1 SAMUEL 5
5
Komi moinget Ashdod ak Ekron
1Kingo luul Philistiik moingetap Kamuktaindet, koip eng' Eben-haezer kwo Ashdod. 2Ki ip Philistiik moingonooto po Kamuktaindet ak konde kootap Dagon, ole neegitee Dagon. 3Ye kingo ng'eetyo piigap Ashdod karon miising' eng' peetuutap aeng' ko kiga koluul Dagon kosyep moo eng' taitap moingetap Kamuktaindet ne Toroor. Ki ing'eet Dagon ak konde komostanyi kogeny. 4Ago ye kingo ng'eetyo karon miising' eng' peetuutap somok, ko kogoluul Dagon kogeny kosyep moo eng' taitap moingetap Kamuktaindet ne Toroor. Kiga kong'et metitap Dagon kobooto eunekyik tuwai, ak ki ruei eng' kurgat. Ki ng'eet ineegei poorto komugul. 5Nooto anyun amu nee si agoi ra ko matyechei kurgeetap Dagon eng' Ashdod tisiigap Dagon ak tugul che chutei hekaluutap Dagon.
6Kinyigiisyi `eutap Kamuktaindet ne Toroor piigap Ashdod ak kogoochi icheek koaragenso ak kobire myando ne ibwansei Ashdod komugul ak kiwotosyekyik. 7Kingo keer piigap Ashdod tuguuk che ki yaagiis, kole, “Ma kotebyei moingetap Kamuktaindetap Israel kobootech amu kagong'wanit eunnyi eng' acheek ak eng' Dagon kamuktaindennyo.” 8Ki iyookto che kiyooktoi kole kiyum kiptainik tugul che po Philistiik kobwa ole mi icheek ak koleenji, “Kilyonjini moingetap Kamuktaindetap Israel?” Kowol kole, “Ngeip moingetap Kamuktaindetap Israel kot koit Gath.” Ki ip anyun moingetap Kamuktaindetap Israel. 9Ago ye kingo kagoip, konyaliil `Kamuktaindet ne Toroor nganasanooto eng' kanyaliilet ne oo miising'. Ki pir piik che mengech ak che eecheen che po nganaseet ak ki mang'une icheek myando ne ibwansei. 10Ki iyookto moingetap Kamuktaindet kwo Ekron. Kingo it moingetap Kamuktaindet Ekron, kowaach Ekronik kole, “Kagoibwech moingetap Kamuktaindetap Israel konyo kobarech ak piikyok.” 11Ki iyookto ak icheek che kiyooktoi ak koyum kiptainik tugul che po Philistiik kotuiyo ak kole, “Oiste moingetap Kamuktaindetap Israel kwo si ma parech ak piikyok.” Amu ki piit kanyaliilet ne po meet eng' nganaseet komugul ak konyigiisyi miising' eutap Kamuktaindet olooto. 12Piik che ma pek ko ki kibiree myando ne ibwansei; kitogosta kipsengwet riiregap nganaseet.
Currently Selected:
1 SAMUEL 5: KALDC
Highlight
Share
Copy
Want to have your highlights saved across all your devices? Sign up or sign in
Kalenjin Revised Bible Catholic Edition © Bible Society of Kenya, 2015.
