1 SAMUEL 3
3
Keguurei Samuel
1Ki poisyechin lakwanooto `Samuel Kamuktaindet ne Toroor eng' taitap Eli. Ki ma kota kegasei ng'olyootap Kamuktaindet ne Toroor eng' peetuusyechooto, ak ki ma komi ng'ang'utyet ne taagu. 2Ye kingo ru Eli peetuut age eng' oldanyi, kigatoi kogoryo konyekyik ak ki ma kogeerei kiy, 3ye kitom kome tait ne po Kamuktaindet, ak ko kagoru Samuel eng' hekaluutap Kamuktaindet ne Toroor eng' ole ki mi moingetap Kamuktaindet, 4koguur `Kamuktaindet ne Toroor Samuel, ak ki le, “Ami yu.” 5Ak kilabat ole mi Eli ak koleenji, “Ami yu, amu keguura.” Koleenji Eli, “Ma aguurin, ui ru.” Ak ki wo koru.
6Ki kuur `Kamuktaindet ne Toroor kogeny kole, “Samuel!” Ki ng'eet Samuel kogeny ak kwo ole mi Eli, koleenji, “Ami yu amu keguura.” Ki wolji Eli koleenji, “Ma aguurin, weeriinnyu, weegen, ui ru.” 7Kitom konai `Samuel Kamuktaindet ne Toroor ak kitom keng'aang'ji ineendet ng'olyootap Kamuktaindet ne Toroor. 8Ki kuur `Kamuktaindet ne Toroor Samuel kogeny ne po somok. Ak king'eet kwo ole mi Eli ak koleenji, “Ami yu amu keguura.” Eng' yooto anyun, konai Eli kole kaguur Kamuktaindet ne Toroor lakwanooto. 9Koleenji anyun `Eli Samuel, “Ui iru, ak ngot koguurin kogeny, imwa ile, ‘Ng'alaal Kamuktaindet ne Toroor, amu ebei iit otwogindeng'ung'.’ ” Kwo anyun Samuel koru eng' oldanyi.
10Ki nyo `Kamuktaindet ne Toroor ak kotonon, koguur ko uu tai, kole, “Samuel! Samuel!” Ak ki wol Samuel kole, “Ng'alaal amu ebei iit otwogindeng'ung'.” 11Koleenji `Kamuktaindet ne Toroor Samuel, “Ayae kiit eng' Israel ne tang'anyee chii age tugul ne kasei. 12Eng' peetuunooto ayachini Eli tuguuk tugul che ki amwa agobo koonnyi, kobooch taunet agoi let. 13Ki amwachi aleenji arwookyini koonnyi koigeny amu tengekto ne ki ingen amu ki ipchigei `weeriikyik chubisyet ama kergong'. 14Nooto anyun ki ayosye agobo kootap Eli ale, ma kitisei tengektap kootap Eli eng' tiseiywot anan ko eng' kagoochinoik agoi.”
15Ki ru anyun Samuel agoi koeech, yeityo koyaat kurgotigap kootap Kamuktaindet ne Toroor. Ki iywei Samuel koboorchi Eli ng'ang'utyonooto. 16Ki kuur `Eli Samuel ak koleenji, “Weeriinnyu Samuel.” Ak ki le, “Ami yu.” 17Ak kiteepsee Eli kole, “Nee kiit ne komwaun Kamuktaindet ne Toroor? Asoomin ale ameung'ena ng'olyoondonooto. Ingoyaun Kamuktaindet ak ngo yaun ne siirei nooto, ngot iung'ena kiy age tugul eng' tuguuk tugul che komwaun ineendet.” 18Ki mwachi anyun Samuel kiy age tugul, ak ma ung'e kiy ineendet. Ak ki le Eli, “Ineendet ko Kamuktaindet ne Toroor, ingoyai ko uu ye keerei kole myee.”
19Ki eet Samuel ak ki mi Kamuktaindet ne Toroor kobooto ineendet, ak ki ma komi kiy eng' ng'aleek che kiga komwa Samuel ne ma isulda. 20Kobooch Dan agoi Beer-sheba ko ki nai Israel tugul kole Samuel iman ko maotyotap Kamuktaindet ne Toroor.
21Ak ki testai koboorgei Kamuktaindet ne Toroor eng' Shiloh: king'aang'jigei `Kamuktaindet ne Toroor Samuel eng' Shiloh kobun ng'olyootap Kamuktaindet ne Toroor.
Currently Selected:
1 SAMUEL 3: KALDC
Highlight
Share
Copy
Want to have your highlights saved across all your devices? Sign up or sign in
Kalenjin Revised Bible Catholic Edition © Bible Society of Kenya, 2015.
