2 Bitrus 2

Bemât basa vê bɔs

1Yimo raane, bezarap Dagwi vê bɔs bà kana nusu e ji bemat, ko a sé ano arɔng de bemât basa vê bɔs ba rɔda nusu e ji min. Yɛn a rɔda vey na batîn basa vê bɔs de ba rɔda tɛ̀ bemat be wey. Yɛn a rɔda tono na Darwey de a vibis hɛn, ko yi ano, yɛn a rɔda hwɔtɔ a bato mɛn pyɛ de ya rɔda wey na yɛn dey-dey. 2Mwa ano, bemat pyak ba rɔda raa negwɔn gwōt mɛn, ko yi na negwɔn mɛn o, yɛn ê tɛ̀ behak be ha há ves e ra tsak gwông Dagwi. 3Bemât basa vê bɔs vane mo be vɔk gananâng pyɛ́. Yaga ano, yɛn a rɔda kwonɛ̀ há detidetu, na yɛn a sɛ̀ dyām yi na yin. Yimo, Dagwi à kana gang ɛn na shɔt, ko jeng ya ga vey bagat de ba rɔda wey na yɛn!

4A raane, jeng de betom-lagwi bà ragas banɛn, Dagwi à wok nemwishish mɛn wɛt, ko à bomos hɛn e kwɔ̂n gawey. E hwomo, ba tik ɛn e ngyang e kwɔn de ha sé mwangalang e de gyeng Tuk Shɔt. 5À to wok nemwishish bemât jey yê raane arɔng wɛt, ko à vey na gbɔng tɛmɛ-nshi e ra bemat vane de bà raa hɛ wɛt. Ko vemo de à sey ɛn, vɛ à Nowa de à shara a bemat reha wɔgɔ, bē sè cik e bayîs Dagwi, yɛ tanga bemat o behak betaama zɔng. 6Dagwi à gang bemât bapomô Sɔdɔm na Gɔmɔra na shɔt arɔng, ko à wey na bapomo mo na kya. À ra ano, na be sè pyɛ de be dura a bemat mɛ̀ pyɛ de ya rɔda té na vemo de be raa hɛ wɛt. 7À sey Lɔt de à sè mwat rwat de à lashe yey mɛ na negwɔn gwōt ne bemat de bà gyeng badu wɛt. 8Yɛ mwat rwat o mo à sangal e ji mɛn, ko kahɛ tuk yey mɛ yà lɔl sizɔng jeng de à bɛrɛng tomong ves mɛn, na a to wokos neha mɛn arɔng. 9Ano kwong, Darwey a tɔk gwong de a rɔda pat bemat de be raa hɛ naka yi e nemàsa mɛn. A to tɔk gwong de a rɔda tik bemat beves, na a sǎ e de tabak hɛn vɔk e Tuk Shɔt, 10a kat mɛ̀ vemo de be raa cwey pyɛ́ de ya sé gbiridik de babek mɛn be simo, vemo de be byɛs retô bemât nuyel arɔng.

Bemât basa vê bɔs vane mo be tele hɛn pyɛ cak wɛt, ko be vɔk to ven. Yɛn e vɔk bengyip vane de ba vɔk nerey e lagwi wɛt, ko yɛn e ha há ves e ra yɛn. 11Mwa ano de betom-lagwi ba dal ɛn na gap tanga reto, ko yɛn a ka tɛ̀sɛ sekun mɛn, na be ha há ves e ra yɛn e nuyêl Dagwi wɛt. 12Ko bemat o ba sé sede ngyāma de vit a báre e neyey yɛ̄, yēmo de be tɔs yɛ̄, yaga na be vos yɛ̄, na be mɔbɔs zɔng: Yɛn e ha há ves e ra pyɛ́ de yɛn a tɔk yɛ̄ wɛt. Ba rɔda ba wey na yɛn sede ngyāma, 13ko ba rɔda ba tala hɛn na reyɔm, yaga reyɔm de yɛn a tak a bemat. Yɛn e wok netâ ragâs pyɛ́ vyes de babek mɛn be simo, kɛ a ka sé nagwi gbak. Yɛn a sé pyɛ rekyen tanga pyɛ byɛs e ji min. E jeng de be wuna hɛn e de râ pyɛ́ tanga yin, yɛn e kwɛlɛng hin, ko yɛn e vɔk yey pyɛng zɔng e de ra ano. 14Yɛn e tɛ̀ bayis mɛn e ra bedebeves, ko yɛn e tɔk kwɔshɔ cwey râ banɛn mɛn wɛt. Yɛn e hwɔlɔ nehywɛ bemat de be tɔk tumal gak wɛt, ko yɛn e tɔ́k ɛn na gananâng pyɛ́. Yɛn a sé pyɛ sedusa e nuyêl Dagwi! 15Yɛn a ga kana hàla gwong de gwa sé cik, ko yɛn a ga vuru hɛn arɔng. Yɛn a sé raa gwong de Balaam Beyor à kana raa, womo de à tɛ̀ yey na dyām de à sɛ̀ yi na râ neves. 16Ko bà gyong ɛ yaga renɛn mɛ: Madung de wo tɔk ha wɛt wà ha na fwɔ̂ mwasi, wà dul ɛ, yɛ zarap Dagwi, nà ra tomông selolong mɛ.

17Bemat vane mo ba sé sede lel nshi de ba ga hworos, kɛ sede bale de gwogul gwo gangas vɛ zɔng. Ko Dagwi a ga yong kwɔn de ha sé mwangalang sedesi yaga yɛn. 18Yɛn e dak kaa na neha mɛn de vit a nɛ nà retin arɔng. Yɛn e ra fwom na cwey ragâs gwōt de babêk bemat be simo, na be hwɔlɔ nehywɛ vemo de ba sé mɛsɛ̂ng hywit ɛn yi e vɔ bemat de ba sé sangal e ji buru. 19Yɛn e ha a vane mo wɔgɔ, ba rɔda hàla hɛn washak, ko yɛn pyɛ mɛn ba sé besam negwɔn de na rɔda wey na yɛn; yaga mwat a sé sam kayɛ pyɛ de ya ga di wɛng e ra yɛ. 20Bemat o bá tɔk Darwey mot Yɛsu Kristi, Mwât Sey ot, de a tɛ̀ ɛn na be tɛ́ ɛn washak yi e negwɔn neves ne jey yemo. Ko e bama mo, negwɔn neves o na to kaba hɛn, na ne di wɛng e ra yɛn gbak. Yaga ano, neves mɛn nè yɛnɛ mo na dal ne susu mo. 21Ko di, a yâng dal naka, ka yɛn a ka tɔk gwong de mwat e sè cik e bayîs Dagwi wɛt, de yɛn a tɔk gwɛ, na yɛn a de hàla raà redu Dagwi de ba nɔng ɛn. 22Pyɛ de ya té na yɛn ya sé tyɛng na cinat há wɔgɔ, “Vu wo to re pyɛ de wa ga kana hwɔs yɛ”, kɛ wɔgɔ, “Zà de ba ga kus wɛ wó to wɔ̀ biring e bwɔrɔk.”

Currently Selected:

2 Bitrus 2: bomBI

Highlight

Copy

Compare