KALEWANAIK 23
23
-6-
1Ye oamisye ak pounindet,
komeutye ile omi ak ng'o.
2Ngo ii kipkeiya,
inde rotweet moktang'ung'.
3Amat imach amitwogigap pounindet che anyiny;
amu imuuch kaberberin amitwogichooto.
-7-
4Ngot itinye utaatyet ne ititaat;
komeimigei ile asi iegu mogoryo.
5Ye iyaat konyeguk igeer, koma komi?
Amu yachingei mogornateet kebebaik,
tirireni ko uu kipsiichit kotokyingei parak.
-8-
6Ameam amitwogigap ineendet ne tinyei kong' ne ya,
amemach amitwogikyik che anyiny,
7amu uu ineendet kabwaatutikyik.
Leenjinin, “Amisye ak ieeise!”
ago ma mi muguleldanyi kobooten.
8Ing'ung'u kererutyet ne keam,
ak kobetyo ng'aleeguk che anyiny.
-9-
9Amat ing'alaal kogasei ne perber;
amu sasei utaatyetap ng'aleeguk.
-10-
10Ameiste kiwoteet ne po keny;
anan irep mbareenigap che ma tinyei kwanisyek,
11amu kiim katyagindennywa;
tononjin icheek eng' ng'aleek kogirindoin.
-11-
12Igoochi muguleldang'ung' kaneetisyet,
ak igoochi itiiguk kogas ng'aleegap ng'omnateet.
-12-
13Ameesye igerkong' lakweet,
amu ma meei ngibir.
14Piree kirokto,
si isaru saboondanyi eng' ye mi che ki kobek.
-13-
15Weeriinnyu, ngo utaat muguleldang'ung',
ko paibai agine muguleldanyu.
16Eng' iman koboiboitu muguleldanyu,
ye kemwa tuguuk che po iman.
-14-
17Amat koam ng'etkong' muguleldang'ung' agobo kiptengeginik,
ago konyit Kamuktaindet ne Toroor peetuut komugul.
18Amu miitei iman melekto,
ama ki istoi kamang'uneng'ung'.
-15-
19Kas anyun, weeriinnyu, ak isich utaatyet,
ak indochi muguleldang'ung' eng' ooreet.
20Amotebi ak eeigap divaik,
kobooto kipkeinik che amei panyeek.
21Amu egu ponoonik kibogitinik ak kipkeinik,
ak ilaakyin rwondo chiito mararenik.
-16-
22Epchi iit kwandang'ung' ne kisichin,
amesas komet ko kagoosit.
23Al imanit, amealde,
ee, al utaatyet, kaneetisyet ak kaguiyet.
24Paibaitu miising' kwandap ne po iman,
ak ineendet ne sichei lakweet ne utaat, kobaibaitune ineendet.
25Ingogaskei kwandang'ung' ak kamenng'ung',
ingobaibait kamenng'ung' ne kisichin.
-17-
26Weeriinnyu, koono muguleldang'ung',
ingobaibaitune konyeguk ortinwekyuk.
27Amu keriinget ne loo chepkugoniot,
keriinget ne mariich kwondo ne ma neng'ung'.
28Ee saptoi ko uu rebindet,
ak kotesei kaberberik eng' piik.
-18-
29Ng'oo ne riirei koleen, Pwo! Ng'oo ne arageni? Ng'oo ne polei?
Ng'oo ne ing'unyng'unyi? Ng'oo ne ki kiguoten puch?
Ng'oo ne piriireen koonyek?
30Icheek che eei divaik agoi,
icheek che cheeng'oti maiyek che purugotin.
31Ameiit maiyek ye kagobiriritu,
ye taagu itoondanyi eng' kigombet, ye rektoi komyee.
32Eng' let kosus ko uu ereneet,
ak kouut ko uu melmeldo.
33Keerei konyeguk karusyek,
ak komwa muguleldang'ung' tuguuk che imaasotin.
34Ee, iigeitu ineendet ne rue nyanjet kween,
anan ko uu ineendet ne rue toloitap moinget.
35Ile, “Kagokwera, ago ma ama kiy,
kagobira, ama agas.
Agosu au, si acheeng'at kogeny?”
Currently Selected:
KALEWANAIK 23: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
