KALEWANAIK 19
19
1Kaigai kibananiat ne wendote imanda,
kosiir ne imaasat eng' ng'aleekyik ak ko perber.
2Ma myee pekyinet ne ma tinyei naet,
ak yaei tengekto ineendet ne sartae pandanyi.
3Ng'emegei chiito eng' perberyennyi,
ak konereekyin `ine Kamuktaindet ne Toroor eng' muguleldanyi.
4Tesei choronok che chaang' `mogornateet;
ago itabaanegei kibananiat `chorwennyi.
5Ma kimetoi paoryatap lembech ama kibir;
ak ma chilili ineendet ne mwaei lembechek.
6Riirchin piik che chaang' myeeindap chiito ne tagunoot;
ak chii age tugul ko chorweetap ineendet ne igoitoi konunoik.
7Ngot ko wechei kibananiat `tupchosyekyik tugul,
koistoegei anyun ne tya choronokyik!
Nga isubi kogaigae icheek ng'aleek, koma nyooru.
8Chamei saboondanyi ne nyooru utaatyet,
nyooru myeeindo ineendet ne riibei kaguiyet.
9Ma kimetoi paoryatap lembech ama kibir;
ak lusei ineendet ne mwaei lembechek.
10Ngot koma nyooljin `ne perber tuguugap talbisto,
kotam nee anyun ngeele pou `otwogindet weeriigap laitoryat.
11Ma sartae nereegek chiito ne ng'oom,
ak egu toroornatennyi ye kasiirtoe pistoet.
12Uu nereegegap laitoryat porisenetap ng'etuny;
ago uu myeeindonyi rewoot ne mi susweek.
13Weeriit ne perber ko nyalil eng' kwandanyi;
ak polatetap osotyot ko uu peek che saitoi.
14Koot ak mogornatosyegap chii ko poroteet ne punu kwanisyek;
ago punu Kamuktaindet ne Toroor osotyot ne ng'oom.
15Igoochin chiito chorirnatet rwondo ne nyigiis,
ak amei rubeet chiito ne choriren.
16Riibei saboondanyi ne riibei ng'atuutik,
ago meei ne ma riibei ortinwekyik.
17Ineendet ne riiree kibananiat ko kabesendochi Kamuktaindet ne Toroor,
ak kiyaakyin ineendet kogeny eng' poisyennyi ne myee.
18Kergong' weeriing'ung' kota komi kamang'unet;
amat itil eng' muguleldang'ung' ile myee ngo mee.
19Nyooru pireet chiito ne tinyei nereeknateet ne oo;
amu ngot isaru ineendet, ko kanyooljin tuun isaru kogeny.
20Epchi iit katigonet ak itaach kaneetisyet,
si kobiit inyooru utaatyet eng' kagesuneng'ung'.
21Mi chobutik che chaang' muguleldap chiito;
ago tebyei katigonetap Kamuktaindet ne Toroor.
22Ki chamei chiito amu myeeindonyi;
ak kaigai kibananiat kosiir kiplembechwet.
23Kaiyweisyet ne kiywei Kamuktaindet ne Toroor ko saboondo iman;
ne nyitat kamung'etap yametapkei,
ma nyoonjin yaityet.
24Indoi eunnyi sanit chiito ne choriren,
agot kimnateet ne indoe kutinnyi koma tinye.
25Pir sasindet, si koneetkei ng'omnateet ne abusat;
ak iger kong' ineendet ne tinyei kaguiyet, si koguiyo naet.
26Ibu kalilanet ak teweernateet,
weeriit ne iseeri tuguugap kwandanyi ak koon kamennyi.
27Weeriinnyu, ngot ko me kas kaneetisyet,
kobeetenen ng'aleegap ng'omnateet.
28Chotei kirwooget paoryat ne ma tilei kiy;
ak lugui yaityet kutusweegap kiptengeginik.
29Kichopchin kirwoogutik chotiik,
ak kichopchin pataigap che perber pirutik.
Currently Selected:
KALEWANAIK 19: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
