Mika 5
5
1Di wot a ga rɔnɔ Yɛrusalɛm na jwa-pomo,
ko vê repugu ba ga lɔk pyɛ gâng jwa mo,
ba sé rusu gbɔng gwɔ̀m Israyɛl na wɔ́rɔ e rwanang.
Gwɔ̀m yi e repomô Bet-Lɛhɛm
2Dagwi Darwey a ye,
“À Bet-Lɛhɛm Ɛfrata,
hwà sé hwak ji yére shɛl yê Yuda.
Yi na hwo hwak ê nusu á me,
womo de ê re negwɔm e ji Israyɛl,
womo de yerê belɔ mɛ ya sé yi e jeng raane.”
3Ano, Dagwi Darwey ê nára bemat mɛ
sɛ̌ jeng de, hwā de e rus tɔ́ a tɔ hwey o.
E jeng o bwang yere mɛ bê toyo yî sesam
vey na begwa mɛn BeIsrayɛl.
4Jeng de a vey, ê tumal,
na gâp Dagwi Darwey,
ê gyeng bemat mɛ sede lwêk vyēl,
yi na nedyɛt nerêy rezâ Dagwi Darwey, Dagwi mɛ.
Ko yɛn ê sangal tyang,
yaga ê sè gbɔng o vɔk e neyɛnɛ̂ jey.
5Yɛ pyɛ mɛ ê sey ot yi e vê repugu mo!
Ka BeAsirya ba vey e vwel mot
na be tɛ̀ bol mɛn e nelɔ negwɔm mot,
ko wot ê tɛ̀ belek betaama be sogo e ra yɛn,
ey, na begwɔ̀m rwit arɔng.
6Yɛn ê re negwɔm e sevwêl Asirya na wal,
ko e sevwêl Nimrɔt na celes wal.
Yɛn ê sey ɛ hot yi e vɔ BeAsirya
ka sede yɛn a vey e vwel mot,
kɛ yɛn a tɛ̀ bol mɛn e yɛnɛ̂ hɛ.
Pyɛ de bwang BeIsrayɛl bê ra
7Ano bwang BeYakɔp
de yére bemat jey ya gwɔrɔ hɛn,
bê sè sede mwɛngɛ yi na Dagwi Darwey,
sede nerwak e ra sɔng,
de ne yi na bemat
kɛ ne gyeng mwasi wɛt.
8Ano bwang BeYakɔp
de yére bemat jey ya gwɔrɔ hɛn,
bê sè sede gukum e ji ngyāma e rehwot,
sede bwôt gukum e ji kwarâ tyīmit,
womo de e kwey e tê yɛ, ko e fɔnɔt yɛ,
e hama yɛ cɛk o cɛk o, vit a mwât sêy yɛ.
9Ano hwô dal vê kyɛ́ ɛn hwo na gap,
ko mwa vê repugu mo bê wey.
10Dagwi Darwey a ye:
E jeng o mê sey ɛ bedwa min yi na yin,
ko mê wey na bekyɛkyɛ̂ bedwa min.
11Mê wey na bapomô vwel min,
ko mê gangas mwa nekwɔn dal min.
12Mê wey na negarap yi e vwel min,
ko yin ê to vɔk bevwoshon wɛt.
13Mê wey na cī min
na beta gacik de yin e sap yɛ,
ko yin ê to tē ngyuk
kɛ yin re a pyɛ́ de yin a yong na vɔ min fongol wɛt.
14Mê luyu sesêk Ashera yi e tē min
ko me wey na bapomo min.
15E ji shom na lashê yey hom,
mê tala yére bemat jey pyɔlɔ̂ negbarak mɛn.
Currently Selected:
Mika 5: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
