Zéfanaya 3
3
Gẹ l'ọo-dụru Jerúsalẹmu lẹ mgbe l'iwhu
1Nshọbukwa mkpụkpu ono, kwefuru ike, mbụ mkpụkpu, mmerwu dụ l'ẹhu bụru mkpụkpu, l'eme madzụ mmegbu! 2Ọ tọ dụdu onye l'ọonujeru okfu, t'o kweje nata ụzo a kpọ-zhiru iya. Ọ tọ dakobejedu Onye-Nwe-Ọha, tọ kpakụbe Chileke ntse. 3Ndu ishi, l'achị iya nụ bụkotakwa oduu, l'aba hanyị-hanyị. Ndu ọgbo-ikpe, l'achị lẹ mkpụkpu ono bụkotaru ágụ́, l'akpa l'abalị, l'adụa iwhe l'ọohaje tẹ chi sakfu. 4Ndu nkfuchiru Chileke, nọ iya nụ bụkota ọdu-ọwhu-ọheru-ụkwa, bya abụru ọghele. Ndu l'agbajẹ ẹja nụ Chileke l'ime iya bẹ merwushiwaru iwhe dụ nsọ, whẹ bụru ọmarụ-iwu-aada-iwu whẹ. 5Onye-Nwe-Ọha, bụ onye dụ chịriri nọkwa l'ime mkpụkpu ono. O to mejedu iwhe l'adụa ree. L'ụtsu g'ụtsu ha bẹ l'oo-goshije lẹ ya bụ onye ikpe iya kfụru nhamụnha. Ọ tọ dụdu chi-asahu, ọ nahụjeru iya. Ọle ndu l'adụa chịriri ta amajẹdu iwhe bụ iwhere ọgvu l'iwhu.
6“Mu mewaru tẹ mba gẹ mba ha chihu. Eze ụlo-mgbochi whẹ bẹ bụkotawaa mkpọkoro ụlo. Echi-ụzo whẹ bẹ mu meekwaru o chihukota nke ọwhu bụ l'ọ tọ dụhedu onye l'aghajẹkwadu iya. Mkpụkpu whẹ l'owhu bẹ ẹgbara kfụwaru, ọ bụru ẹka madzụ l'ebuhee ebu, mbụ l'ọ tọ dụdu onye bu iya nụ. 7Mu gbekwanu sụ lẹ mkpụkpu ono tsụfutaje mu egvu, mbụ l'ọo-nabata ahụhu, a hụru iya. Nke ọwhu ẹka whẹ bu l'ẹte abụru ẹka e mebyishiru emebyishi shi nno nụa whẹ awhụ. Obenu l'iwhe l'anọje enwuka whẹ l'obu bụ ome mkparwụ l'iwhe lile, whẹ l'eme ememe”.
8Onye-Nwe-Ọha l'ekfu sụ: “Unu nmẹe anmẹe ngabẹru mu jeye mbọku mu l'e-zhilihu bya agbaa unu ẹka-ebe, iwhe unu meru. Iwhe mu kpeburu bụ lẹ mu l'a-chịkobe mba gẹ mba ha l'ẹka lanụ, rwukobe alị-eze dụ iche iche l'ẹka lanụ, wụ-kpushi whẹ oghu-damụdamu mu l'ẹhu, woru okpomọku nke ẹhu eghughu mu g'ọ ha byabẹ whẹ l'ẹhu. Nkele mgboko l'owhu bẹ bụ ọku, shi l'okowhoo oke ẹhu-eghughu mu l'e-repyashi iya.
9“Nteke ono bẹ mu l'a-gbanwe olu-okfu ndiwhe t'o gua egugu, nke ọwhu whẹ l'a-tụko akpọ-ku ẹwha Onye-Nwe-Ọha, gude obu lanụ abarụ iya ẹja. 10Ee-shije l'azụ ẹnyimu Itiyópiya egwo iwhe abya mu anụnu, mbụ ndu ono, l'anọje ekfu anụ mu, bụ ndibe mu ono a chịkashiru nnanụ nnanụ. 11O -rwua mbọku ono bẹ l'eete emedu ghu iwhe-iwhere lẹ nke iwhe ono, i meru gude kwefuru Onye-Nwe-Ọha ike. O noo nkele nteke ono bẹ mu l'e-wofu ndu ono, gude ekuku ete ẹswa l'ime unu. Unu ekubuhu onwunu eku l'ugvu mu ono dụ nsọ. 12Ẹgube ndu mu l'a-ha l'ime unu bụ ndu wozetaru onwowhe alị mẹe ndu dụ agu, mbụ ndu ono gbabaru l'ime Onye-Nwe-Ọha je anọdu ezeru ndzụ. 13Ndu whọduru nụ lẹ Ízurẹlu bẹ l'ete emehedu iwhe l'adụa ree ọdo. Whẹ ta abya l'a-dzụ ejire ọdo, t'a bya l'a-whụ whẹ ụgho l'ọnu ọdo. Whẹ l'e-rije nri zẹe pyakọo onwowhe, ọ tọ dụdu onye bya l'e-ye whẹ egvu.”
Egvu ẹhu-ụtso
14Gụa egvu ẹhu-ụtso gụbe nwada Záyọnu!
Gụbe Ízurẹlu tụa ụzu ẹhu-ụtso!
T'ẹhu tsọo ghu ụtso, gude obu ghu g'ọ ha tee ẹswa,
gụbe nwada Jerúsalẹmu.
15Ikpe ono, shi nmaa unu bẹ
Onye-Nwe-Ọha tukofuwaru unu l'ẹhu.
Ọ chị-whuwaru ndu ọhogu unu azụ.
Onye-Nwe-Ọha bụ eze l'ẹka gụbe Ízurẹlu nọ,
ọ tọ dụdu ejo-iwhe, egvu iya bya l'a-tsụbaa ghu ọdo.
16Oorwuwaa mbọku, l'aa-sụ Jerúsalẹmu:
“Gụbe Záyọnu, t'egvu ba atsụkwa ghu.
Be ekwekwa t'ẹka kụda ghu.
17Onye-Nwe-Ọha, bụ Chileke
unu bẹ nọkwa l'echilabọ unu.
Ọ bụ onye ojọgu, sụru gẹ l'ọo-dụ ike dzọta unu.
Oo-te ẹswa nweru obu ụtso l'ẹhu unu.
Oo-gude n-yemobu mee t'ẹhu jia unu dẹe.
Oo-gude egvu ẹhu-ụtso tee ẹswa l'iswi ẹhu unu.”
18“Mbọku, e doberu ọnu ori-oge;
bẹ mụbe Onye-Nwe-Ọha l'e-wofuru unu ẹhu-ụwhu,
mu ekofu unu ejo iwhe-iwhere l'ẹhu.
19Sụa, nteke ono bẹ mu l'a-kẹe
ndu l'akpa unu ẹhu ọrwu l'ẹhu,
mu adzọfuta ndu darụ ngvụru.
Mu l'a-chịkobe ndu ono, shi kpawhuhu akpawhuhu,
mee tẹ whẹ bụru ndu l'aaja ama,
mẹe ndu a marụ ẹwha whẹ,
l'iwhe bụ alị ono, e shi eme whẹ iwhe iwhere ono.
20Nteke ono bẹ mu l'e-kulatawhu unu azụ l'ibe unu.
Nteke ono bẹ mu l'a-chịkobe unu l'ẹka lanụ.
Mu l'e-me t'unu nweru ẹwha nweru ajaja
l'echilabọ ndu mgboko l'owhu
nteke ono, mu l'e-dobewhu unu azụ l'ọnodu unu.
Mu l'e-me iya, ya agbaa unu l'iwhu.”
O nokwa iwhe Onye-Nwe-Ọha l'ekfu ndono.
Currently Selected:
Zéfanaya 3: Ezaa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
