Mika 3
3
Bemât nuyel be gas badu e tē
1Ko ma ye:
Wet in betong, à yin bemât nuyêl Yakɔp
na begwɔ̀m lɔ Israyɛl!
A sé naka na yin a tɔk gâs badu e tē wɛt a?
2Yin e kyɛ́ in pyɛ́ ryat,
na yin tɛ̀ yey na vyes o.
Yin e wɔnɔ bemat hom beken,
yin hama banama mo yi e bekup o,
3yin re banama mo,
yin paa bahwo mo,
yin kwɔrɔs bekup o cɛk o cɛk o,
ko yin re vɛ̄ sede nama e rwey,
sede nama e rwêy leng.
4Ano yɛn ê tosho a Dagwi Darwey,
ko ê toyo a yɛn wɛt,
ê lɛrɛ bayis mɛ yi na yɛn e jeng o,
yaga pyɛ́ vyes de yɛn a ra.
Ha e ra bezarap bɔs
5Dagwi Darwey a ha e ra bezarap,
de be tɛ̀ bemat mɛ be ye rɛng,
vemo de be dopse mok “Netyang”
jeng de bé nɔng ɛn pyɛ́ de bê re,
ko como e ra vemo de be tɛ̀ a yɛn pyɛ e nu wɛt.
6Yaga ano ê sè a yin turuk sana negwi-ywey,
mwangalang sana bemât bɛrɛng.
Gwi gwô gaba a bezarap,
ko nagwi nê sè gyibilik e ra yɛn.
7Bemât bɛrɛng bê tɛ́ ɛn pyɛ byɛs,
ko vê vyoshon bê tɛ̀ a yɛn rekyen,
mwa hɛn bê bangas nenu mɛn na vɔ
yaga Dagwi a ga toyo a yɛn na pyɛ wɛt.
8Ko me à, ba ga sila me na reto,
na gabîk Dagwi Darwey,
na gâs badu e tē tanga gap,
na me dura a Yakɔp buru mɛ,
Israyɛl banɛn mɛ.
Há vɔk na begwɔ̀m e ra wey na Siyɔn
9Wet in betong, a yin bemât nuyêl lɔ Yakɔp,
na begwɔ̀m lɔ Israyɛl.
Yin e kyɛ́ in gâs badu e tē,
ko yin e tsip shɔt ryat,
10Yin e lɔk Siyɔn na nemi,
ko Yɛrusalɛm na neves!
11Bemât nuyel be yɛt shɔt na dyâm bâng nu,
bepiris mɛn be basa a bemat e ra byɛ,
bezarap mɛn be ha hâ siitit e ra dyām,
mwa ano be jut zâ Dagwi Darwey, ko be ye,
“Mwin Dagwi Darwey a sé na wot!
Vit a pyɛ de yê mǎ hot.”
12Ano, yaga yin,
bê ba how Siyɔn sede hwiri.
Yɛrusalɛm wô ba tɛ́ ɛ gwɔt fongol,
ko rahwôl Gbɔng Duk Re Fongol wô ba tɛ́ ɛ rehwot.
Currently Selected:
Mika 3: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
