TYENWOGIGAP KALASUNET 145
145
Ooindo ak aiyebindap Kamuktaindet
1Alasun inyee, ee Kamuktaindennyu ak Laitoryannyu;
ak alasu kaineng'ung' koigeny ak koigeny.
2Amwae peetuut age tugul ale iberuurot;
ak alasu kaineng'ung' koigeny ak koigeny.
3Oo Kamuktaindet ne Toroor, ak kanyool kilas miising';
ama isiagaksei etunatennyi.
4Ilasu poisyoniguk ibinda age agoi ibinda age,
ak mwaitoi poisyoniguk che po kamuktaet.
5Abwaatati telunateet ne oo ne po teegistang'ung',
ak ne po poisyoniguk che po kwong'eet.
6Mwaitoi piik agobo kamuktaetap poisyoniguk che kiywei;
ak amwaitoi ooindang'ung'.
7Twegu icheek komwaei kabwaatetap myeeindong'ung' ne oo,
ak tyeni icheek agobo imandang'ung'.
8Kamuktaindet ne Toroor ko ne po myeeindo ak ko nyiitaat rireenet;
ma sip konereechi ak tinyei rireenet ne oo.
9Myee Kamuktaindet ne Toroor eng' piik tugul;
ak pou rireenosyekyik che talaen poisyonikyik tugul.
10Weegun kongoi poisyoniguk tugul, ee Kamuktaindet ne Toroor,
ak iberuurin cheguuk che tiliileen.
11Ng'alaali icheek agobo toroornatetap laitornateng'ung',
ak ng'alaale kimnateng'ung',
12koboorchi weeriigap piik poisyonikyik che po kamuktaet,
ak toroornatetap etunateet ne po laitornatennyi.
13Laitornateng'ung' ko laitornatet ne po koigeny;
ak tebyei laitornateng'ung' eng' ibinwek tugul.
14Tiiei Kamuktaindet ne Toroor tugul che ibutos,
ak ing'eeti icheeget tugul che ing'uruuksei.
15Igenin konyegap piik tugul;
ak igoochini amitwogikwak eng' peetuut ne nyolu.
16Ing'aanye eung'ung',
ak igoochini age tugul ne sabei kiit ne machei kot kobiyo.
17Po iman Kamuktaindet ne Toroor eng' ortinwekyik tugul,
ak tala eng' poisyonikyik tugul.
18Neegitee Kamuktaindet ne Toroor icheeget tugul che kuurei ineendet,
tugul che kuurei ineendet eng' iman.
19Isuldochin icheeget che iywei ineendet kiit ne machei icheek;
kasei ineendet riirekwak, ak saru icheeget.
20Riibei Kamuktaindet ne Toroor tugul che chamei ineendet;
a, o ng'emei kiptengeginik.
21Ng'alaali kutinnyu agobo kalasunetap Kamuktaindet ne Toroor;
ak ilasu piik tugul kainennyi ne tiliil koigeny ak koigeny.
Currently Selected:
TYENWOGIGAP KALASUNET 145: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
