1 SAMUEL 15
15
Koterteeri `Saulo Amelegik
1 # 1Sam 10.1 Ak ki leenji `Samuel Saulo, “Ki iyookwo Kamuktaindet ne Toroor anyo aiiliin iegu laitoryatap piikyik si ibou Israel. Ara kas anyun ng'aleegap Kamuktaindet ne Toroor!” 2#Kom 17.8-14; NKNg'a 25.17-19 Kamwa Kamuktaindet ne Toroor ne po lugoosyek kole, “Kaabwaat kiit ne ki yachi `Amelek Israel, ye ki kirinda ineendet eng' ooreet ye kitogosu eng' Misiri. 3Ui anyun nguno ibookyi Amelek ak ing'em igeesu tuguuk tugul che tinyei. Amat ibagaakte chii, ago par muren ak kwony, lakwa ak ne reryei, teta ak keechiiryet, tambeesyet ak sigiryet!”
4Ki kuur anyun `Saulo piik ak koiit icheek eng' Telaim: piik eliphuusyek pogol aeng' che punei keelyek ak piik eliphuusyek taman che po Judah. 5Ki wo `Saulo kot koit nganaseetap Amelek ak koribis eng' atebweet. 6Ki mwachi `Saulo Kenik koleenji, “Oba oistegei, ochoortegei oistoegei Amelegik, si ma paraak kobooto icheek. Amu ki oriree lagok tugul che po Israel, ye kitogosu komong'u eng' Misiri.” Koistogei anyun Kenik eng' Amelegik.
7Ki par anyun `Saulo Amelegik kobooch Havilah agoi Sur, ne neegit Misiri. 8Ki nam Agag laitoryatap Amelegik kosabei; ak kobar piik tugul kogees eng' rotwetap chok. 9Ago ki pagaach Agag `Saulo ak `piik ak keechiirek che korooron eng' tugul, kobooto tuuga che akwaen ak aaregap keechiir kobooto tuguuk tugul che ki myachen, ama cham kobar kogees. Ago king'em kiit age tugul ne kisasei ak ne ma kiy kogees.
10Ki ityi anyun ng'olyootap Kamuktaindet ne Toroor `Samuel koleenji, 11“Ki ma ta myee aeet Saulo koek laitoryat. Amu kagoweektagei let mata kosuba, ama yai ng'atuutikyuk.” Ki nereech anyun Samuel ak koriirchi Kamuktaindet ne Toroor kemout komugul. 12Ki ng'eet Samuel karon miising' kwo kotuiyo ak Saulo. Ki kimwachi Samuel keleenji kanyo Saulo Karmel ak koteekyigei kiit ne kibwaatee ineendet, yeityo kowendot kwo kosiirto kochoortagei Gilgal. 13Ye kingo nyo Samuel ole mi Saulo, koleenji `Saulo ineendet, “Ingoberuurin Kamuktaindet ne Toroor, koayai ng'atuutyetap Kamuktaindet ne Toroor.”
14Ak ki le Samuel, “Po nee anyun kautoni po keechiirek agase eng' itiikyuk ak kautetap tuuga ne agase?” 15Kole Saulo, “Koget piik kechirechooto ak tuuga chooto eng' Amelegik, amu kobagaakta piik keechiirek ak tuuga che korooron eng' tugul, si koeng'ji Kamuktaindet ne Toroor Kamuktaindeng'ung', ago ko ki par kigesu che kong'et.” 16Komwachi anyun `Samuel Saulo koleenji, “Kany amwaun kiit ne kamwaiwo Kamuktaindet ne Toroor kemouni.” Ak ki leenji ineendet, “Mwa inyee.”
17Ki mwa Samuel kole, “Nganda ki iming'in ye ki igeeregei, ko ki ma kieetin iegu kandoindetap pororyosyegap Israel? Ki iilin Kamuktaindet ne Toroor iegu laitoryat eng' Israel, 18ak ki iyookten Kamuktaindet ne Toroor iwe panda ak kole, ‘Ui ak ibar Amelegik kiptengeginicho igeesu, ak obargei ak icheek kot kogeskei.’ 19Amu nee anyun si me kas iit kutitap Kamuktaindet ne Toroor, ago kelabatyi parunenik ak iyai kiit ne ya eng' taitap Kamuktaindet ne Toroor?”
20Koleenji `Saulo Samuel, “Ee, koagas iit kutitap Kamuktaindet ne Toroor ak koawe ooreet ne koiyookto Kamuktaindet ne Toroor awe ak koamutu Agag laitoryatap Amelegik ak koabar Amelegik kogeskei. 21Ago koget piik parunenik, keechiirek ak tuuga chooto che korooron che ko kitabaan, si keeng'ji Kamuktaindet ne Toroor Kamuktaindeng'ung' eng' Gilgal.” 22Ak ki mwa Samuel kole, “Tos, ting'ee Kamuktaindet ne Toroor poiboiyet ne oo kagoochinoik che kibeelei ak tiseiywot, ko uu ye ting'ee kasetap iit ne po ng'olyootap Kamuktaindet ne Toroor? Keero, siirei kasetap iit tiseiywot ak siirei kasetap iit mwanigap mengichik. 23Amu kergei ngelelnateet ak tengektap ponisyet ak kergei uuindap met ak chalwokto ak saaetap kanamonik. Amu koieesye ng'olyootap Kamuktaindet ne Toroor, ko kagoeesyen aginye si mata iegu laitoryat.”
24Ak ki mwachi `Saulo Samuel koleenji, “Koayai tengekto amu koabistoe ng'atuutyetap Kamuktaindet ne Toroor, ak ng'aleeguk. Amu koaiywei piik ak agas iit kutinnywa. 25Ara asaain anyun nguno ale, nyoiywo kaat tengektonyu, ak ingeweigei tuwai, si kobiit agutung'ji Kamuktaindet ne Toroor.” 26Ak ki mwachi `Samuel Saulo koleenji, “Ma kiweeksei ak inyee, amu koieesye ng'olyootap Kamuktaindet ne Toroor, ko kagoeesyen Kamuktaindet ne Toroor, ma iegu laitoryat eng' Israel.” 27#1Sam 28.17; 1Lai 11.30-31 Ye kingo welelgei Samuel kwo, konam Saulo tabandap ngoryennyi; ak kigereer. 28Ki mwachi `Samuel ineendet koleenji, “Kagogereerenen Kamuktaindet ne Toroor laitornatetap Israel rani, ak kogoochi chiitap kokweng'ung' ne kaigai eng' inyee. 29Ma mwaei lembech Kimnateetap Israel ama sigu; amu ineendet koma chiito si kowalak.” 30Komwa Saulo kole, “Koayai tengekto, ago asaain kora ale konyita nguno eng' taitap poisyegap piikyuk ak eng' Israel ak ingeweigei tuwai, si agutung'ji Kamuktaindet ne Toroor Kamuktaindeng'ung'.”
31Koweek anyun Samuel koosup Saulo ak ki kutung'ji `Saulo Kamuktaindet ne Toroor. 32Yeityo komwa Samuel kole, “Omutwaa Agag laitoryatap Amelegik konyo yu.” Ki nyo anyun Agag kobaibai ak kobwaati koleen, “Eng' iman ni ko ng'wanindap meet.” 33Ago ki mwa Samuel kole,
“Ko uu ye ki yachi rotweng'ung' po chok kobogorisyek kobetyi lagok,
koegu kamenng'ung' agine ne ma tinyei lakwa eng' kobogorisyek.”
Ak kimurmur `Samuel Agag kotonaton eng' taitap Kamuktaindet ne Toroor eng' Gilgal. 34Yeityo kwo anyun Samuel Ramah, ak kitogosta Saulo koonnyi eng' Gibea ne po Saulo. 35Ak ki mata konyo kogeny Samuel kogeer Saulo agoi peetuutap meennyi. Nga no ko ki riirchi `Samuel Saulo; amu ki riir let Kamuktaindet ne Toroor kole kiga koyai Saulo koek laitoryat koboi Israel.
Currently Selected:
1 SAMUEL 15: KALDC
Highlight
Share
Compare
Copy
Want to have your highlights saved across all your devices? Sign up or sign in
Kalenjin Revised Bible Catholic Edition © Bible Society of Kenya, 2015.
