KALEWANAIK 22
22
1Kaigai kelewen kainet ne myee kosiir mogornatosyek che chaang';
kaigai kelewen myeeindo ne po chamyet kosiir fedha ak thahabu.
2Ni ne amdoi mogoreek ak kibananook:
Kamuktaindet ne Toroor yaindetap icheek tugul.
3Keerei chiito ne ng'oom yaityet ak kounygei;
ago siirtoi abusanik ak konyoor nyalilda.
4Melektap kaming'inetapkei ak kaiyweisyet ne kiywei Kamuktaindet ne Toroor,
ko mogornatosyek, teegisto ak saboondo.
5Mi katook ak mestonok ooreetap chiito ne imaasat;
looitune chooto ineendet ne riibei saboondanyi.
6Ineet lakweet koosup ooreet ne nyolu kobun,
ak ma pagaaktoi agot ye kagoosit.
7Ko uu ye pou `mogoryot kibananook,
ko otwogindetap chiito ne pesendoi, ne peseni.
8Ineendet ne koolei tengekto kogesei nyalilda,
ak petei kirokto ne po nereeknatennyi.
9Kiberuuri chii ne aiyeep,
amu igoochin amitwogikyik kibananiat.
10Oon chotindet, si kobet polateet,
ee, siisei pooryeet ak teweernateet.
11Ineendet ne chamei tiliilindap muguleldo ak myeeindap kutinnyi
ko egu anyun laitoryat chorwennyi.
12Riibei konyegap `Kamuktaindet ne Toroor ineendet ne tinyei naet,
ago igabui ng'aleegap chiito ne kaberberindet.
13Mwaei chiito ne choriren kole, “Mi ng'etundo saang'!
Kibara eng' ooreet.”
14Keriinget ne loo kutitap chepkugoniot;
ibutyin yooto ineendet ne nereekyin `Kamuktaindet ne Toroor.
15Ki kiratyi perberyo muguleldap lakweet;
ago oonei kirokto ne po kergong'yet kolooit eng' ineendet.
16Ineendet ne usei kibananiat si kotesak tuguukyik,
ak kogoochin tuguuk mogoryot, koegu kibananiat.
Mwautigap che utaatiin
17Ep iit, si kobiit igas ng'aleegap piik che utaatiin,
ak itokyi muguleldang'ung' naennyu.
18Amu myee ngot iriip eng' oriing'ung',
ngo kimegitu tugul eng' kuting'ung'.
19Si kobiit imang'u Kamuktaindet ne Toroor,
kaaboorun rani chuuto, ee, kaaboorun.
20Tos ma asirun tuguuk che korooron
che po kirwoogutik ak naet.
21Kogoonin inai imanitap ng'aleegap iman,
si kobiit imuuch iwolji ng'aleegap iman icheek che koiyoogun?
-1-
22Amat irebe kibananiat amu panan,
anan ius eng' ormariich ne kinyaliili.
23Amu ng'alaaldochin `Kamuktaindet ne Toroor icheek,
ak koluul saboonwegap icheek che luulei.
-2-
24Amenam chorwandit ak chiito ne nereechi,
amat obendate ak chiito ne tinyei nereegek,
25si meneetkei ortinwekyik,
ak inyooru mesteet ne po saboondang'ung'.
-3-
26Amat iegu agenge eng' icheek che iyastos konamegei eunek,
anan agenge eng' icheek che tononjin piik agobo pesenaik.
27Ngot ko metinye che iyaaktoe,
ko amu nee anyun si koibenen itogung'ung'?
-4-
28Ameiste kiwoteet ne po keny,
ne kichobei kwanisyeguk.
-5-
29Tos igeere chiito ne igiiljingei poisyennyi?
Tononi ineendet eng' taitap laitorinik;
ma tononi eng' taitap piik che ma taagunotiin.
Currently Selected:
KALEWANAIK 22: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
