1 SAMUEL 13
13
Kobaregei Saulo ak Philistiik
1Kiga kotar Saulo kenyiisyek (sosom) ye ki tau kolaitorani, ak ki laitoran kenyiisyek aeng' eng' Israel. 2Ki lewenjigei `Saulo murenik eliphuusyek somok che po Israel. Ki mi eliphuusyek aeng'u eng' chooto kobooto Saulo eng' Mikmas ak eng' tulweetap Bethel ak kimi eliphuut agenge kobooto Jonathan eng' Gibea ne po Benjamin. Ki iyookto kiplugotinik che kiga ng'et koba kaa. 3King'em `Jonathan irimeetap kiplugotinigap Philistiik ne ki miitei Geba ak ki kas Philistiik agobo niito. Ki ng'at Saulo keguut iryageet eng' emet tugul, koleen, “Ingogas Yahudik.” 4Ki kas Israel tugul kole kogobar `Saulo irimeetap kiplugotinigap Philistiik ak kole ki koek Israel ne kiwechei eng' Philistiik. Ki iyumgei piik koosup Saulo koba Gilgal.
5Ki iyumgei Philistiik si kobargei ak Israel kotinyei kariisyek eliphuusyek sosom ak piik eliphuusyek lo che ketei paraisisyek, kobooto piik che tee ng'aniegap ngeguutap nyanjet eng' chaang'indo. Ki togos koteech Mikmas ne tokyingei kong'asiis eng' Beth-aben.
6Kingo keer piigap Israel kole mi eng' pichiindo, (amu kinyalilso piik,) kounykei anyun eng' kebenonik, eng' sondisyek, eng' rwandosyek, eng' keriingonik ak eng' keriingonik alak che mengeechen. 7Kiga kolandae Jordan Yahudik alage koba emetap Gad ak Gilead. Ago kita komi Saulo Gilgal, ak ki isup piik tugul ineendet kobotanioti. 8#1Sam 10.8 Kingo kenis peetuusyek tisap, koma nyo `Samuel Gilgal ko uu ye kiga ng'at, ko kiyesta piik anyun koba eng' ole mi ineendet.
9Kole Saulo, “Oibwa kagoochinet ne kibeelei konyo yu kobooto kagoochinoigap kaalyeet.” Ak ki igoito kagoochinonooto kibeelei.
10Eng' sainooto ki igeesune kagoitoetap kagoochinet ne kibeelei, koit Samuel, ak kimanda Saulo kotorookta ineendet kole kwo kogat. 11Ago ki le Samuel, “Nee ni kaiyai?” Kowol Saulo kole, “Kageer piik ale kaiyesta koba; ak ma inyoo eng' kasarta che kiga king'at, ak kogagoyumgei Philistiik eng' Mikmas. 12Abwaat anyun ale chorugei Philistiik nguno kobwanei ole ami eng' Gilgal kotom asoom chametap Kamuktaindet ne Toroor, andegei anyun agoito kagoochinet ne kibeelei.”
13Koleenji `Samuel Saulo, “Keyai eng' perberyo ama iriip ng'atuutyetap Kamuktaindet ne Toroor Kamuktaindeng'ung' ne king'atin, amu kata igimiti Kamuktaindet ne Toroor laitornateng'ung' eng' Israel koigeny. 14#Poi 13.22 Ago nguno koma kotebyei laitornateng'ung' agoi. Kagocheeng'jigei `Kamuktaindet ne Toroor chiito ne iboiboi muguleldanyi, ak kagonde `Kamuktaindet ne Toroor chiichooto koek pounindet ne pou piikyik amu ma iriip ng'olyoot ne king'atin Kamuktaindet ne Toroor.”
15Ki ng'eet Samuel ak kwo kotogosta eng' Gilgal agoi Gibea ne po Benjamin. Ki it `Saulo kiplugotinik che ki ng'et kobooto ineendet, koek murenik olo po pogol lo. 16Ki tebee Saulo ak Jonathan weeriinnyi ak kiplugotinik che ki mi ak ineendet Geba ne po Benjamin, ago ki teech Philistiik Mikmas. 17Ki mong' luulik eng' nganaseetap Philistiik kopcheunegei somok. Ki pun kweanet age ooreet ne wendi Ophrah agoi emetap Saulo, 18kobun kweanet age ooreet ne wendi Beth-horon, ak ki pun kweanet ne po let ooreet ne punei kiwoteet ne ing'ururi atebweetap Seboim kotokyigei surkwen.
19Ki ma komiitei kitang'indet emet komugul ne po Israel. Ki iywei Philistiik kole imuuch koyachigei Yahudik rotoogap chok anan ng'otwek. 20Ki choortagei Yahudik tugul kobendi ole mi Philistiik, si kolit chii tugul mogombennyi, rotwennyi, aiywennyi ak marunnyi, 21Ki kigoito kebeberta aeng' eng' somok che po shekel eng' marusyek, rotonik, umaisyek, aonok ak ne lite kiplitok kobunji ne ki tinyei liteito ne kilitisye. 22Ki ma piit eng' peetuutap lugeet rotwetap chok anan ko ng'otit eng' eutap chii age tugul ne ki mi kobooto Saulo ak Jonathan, nga ki tinyei Saulo ak Jonathan weeriinnyi chechwaak. 23Ak kimanda lugeetap Philistiik koba ole kibunei eng' Mikmas.
Currently Selected:
1 SAMUEL 13: KALDC
Highlight
Share
Compare
Copy
Want to have your highlights saved across all your devices? Sign up or sign in
Kalenjin Revised Bible Catholic Edition © Bible Society of Kenya, 2015.
