Mika 1
1
1Ha de Dagwi Darwey a nɔ̂ng Mika wo repomô Moreshet a hemo, jeng de Yotam, na Ahas tanga Hɛzɛkiya bá sè begbɔng begwɔ̀m Yuda. Dagwi Darwey a dura a Mika mwa pyɛ́ yemo e ra Samariya na Yɛrusalɛm.
Gawey e ra Samariya
2Wok in, à yin yére bemat jey!
Wet in betong, yin mwa vê sangal e jey!
Darwey Dagwi Darwey ê nɔng nuha e ra yin.
Darwey, yi e Gbɔng Duk Re Fongol mɛ wo jɛrɛ.
3Di in, Dagwi Darwey a sé kyè vey yi e kwɔn mɛ,
ê gyirik na a bɔrɔs e ra nekwɔn garang ne jey.
4Ko beraku bê ye ywey e nɛn mɛ,
ko benɛk bê wuma hɛn
sede negang bagat na kya,
sede nshi de ne tele e dem sɛndɛng.
5Mwa yê té yaga burû Yakɔp,
na yaga banɛ̂n lɔ Israyɛl.
Burû negwɔm Israyɛl à sɛ́ ɛ?
Ha sé sogô nehywɛ Samariya gbɔng repomo mɛ wɛt a?
Ko nekwɔn sekwît negwɔm Yuda à sɛ́ ɛ?
Na sé e Yɛrusalɛm gbɔng repomo mɛ wɛt a?
6Yaga ano mê tɛ̀ Samariya wo tɛ́ ɛ gwɔ̂t barin e tê-dyɛng,
kwɔ̂n tûs bě anap.
Mê lusha beta nelɔ mo e nɛk,
ko bê hala batîs nelɔ mo ngwɛnjɛng.
7Bê bunut mwa cī de yɛn a yong.
Kya hê re mwa pyɛ́ de ba tala mɛ nedeneves mɛn,
mwa cī mɛn yê wey ɛ.
Yaga ya yi e pyɔlɔ̂ nedeneves,
ko bê to ra fwom na yɛ yaga nedeneves.
Gawey e ra bapomô Yuda
8Mika a ye:
À sé yaga ano de me ra sesin, me dak sekun,
me kyè na bol hal, kpimit arɔng.
Mê tosho sede nevu-hey,
mê kùnus sede bengyuwa.
9Yaga barâm Samariya bê tɔk vel wɛt,
ko ba ga ra Yuda arɔng.
Ba ga wul ruhûp bemat hom,
ba ga wul Yɛrusalɛm.
10Yin kwon ha há mo e Gat wo vê repugu mot wɛt,
yin kwon tosho ko tyɔng wɛt e Bet-Lɛyafara.
Bíring hin e fongol zɔng!
11Kwey in vɔk e de sesam,
à yin bemât Shafir,
kpimit na rekyen.
À yin bemât Zaanan,
yin kwon nusu wɛt.
Bemât Bet-Ɛzɛl ba sê sesin,
bê to sɛlɛ hin wɛt.
12Bemât Marat ba sé gyeng wôk yɛgɛt yat tyɔng wɛt,
yaga gawey ha ga hwo yi na Dagwi Darwey,
vɔk e ruhûp Yɛrusalɛm.
13Rɔgɔs hin bekyɛkyɛ na bedwa mó,
à yin bemât Lakish.
E yin de yin a masa banɛ̂n BeIsrayɛl,
ko yin a vey na vɛ e Siyɔn.
14Yaga ano tɛ̀ in Moreshet-Gat e gwong na nɔrɔ,
Nelɔ Akzip nê sè pyɛ kwɛlɛng na begbɔng begwɔ̀m Israyɛl.
15Dagwi Darwey ê vey na bemât jugu e ra yin, à yin bemât Maresha,
ko gbɔng nerât Israyɛl nê to ɛn e fwarâ Adulam.
16Yɛt in setot min na yin wula bato mó,
yaga nèy de yin a tɛ̀ yey na nɛ.
Bato min bê sè hulhul sede vê jagawey,
yaga nèy o nà ga hala hin vɔk e de sesam.
Currently Selected:
Mika 1: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
