruwho nno bụ g'ẹja lile, whẹ l'egwo bụ iwhe e merwuru emerwu. O nokwa iwhe Onye-Nwe-Ọha l'ekfu ndono.
Onye-Nwe-Ọha l'a-gọru ndu Ízurẹlu ọnu-ọma
15“Sụa, unu lee ẹnya wata ntanụ tụgburu. Unu lewaro g'o shi dụ nteke l'eeteka ewota ẹwhuru kpokfube l'eli ibe iya l'eze-ụlo Onye-Nwe-Ọha. 16Nteke ono shi abụje, madzụ jee ẹka a kụberu ereshi l'ikpo l'ikpo; o lee ẹnya l'iwhe l'aa-gbata iya bụ tinu ụkporo, e megele-e ya abụru tinu iri bẹ l'aa-gbata iya. Onye jeru l'ẹka l'aadzọshi mmẹe l'akpụru vayịnu t'iya kuta mmẹe, l'e-ji itoto ụkporo labọ l'iri, iwhe l'ọo-kụta abụru itoto ụkporo. 17Iwhe lile, unu seru anya iya bẹ mu meru ọ chashịa mmanụ tsụshia evu, mu gude aka-mini nụa ya awhụ, tọ narụ unu nke t'unu daa onwunu ụta lwakfuta mu. O nokwa iwhe Onye-Nwe-Ọha l'ekfu ndono. 18Unu lee ẹnya wata ntanụ tụgburu, ntanụ-a, ọnwa tete dụ l'ụkporo abalị l'abalị ẹno. Unu lenua ẹnya g'iwhe dụ, eshi mbọku ono a tụru ukfu eze-ụlo Onye-Nwe-Ọha ono. 19?Oo nwekwaduru mebyi-iwhe, dụkwadu l'ọba? Ntaa bẹ oshi vayịnu yẹle figu, mẹe oshi itorokuma, mẹe oshi ólivu ta amịdekwaa mebyi. Ọle wata ntanụ tụgburu bẹ mu l'a-gọru ọnu-ọma nụ unu.”
Onye-Nwe-Ọha meru Zerúbabelu eze
20Mbọku onokwawho, mbụ mbọku ono ọnwa ono dụ l'ụkporo abalị l'abalị ẹno ono bẹ Onye-Nwe-Ọha bya ekfuru okfu yeru Hágayi ọdokwa nke ugbo labọ iya sụ iya: 21“Kfuru Zerúbabelu bụ ọ-chị-ọha, l'achị alị Juda lẹ mu bya l'anma igweli yẹle mgboko yikayika. 22Mu akwatsushia ndu bụ eze l'oshi-eze whẹ. Mu emebyishia ike ndu bụ eze, l'achị mba gẹ mba ha. Mu akwatsushia ụgbo-ịnya yẹle ndu l'agba iya agba. Ịnya yẹle ndu l'agba iya agba l'a-da ndatẹwo, onyenọnu egude ogu-ịgba gbugbua ibe iya.” 23“O -rwua mbọku ono, o noo iwhe Onye-Nwe-Ọha bụ Onye-ishi-igwe-ọgu l'ekfu, mu eduta gụbe Zerúbabelu bụ onye ozhi mu, mbụ gụbe nwa Sheyalutiyẹlu, o noo iwhe Onye-Nwe-Ọha l'ekfu. Mu l'e-me ghu t'ị dụ g'ọo echi-ọhubama, mu gba l'ẹka nkele mu họtawaru ghu.” O noo iwhe Onye-Nwe-Ọha bụ Onye-ishi-igwe-ọgu l'ekfu ndono.
Currently Selected:
Hágayi 2: Ezaa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
