KALEWANAIK 21
21
1Uu ainoosyek muguleldap laitoryat eng' eutap Kamuktaindet ne Toroor;
imuti kotokyigei oldo tugul ole machei.
2Leen chii po iman poisyonikyik tugul,
ago keerei `Kamuktaindet ne Toroor mugulelwek eng' karagendoet.
3Keyaei iman ak kirwooget,
ko taachaksei eng' taitap Kamuktaindet ne Toroor kosiir korosyot.
4Koonyek che tinyei menoteet ak muguleldo ne meenei,
agot taitap kiptengeginik ko tengekto kityo.
5Tokyingei chaang'indo kityo kabwaatutigap che igiilegei;
ago panani age tugul ne sartae.
6Ye kinyooru konoraik eng' lembeita
ko uu kibungweret ne ki wiirchin komosi ak komosi ak uu mesteetap meet.
7Oone kiptengeginik koroomnatennywa,
amu eesyoi ichek koyai ne myee.
8Kunuur miising' ooreetap ineendet ne laei ng'oogisto,
ago atebetap ne tiliil ko litit poisyennyi.
9Kaigai kemeny taban eng' koot parak,
kosiir kemeny koot ne oo ak kwondo ne poliin.
10Machei yaityet saboondap chiito ne ya;
ma nyooru chameet chiitap kokwennyi eng' tainnyi.
11Ye kibir chotindet, konyooru utaatyet koseng'eng';
ak ye kineet ne utaat, kotaachei naet.
12Ibwaati chiitap iman kootap kiptengekyot;
ole kigabuitoi kiptengeginik eng' ng'emisyennywa.
13Ineendet ne timei itiikyik ye riirei kibananiat,
koriirei agine ago ma kasyin chii.
14Imisi nereegek konunotyot ne ki koonu eng' ung'oot,
ak imisi nereegek che ng'woneen asoya.
15Poiboiyet eng' chiito ne po iman koyai kirwooget;
ago kaimetapkei eng' yaigap tengekto.
16Imuunyi eng' tuiyetap che ki kobek
chiito ne mastoi eng' ooreetap kaguiyet.
17Egu kibananiat chiito ne chamei ureryet,
ma egu mogoryot ineendet ne chamei divaik ak mwanik.
18Egu kiptengekyot ne kityage ne po iman;
ak kogeeri kaberberindet che po iman.
19Kaigai kemeny surkwen,
kosiir kemeny ak kwondo ne polei ak konereechi.
20Miitei konoraik che po kamanuutyet ne oo ak mwanik eng' meng'ootetap ne utaat,
ago amei konoraikyik kobek chiito ne perber.
21Ineendet ne isubi imanda ak chamyet,
konyooru saboondo, imanda ak teegisto.
22Laanyei chiito ne utaat nganaseetap che kiimeen,
ak kobut kimnateetap kamang'unennyi.
23Age tugul ne riibei kutinnyi ak ng'elyeptanyi
koriibei saboondanyi si ma nyoor nyalilwogik.
24Kiguure chotindet chiito ne meenei ak kochaugei,
poisyei ineendet eng' kaeetetapkei ne po menoteet.
25Parei chiito ne choriren magennyi;
amu eesyoi eunekyik kobois.
26Mi ne kasei myat eng' keiyandit peet komugul;
ago igoitoi ne po iman ama etei.
27Kiit ne kiwechei korosyotap kiptengeginik,
kotam nee anyun ye ibu korosyondonooto kotinyei kabwaatutik che yaach.
28Lusei paoryat ne po lembech,
ago ng'alaali ng'aleek che tebyei keny chiito ne kasei.
29Iuuiiti togeennyi chiito ne ya,
ago chobei ortinwekyik chiito ne po iman.
30Ma mi utaatyet, anan kaguiyet, anan kirwooget,
ne kirindoi Kamuktaindet ne Toroor.
31Choboksei paraisiit agobo peetuutap lugeet,
ago po katerteeret Kamuktaindet ne Toroor.
Currently Selected:
KALEWANAIK 21: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
