2 Bitrus 3

Darwey Yɛsu a sira, ê ba toyo

1À besâ yey hom, bwok-rwang gwo neba a gwomo de ma sé jɛk a yin. E ji vɛ̀ mwa, ma ye ngyɛ́k na me bare a yin na pyɛ́ yemo, yaga na me tɛ̀ in na yin a vɔk báre yerê hemo de ha sé mwin. 2Me simo na yin a bare na neha de bezarap Dagwi vê jɛrɛ bà kana ha yimo raane. Bàre hin arɔng na redu remo de Darwey Yɛsu Kristi, Mwât Sey ot, á kana nɔng rɛ, rēmo de betom mɛ bá vey a yin mɛ̀. 3E mɛsɛng o, a sé gbing-gbing na yin a tɔk pyɛ yemo ngan: E jeng ye yɛnɛ mo, bemat behak ba rɔda nusu, vemo de cwey pyɛ́ vyes mɛn ya rɔda vɔk reto e ra neyey mɛn. Yɛn a rɔda tabas a yin nengyas, 4ko yɛn a rɔda rangal hin, be ye, “À kana ha wɔgɔ, a rɔda vey, kɛ ano wɛt ɛ? Ko a wɛ̌ arɛt? Beda mot bá kana kushu, ko kayɛ pyɛ ya sé tyɛng sede remo de yà sè yimo de bà yong jey!” 5Yɛn a kyɛ́ ɛn ná nengyas há hemo ngan: Yimo raane, Dagwi à nɔng nu, ko belagwi tanga jey bà pere sè. À yong jey o yi e nshi, ko yà gas ɛ yi na nshi. 6À sè yi na nshi arɔng de à wey na jey ryoso mo e jeng gbɔng tɛmɛ-nshi. 7Dagwi à to nɔng nu wɔgɔ, belagwi tanga jey de ba sɛ́ a remo ba rɔda nàra sɛ̌ jeng de ba rɔda ba wey na vɛ na kya. Ba sé tik vɛ yaga tuk de ba rɔda ba ra a bemat de be raa Dagwi wɛt shɔt, na be wey na yɛn arɔng.

8À besâ yey hom, yin ye bam à pyɛ jining yemo wɛt: E bayîs Dagwi, pɔlɔ hining ha sé detu na neshey gu rining (1,000) wɛt, mwa pyɛ́ bya yemo ya sé tyɛng na yɛ. 9Bemat behak be bare, Dagwi a sé hywɛ e de râ pyɛ́ de à ga kana sira na a ra. A sé ano wɛt, ko e niri na yin, yaga e simo na mwat hwak a wey wɛt, ko e simo na mwa be doyo yi e banɛn mɛn.

10Ko di, jeng de Darwey a rɔda vɛ̄ hɛ ye kyè vey gòbok sede gbik. E jeng o, belagwi ba rɔda ba ye bit na rewɔng sizɔng, ko kya ha rɔda ba re hywiri kayɛ pyɛ de ya sé e ji vɛ; jey arɔng tanga kayɛ pyɛ de ya sé e ji yɛ̄ ya rɔda tɛ́ ɛ vit. 11Sede remo de pyɛ́ yemo mwa ya rɔda ba wey ano, e yerê nɛ̌ negwɔn de na sé naka na yin a vɔk arɛt? Tik na negwɔn min ne sè yerê ne bemat de ba ga tik ɛn jaram yaga Dagwi, na yin a raa hɛ naka arɔng. 12Jeng de yin a sé gyeng tuk de Dagwi a rɔda ba vey, tik na yin a ye ngyɛ́k e de râ pyɛ́ de yê tɛ̀ he vey dey-dey. Jeng a yane de kya ha rɔda ba re belagwi, ha rɔda wey na vɛ hywiri, ko kayɛ pyɛ de ya sé e ji vɛ ya rɔda ye ywey na nevɛ̌t o. 13Ko wot a sé gyeng pyɛ́ de Dagwi à kana sira a wot na a nɔng ot, yɛ̄ à belagwi bepas tanga jey pyas, yɛ̄ à nekwɔn de vit a neves, yaga be ragas pyɛ́ de Dagwi e simo zɔng e hwomo.

14Yaga ano, à besâ yey hom, sede remo de yin a sé gyeng jeng o, tē in ngyɛ́k ding-ding na yin a sè jɛrɛ, sana buru hak e bayis Dagwi, na yin a sangal tyang na yɛ arɔng. 15Bàre hin na gwong de Darwey mot á niri. A sé yi na niri mo de a sé nɔng in gwong na be sey neken min. Gwà yey mot Bulus a jɛk a yin e ra pyɛ jining yemo arɔng yi na netsitsɛng de Dagwi a nɔng ɛ. 16E ji mwa bebok-berang mɛ, a jɛk e gwong gwining jeng de á jɛk e ra pyɛ́ yemo mo. Pyɛ́ cak e ji vɛ ya sé gbang. Ko bemat de ba tɔk pyɛ́ wɛt, vemo de be tɛ̀ neyey mɛn e ra pyɛ jining wɛt, be doyo cap-hâ pyɛ́ mo, tyɛng sede remo de be ra e ra bebak o behak vê Bwok-basa Dagwi. A sé ano de yɛn e hwɔtɔ a bato mɛn pyɛ de ya rɔda wey na yɛn.

17Ko di, à besa yey hom, yin a ga kana tɔk pyɛ́ yemo. Yaga ano, tē in naka, be kwon hwɔlɔ hin, na yin a raa burû bemat de be gyeng badu Dagwi wɛt! Ka ano wɛt, ko yin a rɔda hàla kwɔ̂n tumal min de ha sé gbarak. 18Ko ré in nuyel e de raà Darwey mot Yɛsu Kristi, Mwât Sey ot, yaga na a gwɛ̌ dura a yin nerat mɛ, na yin a gwɛ̌ tɔk ɛ arɔng. Gbɔng nerat na sé nemɛ a remo tanga nesheneshey! Ano.

Currently Selected:

2 Bitrus 3: bomBI

Highlight

Copy

Compare