Mika 4
4
Segwɔm Dagwi Darwey e Siyɔn
(Yɛsh 2:1-4)
1Jeng yɛnɛ mo ye kyè vey,
raku de ba lɔk ɛ̀ Gbɔng Duk Re Fongôl Dagwi Darwey
wô sè gak, wô dal bwang o mwa e rak o,
wô nusu kyɛrɛng e ra bwang berahwol mwa.
Yére bemat jey mwa yê dɔng vɔk ɛ.
2Ko yére bemat jey yê vey ko yê ye:
“Tik na wot a tút vɔk e rakû Dagwi Darwey,
vɔk e Gbɔng Duk Re Fongôl Dagwî Israyɛl,
na yɛ a basa a wot begwong mɛ,
na wot a bin kyè e ji vɛ.”
Yaga Badu bé yi e Siyɔn,
ko hâ Dagwi Darwey yi e Yɛrusalɛm.
3Ê gas shɔt e tê yére bemat jey pyak,
ko ê tabak yére bemat yê gap, yê yikyik,
Yɛ̂n ê hashe bewal mɛn be turu mɛ ròn
ko bebara mɛn be turu mɛ bebǎ bwal.
Yere bemat jey yê sang to wɔ̂ como na bemɛn wɛt,
bê sang to masa râ como wɛt.
4Ko kawɛ e ji mɛn ê sangal e nɛ̂n batîn anap mɛ na e nɛ̂n batîn regwi mɛ,
ko vit a mwat de ê nɔ́ng ɛn bengyip.
Yaga Dagwi Darwey, Da Jey Mwa a ha ano.
5Yaga mwa yére bemat ye kyè,
kayɛ̄ mo ye raa cī yɛ̄,
ko wot ê kyè, wot ê raa Dagwi Darwey,
Dagwi mot nesheneshey.
Dagwi ê toyo na vê sesam
6Dagwi Darwey a ye,
“E jeng o, mê tula vemo de be yɔmɔng,
na me jama vemo de ba ga kyě ró ɛn e jey,
na vemo de ma tak a yɛn reyɔm.
7Vê yɔmɔng mê tɛ̀ ɛn be sè bwang vemo de ba dal,
ko vemo de ba ró ɛn e jey, bê tɛ̀ ɛn yere bemat jey ye gap,
ko Dagwi Darwey ê re negwɔm e ra yɛn e Raku Siyɔn
yi e remo vɔk e neshey gbak-gbak.
8Ko hwo, à Yɛrusalɛm, sede tyɔ̌n bɛrɛng tyīmit,
rahwôl lɔ gwɔ̀m Siyɔn,
bê to toyo a hwo na negwɔm mo ne raane,
na retô lɔ gwɔ̀m Yɛrusalɛm.
9Yaga sɛ́ de yin e tosho a remo ɛ?
Yin a vɔk gwɔ̀m wɛt a?
Mwât vos a yin badu a ga wey,
de yin e ririm na nepep sede hwā de ê tɔ a?
10À yin bemât Siyɔn, yin ê tsip in ko yin ê rus,
sede hwā de jîm tɔ ya kaba hɛ.
Yaga a remo yin ê nusu yi e gbɔng repomo mo,
na yin a ye ngyɔk e hey.
Yin ê wɔ e Babilɔn.
E hwomo bê sey ɛ̀ hin,
e hwomo Dagwi Darwey ê viri hin yi e vɔ vê repugu min.
11A remo yére bemat jey pyak
ya ga tula hɛ e ra yin,
Ye tē, ‘Tik na wot tɛ̀ ɛ ligis,
ko tik na wot a tɛ̀ bayis mot e ra Siyɔn.’
12Ko yɛn a tɔk barê yêy Dagwi Darwey wɛt,
yɛn a tɔk pyɛ de a ga yong wɛt,
a ga tula hɛn sede bakus e gazu.
13Sogo hin na yin a dak pyɛ́ mo,
à yin bemât Siyɔn.
Yaga mê tɛ̀ ngwɛngɛ mo gwo sè dyam,
ko bekwǒk bol mo be sè dyam pama,
hwô dak yére bemat jey pyak cɛk o cɛk o,
ko hwô tik pyɛ̂ jugu mɛn jaram yaga Dagwi Darwey,
pyɛ̂ nedanerey mɛn yaga Darwey wo jey mwa.”
Currently Selected:
Mika 4: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
