TYENWOGIGAP KALASUNET 144
144
Saaet agobo saruunetap emet
1Iberuurot Kamuktaindet ne Toroor rwandennyu,
ne ineeti eunekyuk lugeet,
ak koneeti morikyuk pooryeet.
2Ineendet chamyennyu ne tala ak irimennyu,
teeksennyu ne kooi ak saruunindennyu;
long'ennyu ak ineendet ne amang'u;
ne igoochin piikyuk kogasa iit.
3 # Job 7.17-18; T.Kal 8.4 Kamuktaindet ne Toroor, tos nee chii kot inai?
Anan weeriitap chii, ne tos iit ile kiy?
4Kergei chii ak kiy puch;
uu peetuusyekyik merumbet ne siirtoi.
5Ing'uruuch kipsengwetisyeguk, ee Kamuktaindet ne Toroor, ak ichooruge!
Twa tuloonook, si koiyenso!
6Iyookte kalyeleet, ak iyeste icheek;
mwokte kipchaboniguk, ak inyaliil icheek.
7Iyogou eung'ung' eng' parak;
ityacha ak isarwo eng' peek che chaang',
eng' eunegap toek;
8che nyalili kutusweekwak tuguugap puch,
ak eunekwak che po tai ko eunek che po lembech.
9Atyenun tyendo ne leel, ee Kamuktaindet,
atyenun kalasunoik eng' kibugandet ne po inoik taman.
10Ineendet ne igoochin katerteerisyet laitorinik,
ne saru Daudi kiboityondennyi.
11Ityacha eng' rotweet ne koroom,
ak isarwo eng' eunegap toek,
che ng'alaali kutusweekwak lembecheek,
ak eunekwak che po tai ko eunek che po lembech.
12Ngo kergeit weeriikyok che ta ko neran
ak keetiik che piitos;
ak kogergeit tiibiikyok ak koigap luuita
che ki kiwai ko uu che po kootap laitoryat.
13Ngo ek chogenikyok che nyiitaat tuguuk tugul che konorotiin,
ngo iiyo keechiirekyok eliphuusyek
ak tamanusyegap eliphuusyek eng' korotinwekyok;
14ak ngo ek eikyok che kiimen ye laisei.
Ma piitu ne iboogu, ama mi ondo,
amat kobiit kateiyet eng' ortinwekyok che eecheen.
15Poiboen piik che ityin kaberuret ko uu nooto;
poiboen piik che Kamuktaindennywa ko Kamuktaindet ne Toroor.
Currently Selected:
TYENWOGIGAP KALASUNET 144: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
