KALEWANAIK 18
18
1Ineendet ne itabaanegei, kocheeng'ei magennyi ineegei,
ak konereekyin chiichooto ng'omnateet ne ititaat.
2Ma mage kiy ne perber kaguiyet,
ago paibaitune kabartaetap kabwaatutikyik kityo.
3Ye nyo kiptengekyot, konyo agine sasisyet,
ak pwoonei kora teweernateet ak chotisyet.
4Uu peegap keriing' ne loo ng'aleegap chii,
ibaibai ko uu peegap kereruut ne rootei utaatyet.
5Ma myee ketiytiy kiptengekyot,
anan kimaas ne po iman eng' kirwooget.
6Chutei kutitap ne perber ole mi tiyet,
ak kuurei kutinnyi pireet.
7Ng'emisyetap ne perber kutinnyi,
ak mesteetap saboondanyi kutinnyi.
8Uu tuguuk che anyiny ng'aleegap chaamindet,
ak pendi moet.
9Ineendet agine ne choriren eng' poisyennyi
ko tupcho ak ng'emindet.
10Irimet ne kiim kainetap Kamuktaindet ne Toroor;
mwechin ne po iman ak konyoor chametapkei.
11Mogornateetap mogoryot ko nganasennyi ne kiim,
ak uu irimeet ne kooi eng' kabwaatutikyik.
12Menei muguleldap chii kotom konyoor ng'emisyet,
ak indoe kaming'inetapkei teegisto.
13Ineendet ne wolu koma epchi iit,
ko perberyo ak teweernateet eng' ineendet.
14Igimiiti saboondap chiito nyalulnatennyi;
ago imuuchi ng'oo komuita eng' arageneet?
15Nyooru naet muguleldap ne utaat;
ak cheeng'ei naet `ititap ne ng'oom.
16Cheeng'jin konunet chiito poroindo,
ak komutyi ineendet taitap piik che eecheen.
17Ne sip kong'alaali, keleen po iman;
ago nyoonei chii age kochuulei ng'aleekyik.
18Iwong'u `kabeletapkei parbaryat,
ak ioitos che irwookyingei.
19Uui kosiir nganaseet ne kiim keeweech tupchet ne ki kinach,
ak uu tiiyasyek che uu chooto temeleiywegap nganaseet.
20Piyonyi moetap chii logoegap kutinnyi;
piyonyi ineendet iyoteetap kutinnyi.
21Miitei kimnateetap ng'elyepta, meet ak saboondo;
ak amei logoekyik icheek che chamei.
22Nyooru kiit ne myee age tugul ne nyooru osotyot ne ituni,
ak nyooru chameet eng' taitap Kamuktaindet ne Toroor.
23Poisyee kibananiat kagaigaosyek;
ago wolu mogoryot kong'emei.
24Cheeng'jingei ng'emisyet ineendet ne cheeng'ei choronok che chaang',
ago mi chorweet ne namegei ak chii kosiir ng'eetap kamet.
Currently Selected:
KALEWANAIK 18: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
