Mika 2
2
Nevês tak a bepɛng
1Gawey e ra vê yông neves,
na tomong ves e dyɛngɛ e gat mɛn!
Ras de gasi ha ye gbey, yɛn e ra pyɛ de ba yong o,
a remo de yɛn a vɔk retô rá ano.
2Bé mara yis e ra hiri, ko be sey ɛ̀ vɛ na retek,
ko nelɔ, ko be sey ɛ̀ nɛ,
be tak a dâ lɔ mó, mwa na lɔ mó,
bemat o, na pyɛ̂ nedanelɔ mɛn.
3Ano Dagwi Darwey a ye:
Di, ma yong neves e ra lɔ mo,
yin ê tɔk pat to min yi e nɛ wɛt.
Ko yin ê to kyě dak kaa wɛt,
yaga jeng o yê sè vyes.
4E jeng o bê lɛ̄lɛ hin,
bê dak sekun na râ sesin sizɔng.
Bê tē: Ba ga wey na wot hywiri,
Dagwi Darwey a ga jut benap bemat hom.
Di de a ga sey ɛ̀ vɛ e me!
A ga gas a vemo de ba tɛ̀ ot e sesam, benap mot o!
5Yaga ano, yin ê vɔk mwat de ê gas a yin benap o wɛt,
jeng de bemât Dagwi Darwey be masa na sesek,
yɛn e shara yɛgɛt yemo, be tē:
6“Yin kwon shara yɛgɛt vyes wɛt.”
“Hwak a kwon shara pyɛ́ yemo wɛt,
gawey hê hwo e ra wot wɛt.”
7A sé naka na lɔ Yakɔp he ha ano a?
Gabîk Dagwi Darwey ha ga tala hɛ a?
E gwông râ fwom mɛ à gwomo a?
Neha hom na sè nerat e ra vê cik wɛt a?
8Ko e yin de yin e ra repugu na bemat hom,
yin e paa yɔ̀m bemât sangal tyang,
yi e vemo de be kweres sana sap,
sana bare na como.
9Behâ bemat hom, yin e ro vɛ e jey
yi e nelɔ mɛn nerat o,
yi na nèy mɛn nesɛl o
yin e seres ɛ gbɔng nerat hom nesheneshey.
10Sogo hin na yin a kyè,
kwɔ̂n pɔngɔ à hemo wɛt
yaga pyɛ̂ byɛm-byɛm de be ragas
de yê wey na hɛ vit.
11Ma tɔk yerê zarap de yin e simo,
wò hâ neha zɔng-reng ne bɔs,
de e tē, “Mê shara a yin hâ
nshî anap na siring!”
Vonu vɔk na bwang BeIsrayɛl
12Mwin, mê tula mwa hin vê Yakɔp,
mê tula bwang vê Israyɛl.
Mê tik ɛn e dem hining
sede tyīmit e kwara,
sede vyēl e kwɔ̂n sehwey rat,
kwɔn o hê to sila na bemat.
13Mwât nuyel mɛn ê pat ɛn yi e sesam
ko a kyè e nuyel mɛn,
bwang o gwô tā e jey e ruhup ko gwo hywit ɛ,
gbɔng gwɔ̀m mɛn ê kwey e nuyel mɛn,
ko Dagwi Darwey ê sè e nuyel mɛn.
Currently Selected:
Mika 2: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
