TYENWOGIGAP KALASUNET 147
147
Kalasunet agobo perurto ne po Kamuktaindet
1Olasu Kamuktaindet ne Toroor!
Myee ne tya ketyenji Kamuktaindennyo kalasunoik;
amu karaaran, ak nyoljin tyendap kalasunet.
2Teechei `Kamuktaindet ne Toroor Jerusalem;
iyumi ineendet che ki kioon che po Israel.
3Inyai che ilyotiin mugulelwekwak,
ak koratei mookwak.
4Iiti kecheik ole tee;
tochin icheek tugul kainaik.
5Oo Kiptaiyandennyo, ak tinyei kimnateet ne oo kosiir;
ma kimuuchi ketet ng'omnatennyi.
6Tiiei Kamuktaindet ne Toroor che iming'inegei;
ago chooru kiptengeginik kobwa ng'wony.
7Otyenji Kamuktaindet ne Toroor kobooto kagoitoetap kongoi;
otyenji Kamuktaindennyo kalasunoik eng' ketubet.
8Tugee inee poolik kipsengwet,
chopchin ropta ng'wony,
ak ibiti susweek eng' tuloonook.
9Igoochin `inee amitwogik tyong'ik,
ak chepkuginik che iteeitos.
10Ma paibai ineendet eng' kimnateetap paraisiit,
ama paibai eng' labatindet;#147:10 Labatindet: Keelyegap chiito.
11ago paibai Kamuktaindet ne Toroor eng' icheek che iywei ineendet,
eng' icheeget che imang'u rireenennyi.
12Ilasu Kamuktaindet ne Toroor, ee Jerusalem!
Ilasu Kamuktaindeng'ung', ee Zion!
13Amu igimiti `inee temeleiywegap ormariichoguk;
iberuuri lagoguk eng' kwenung'ung'.
14Yaei kaalyeet eng' kiwotosyeguk;
inyiitin nganuuk che neryootiin kosiir.
15Iyookyin ng'wony ng'atuutyennyi;
ak labati ng'olyoondennyi miising'.
16Koonu teluji ko uu koroorigap keechiirek;
iseeroti chepkoset ko uu oreek.
17Iyooktoi peekyik ko uu koik
ng'oo ne imuuchi kotonon eng' taitap kaitityennyi?
18Iyooktoi ng'olyoondennyi, ak koyaei tuguuchooto kochootyo;
yaei usoonennyi kous, ak koroot peek.
19Iboorchin Jakobo ng'olyoondennyi,
iboorchin Israel ng'atuutikyik ak kirwoogutikyik.
20Ma yachin pororyet age tugul ko uu nooto;
ama nai icheek kirwoogutikyik.
Olasu Kamuktaindet ne Toroor!
Currently Selected:
TYENWOGIGAP KALASUNET 147: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
