KALEWANAIK 20
20
1Chotindet divaik, poliindet maiyek.
ak ma utaat age tugul ne petei eng' maiyek.
2Uu porisenetap ng'etundo kamuisetap laitoryat;
ineendet ne tachei laitoryat koyachin saboondanyi tengekto.
3Teegisto eng' chii ngo istoegei pooryeet;
ago polei age tugul ne perber.
4Ma chamei kobatis ineendet ne choriren eng' peetuusyegap kabatisyet;
soomsooti anyun kegesisyei, ama nyooru kiy.
5Uu rireet kirwooget eng' muguleldap chiito,
ago siilei chiito ne tinyei kaguiyet.
6Iboortoi chii age tugul eng' piik che chaang' myeeindonyi;
ago imuuchi ng'oo konyoor chiito ne kiyani?
7Iberuurotin lagogap chiito ne po iman,
ne wendote imandanyi.
8Iseertoi yaitwogik tugul eng' konyekyik
laitoryat ne tebee ng'echereetap kirwooget.
9Ng'oo ne imuuchi komwa kole,
“Kaatiliil muguleldanyu,
aa tiliil, ma atinye tengek?”
10Ratilisyek che po ng'aalseet, ak tuguuk che kigerisye che po ng'aalseet;
ko chooto tuguuk che wechei `Kamuktaindet ne Toroor.
11Naoksei lakweet eng' poisyonikyik,
ngo tiliil poisyennyi anan ngo litit.
12Ki yai `Kamuktaindet ne Toroor tuwai,
itit ne kigastoe ak konda ne kigeertoe.
13Amecham rwondo, si meegu kibananiat;
kosu, si ibiye.
14Mwaei alindet kole, “Ma tilei kiy, ma tilei kiy,”
ago ye kakwo, kochoigei.
15Mi thahabu ak chaang'indap koik che po kamanuut;
ago ng'aleegap naet ko koita ne po kamanuutyet ne oo.
16Nam ngoryeetap ineendet ne tononjin toondet;
ak onam ineendet koek kaarorunet ne tononjin toek.
17Anyiny eng' chii amitwogigap lembeita,
ago ne matya konyi kutinnyi koik.
18Ki kimiiti chobutyet age tugul eng' katigonet;
ak iyai lugeet, icheeng' utaatyet.
19Ng'aanyei ung'ootik ne ibooti ng'aleek;
amat onamge anyun ak ineendet ne iberberisyei.
20Age tugul ne sasei kwan anan kamet,
kimisi tainnyi eng' mesundeito ne oo miising'.
21Poroteetap tuguuk che kindii ne piitu eng' chokyinet
koma kiberuuri eng' let.
22Amat imwa ile, “Ageeri yaityet.”
Igen Kamuktaindet ne Toroor, si kosaruun.
23Wechei `Kamuktaindet ne Toroor ratilisyek che po lembech;
ama myee kerutyetap lembech.
24Indochin `Kamuktaindet ne Toroor kakwautigap chii;
imuktoi ano anyun chii koguiyo ooreennyi?
25Mesteet eng' chii kosartae kole, “Tiliil,”
ak ye kagoyai kayasyosyek, koteebat.
26Iyestoi laitoryat ne utaat kiptengeginik,
ak kotuei icheek eng' kiit ne kituisye.
27Tait ne po Kamuktaindet ne Toroor saboondap chii,
ne isyachi tuguugap ke.
28Riibei `rireenet ak iman laitoryat,
ak kogimiti rireenet ng'echerennyi ne po laitornatet.
29Toroornatetap murenik ko kimnateennywa,
ak karaaranindap poisyek kalwalek.
30Iundoi yaitwogik pirutik che ng'woneen,
ak itiliili pirutik agoi kebeberwegap oriit.
Currently Selected:
KALEWANAIK 20: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
