1 SAMUEL 4
4
Moingetap arorutyetap Kamuktaindet ne Toroor
1Ki ityi ng'olyootap `Samuel Israel tugul. Ki manda Israel anyun koba kobargei ak Philistiik. Ki teech Yahudik emainnywa eng' ole neegitee Eben-haezer, koteech Philistiik nenywa eng' Apek. 2Ki tetkei Philistiik si kobargei ak Israel. Ye kingo tuiyo lugeet, ko ki iterteer `Philistiik Israel. Ki par piigap lugeet che po Israel olo po eliphuusyek ang'wan eng' koronooto. 3Ye kingo it piigap lugeetap Israel nganaseet, koteep poisyegap Israel kole, “Amu nee si kobarech Kamuktaindet ne Toroor rani eng' taitap Philistiik? Ongeibu moingetap arorutyetap Kamuktaindet ne Toroor eng' Shiloh konyo kwenunnyo si kosarwech eng' eunegap puunikyok.” 4#Kom 25.22 Ki kiyookto anyun piik koba Shiloh, ak ki ip eng' yooto moingetap arorutyetap Kamuktaindet ne Toroor ne po lugoosyek ne tebee kerubisyek. Ki imi yooto anyun Hopni ak Phineas, weeriichooto aeng'u po Eli kobooto moingetap arorutyetap Kamuktaindet.
5Ye kingo it moingetap arorutyetap Kamuktaindet ne Toroor nganaseet, kowaach Israel tugul eng' waagaat ne oo kot kochei emet. 6Kingo kas Philistiik polatetap waagaat, koteebegei koleenjigei, “Ngu po nee waagaandani oo eng' nganaseetap Yahudik?” Kingo nai Philistiik kole kagoit moingetap Kamuktaindet ne Toroor nganaseet, 7koywei amu ki le, “Kanyo kamuktaindet nganaseet.” Kotestai kole, “Pwo eng' acheek! Amu tomo kobiitu kiit ne uu ni kobooch keny. 8Pwo acheek! Ng'oo ne sarwech eng' kamuktaichu kiimeen? Chu ko kamuktaik cho ki parei Misiriik koboree korotwo alak tugul eng' surkwen. 9Ogimegitu ak oegu murenik, ee okweek Philistiik si moegu otwogigap Yahudik ko uu ye ki otwogikwok icheek. Onyiganiitu ko uu muren anyun ak oyai lugeet.”
10Ki yai Philistiik lugeet ak koterteer Israel, ak ki mwei chii age tugul komwechi emainnyi. Ki piit pareet ne oo miising' amu ki pek kiplugotiniigap Israel eliphuusyek sosomu che punei keelyek. 11Ki kiip moingetap Kamuktaindet ak kebar Hopni ak Phineas, weeriichooto aeng' po Eli.
Meetap Eli
12Ki labat chii ne po ooreetap Benjamin eng' ole kimi lugeet peetuunooto agoi Shiloh ko kagogereer ngoroikyik ak komi ng'ung'unyek metinnyi. 13Ye kingo it, ko ki tebee `Eli ng'echerennyi eng' tabandap ooreet koriipsei, amu kibotani muguleldanyi agobo moingetap Kamuktaindet. Kingo it chiichooto nganaseet ak komwa ng'aleechooto, kowaach nganaseet tugul. 14Kingo kas `Eli polatetap riirek koteep kole, “Po nee polatoni wasegei piik?” Ki wo chiichooto kochaakta ak komwachi Eli. 15Ki po Eli kenyiisyek tamanwogik sogool ak sisiit, ak kiga kogor ne ki mata komuuchi kogeer kiy. 16Ki mwachi `chiichooto Eli koleenji, “Aa ineendet ne kabunu ole mi lugeet; kaamweu eng' ole mi lugeet.” Koteepse anyun Eli koleenji, “Kalya o, weeriinnyu?” 17Kowol ineendet ne ki ibu ng'aleek kole, “Kagomwei Israel eng' taitap Philistiik ak kagobiit pareet ne oo eng' piik. Kagobek ak icheek weeriiguk tuwai, Hopni ak Phineas, ak kageip moingetap Kamuktaindet.”
18Kingo mwa agobo moingetap Kamuktaindet, koobut Eli kobun patai eng' ng'echerennyi eng' tabandap ormariichet. Ki ng'et kaatinnyi ak kome, amu ki chii ne kiga koosit ak konyigiis kot. Kiga koek kirwoogindetap Israel kenyiisyek artam.
Meetap Osotyotap Phineas
19Ki tomono osotyotap Phineas weeriitap Eli ak ki neegit kosigiis. Ye kingo kas ng'aleek keele kageip moingetap Kamuktaindet, ak kagome kwandap manong'otyondennyi kobooto manong'otyondennyi, konyoonji ineendet ng'wanindap sigisyo. Ki ing'uruuk anyun si kosigiis amu ki nyoonji ng'wanindap sigisyo ne oo. 20Ye ki neegit kome, komwachi kwonyiik che kitoreti ineendet koleenji, “Meiywei, amu kesich weeriit.” Ago ma wol kiy anan koepchi iit ng'aleechooto. 21Kiguure lakwanooto Ikabod koboor kole kagoistogei toroornatet eng' Israel, amu kageip moingetap Kamuktaindet, ak amu meetap kwandap manong'otyondennyi ak ne po manong'otyondennyi. 22Ki mwa kole, “Kagoistogei toroornatet eng' Israel; amu kageip moingetap Kamuktaindet.”
Currently Selected:
1 SAMUEL 4: KALDC
Highlight
Share
Copy
Want to have your highlights saved across all your devices? Sign up or sign in
Kalenjin Revised Bible Catholic Edition © Bible Society of Kenya, 2015.
