1 SAMUEL 14
14
Koterteeri `Jonathan Philistiik
1Eng' peetuut age, koleenji `Jonathan weeriitap Saulo muren age ne ki cham koipchin kariikyik, “Nyoo keebe kelande ole mi lugeetap Philistiik.” Ago ki ma mwachi Jonathan kwandanyi. 2Ki tebee Saulo tabandap Gibea eng' keetit keel ne po logoek ne mi Migron. Ki olo po pogol lo murenik che ki mi ak ineendet. 3Ki mi olooto Ahija, weeriitap Ahitub, ng'eetap kametap Ikabod, weeriitap Phineas, weeriitap Eli, tisiindetap Kamuktaindet ne Toroor eng' Shiloh, kolaachi ephod. Ago ki ma nai kiplugotinik kole kakwo Jonathan.
4Ki mi rwandet ne ng'atip komosi, komi age komosin eng' kwenutap kererchosyek che kimachei Jonathan kobun kolanda kwo ole mi lugeetap Philistiik. Kainetap age ko ki Boses ak kainetap age ko ki Sene. 5Kiga tonon rwandet age eng' murot kaataam ne po taitap Mikmas, kotonon age eng' murot tai eng' taitap Geba.
6Ki leenji `Jonathan murenooto ki ipchin kariikyik che po lugeet, “Nyoo kelande keebe ole mi lugeetap chu ma kimuratan, abeere imuuchi kotoretech Kamuktaindet ne Toroor amu ma mi kiy ne etee Kamuktaindet ne Toroor kosar eng' che chaang' anan ko eng' che ng'ering'.”
7Koleenji `chiito ne ki ipchin kariik, “Yai tuguuk tugul che mi muguleldang'ung'. Welelgei, keero, ami kobooten ko uu eng' muguleldang'ung'.” 8Yeityo koleenji Jonathan, “Nyoo anyun, kilandoi kebendi ole mi pichooto ak kiboorchigei. 9Ngot komwaiwech kole, ‘Otebi kot kebwa ole omi.’ Ketonondosi anyun eng' oldanyo ma kitogostoi ole mi icheek. 10Ago ngot koleenjech, ‘Otogosu ole kimi.’ Ketogoste anyun, amu kagonde `Kamuktaindet ne Toroor icheek eunekyok ak egu niito kaboorunet eng' acheek.” 11Ki iboorchigei anyun icheek tuwai lugeetap Philistiik. Ak ki le Philistiik, “Ogeero, kamong' Yahudik eng' keriingonik ole koga ung'egei.” 12Ki leenji `piigap lugonooto Jonathan kobooto chiito ne ki ipchin kariik, “Otogosu ole kimi si kiboorwok kiy.” Koleenji `Jonathan chiichooto ki ipchin kariik, “Togosu isubwo, amu kagonde `Kamuktaindet ne Toroor icheek eunegap Israel.” 13Ki wo Jonathan kolaany eng' eunek ak keelyek ak ki isubi ineendet chiichooto ki ipchin kariik. Ki ibutyo Philistiik eng' taitap Jonathan ak ki parat icheek eng' let chiito ne ki ipchinoti kariik. 14Eng' paronooto po tai ko ki par Jonathan ak chiito ne ki ipchin kariik piik olo po tiptem eng' kooret ne po kebebertap ekait. 15Ki piit potanet eng' nganaseet, eng' emet ak eng' piik tugul. Ki potan lugeet kobooto luulik ak icheek; ak ki potan ng'wony, kot koit kobiit potanet ne oo miising'.
Kiterteeri Philistiik
16Ki keer riibiigap Saulo eng' Gibea ne po Benjamin; ogeero, chaang'indo, kibetyo ak koyestoi koba komosi ak komosi. 17Koleenji anyun `Saulo piik che ki mi kobooto ineendet, “Oiit piik nguno ak ogeer chiito ne kakwo eng' acheek.” Ye kingo kagoit, ko ki ma komi Jonathan ak chiito ne ki ipchinoti kariik. 18Koleenji `Saulo Ahija, “Ibu moingetap Kamuktaindet konyo yu.” Amu kimi moingetap Kamuktaindet kobooto piigap Israel eng' peetuusyechooto. 19Ye kita kong'alaaljin `Saulo tisiindet, koeet polateet kotesak eng' nganaseetap Philistiik. Amu nooto anyun koleenji `Saulo tisiindet, “Iste eung'ung'.” 20Ki iyumgei piik tugul che ki mi ak Saulo ak koba pooryeet. Ki nyoor Philistiik komi eng' wasetapkei ak ki par chii tugul chiito ne kitokyigei, ak kieet miising' parisyet. 21Ki week Yahudik che ki mi kobooto Philistiik ko uu ye ki uu eng' tai, che kiga togosta kobooto icheeget koba nganaseet, kobun korotinwek che kiga yiem. Ki namgei chooto ak icheek kobooto Yahudik che ki mi kobooto Saulo ak Jonathan. 22Ye kingo kas piik tugul che po Israel che kiga unygei eng' emetap tuloonoogap Ephraim kole kamwei Philistiik, kochut lugeet ak koon ak icheek Philistiik.
23Kosar anyun `Kamuktaindet ne Toroor Israel eng' peetuunooto; ak ki landa lugeet kwo Beth-aben. 24Ki iimak kiplugotinigap Israel eng' peetuunooto. Ko uu ye kiga konde Saulo kotebee kayasyoet kiplugotinik kole, “Chuboot chiito ne amei amit age tugul kotom koit koskoleny, si asich ayooktochigei mugetuut eng' puunikyuk.” Ma chamcham anyun chii age tugul amit eng' pichooto. 25Ki pa piik tugul timiin, ak ki mi kumyat ng'wony. 26Ye kingo it piik timiin, kooro kosou kumyat, ago ma inde chii kuut eng' eunnyi; amu ki iywei icheek kayasyoet. 27Ago ki tomo kogas Jonathan kole kigong'at kwandannyi piik eng' kayasyoet. Ki iyogoito anyun kirokto ne ki mi eunnyi, ak kotooree masamek yeityo konde kutit, ak kiyatagis konyekyik. 28Kowol anyun age eng' piik kole, “Ki ng'at kwandang'ung' piik eng' kayasyoet ak eng' kimnateet kole, ‘Chuboot chiito ne amei amitwogik eng' peetuuni.’ ” Ak kiga kong'etyo piik kot. 29Ki le Jonathan anyun, “Kigoiim emet abba. Ogeerchingei anyun ole kayatitagei konyekyuk ye kachamcham kitigin eng' kumyandani. 30Kotam nee nda kagaam piik tuguugap puunikwak che kanyoor ko uu ye machei? Kata piitu pareet ne oo eng' Philistiik.”
31Ki par Philistiik eng' peetuunooto kobooch Mikmas agoi Aijalon, ak kiga koam rubeet piik miising'. 32Ki rwochi piik tuguuk che ki nyaban; ak ki nam keechiirek ak tuuga kobooto moek ak koeny eng' yooto ak ki am piik panyechooto kobooto korotiik. 33#Tau 9.4; A.La 7.26-27; 17.10-14; 19.26; NKNg'a 12.16, 23; 15.23 Ye ki ngemwachi Saulo keleenji, “Keero, yachin `piik Kamuktaindet ne Toroor tengekto amu amei panyeek kobooto korotiik.” Kowol ineendet kole, “Kaoyai ng'aalseet, omilwa koito ne oo konyo yu ami.” 34Ak ki le Saulo, “Oyestee oba kwenutap piik ak oleenji kogetwo chii tugul eitonyi, ak kogetwo chii tugul keechiiryennyi yeityo koeny eng' yu ak koam, si moyachi Kamuktaindet ne Toroor tengekto ye oame kobooto korotiik.” Kiget chii age tugul eitonyi konyo kemounooto yeityo koeny eng' yooto. 35Kiteekyi anyun `Saulo Kamuktaindet ne Toroor kaptisisyet; nooto ko ki kaptisisyet ne po tai ne kiteekyi Kamuktaindet ne Toroor.
36Ak ki le Saulo, “Ongechoortegei kisup Philistiik kembouni ak kenyabane tuguuk kot koeech, amat ongebagaach chii agot agenge eng' icheek kosap.” Kowol icheek kole, “Yai kiit age tugul ne igeere ile myee eng' inyee.” Ago ki mwa tisiindet kole, “Ongeriigu yu keriikyi Kamuktaindet.”
37ki teebee `Saulo Kamuktaindet kiit ne yaei kole, “Achoortegei asup Philistiik? Tos indoi icheek eutap Israel?” Ago ma wolji ineendet eng' peetuunooto. 38Ki le anyun Saulo, “Oriigu yu okweek pounik tugul che po piik, si kegeer ole kabiitunda tengegi rani. 39Amu ko uu ye sabei Kamuktaindet ne Toroor ne saru Israel, ko agot ngo Jonathan weeriinnyu, komeei iman.” Ago ma piit chii eng' piik tugul ne ki wolji ineendet. 40Yeityo komwachi `Saulo Israel tugul koleenji, “Otebee komosta agenge ak ketebee ak Jonathan weeriinnyu komosta age.” Ki mwachi anyun `piik Saulo koleenji, “Yai kiit ne igeere ile myee eng' inyee.” 41#Kai 27.21; 1Sam 28.6 Ki le anyun Saulo “Ee Kamuktaindet ne Toroor, Kamuktaindetap Israel, lyon si kotom iwolji kiboityong'ung' ra? Ngot komi anee lelutyoni anan komi weeriinnyun Jonathan, ee Kamuktaindet ne Toroor Kamuktaindetap Israel, ibooru eng' Urim, ago ngot komi lelutyoni piiguk Israel, ibooru eng' Thummim.” Ak ki kinam Jonathan ak Saulo eng' parbaryat ago kichililso piik. 42Ak ki le Saulo, “Oseer parbareek nguno agobo anee ak Jonathan weeriinnyu.” Kingi seer, kenam Jonathan. 43Ki leenji anyun `Saulo Jonathan, “Mwaiwo kiit ne koiyai.” Ak ki mwachi Jonathan ineendet koleenji, “Koachamcham iman kumyat kitigin eng' walitap kirokto ne komi eunnyu. Achoboot nguno ame.” 44Kole `Saulo, “Ingoyai Kamuktaindet ko uu nooto ak koyai kotes kora, amu agoi imee iman, Jonathan!”
45Ago ki leenji `piik Saulo, “Tos meei Jonathan, ne koyai yetunoni oo eng' Israel? Achicha, ma uu nooto. Ko uu ye sabei Kamuktaindet ne Toroor, koma ibutyin ng'wony agot agenge eng' suumeegap metinnyi, amu kabois ak Kamuktaindet rani.” Ki sar piik anyun Jonathan si ma me.
46Ki togosta anyun Saulo ko mata koosup Philistiik, ak ki week Philistiik oldanywa.
Ng'aleegap laitornatetap Saulo
47Kingo kagonam anyun Saulo laitornatet eng' Israel, kobargei ak puunikyik tugul eng' komosta age tugul. Kibargei ak piigap Moab, piigap Ammon, piigap Edom, piigap Philistiik ak laitorinigap Soba. Ki iterteer icheek eng' komosta age tugul ole kiweleljigei. 48Ki yai eng' nyiganateet ak ki par Amelegik ak kosar Israel eng' eunegap icheek che kiga koluul.
49Weeriigap Saulo anyun ko ki Jonathan, Isbi ak Malkisua. Kainaigap tiibiikyik tuwai ko ki chu: taita ko ki kiguuree Merap ak kainetap ne ming'in ko Mikal. 50Kainetap osotyotap Saulo ko ki Ainoam cheptap Ahimaaz. Kiptaiyatap lugeennyi ko ki kiguuree Abner weeriitap Ner, nooto ne ki imametap Saulo. 51Kwandap Saulo ko ki Kish, ak Ner kwandap Abner ko ki weeriitap Abiel.
52Eng' peetuusyek tugul che po Saulo, ko ki piit lugeet ne koroom agobo Philistiik, kot ko kingo keer `Saulo chii age tugul ne kiim, anan ko chii age tugul ne nyigan, komuti ineendet kotebee oldanyi.
Currently Selected:
1 SAMUEL 14: KALDC
Highlight
Share
Compare
Copy
Want to have your highlights saved across all your devices? Sign up or sign in
Kalenjin Revised Bible Catholic Edition © Bible Society of Kenya, 2015.
