MATAYO 7
7
Kirwoogyin piik alak
(Luk 6:37-38, 41-42)
1Amorwooch, si ma kirwookwok. 2#Mar 4.24 Amu kirwooget ne orwoochi ko tuun kirwoogunenok nooto, ak eng' kerutyet ne ogere, ko tuun kigerunenok nooto. 3Kalya si igeer petbetyat ne mi kondap ne otupche, ago ma ibwaat pambaniat ne mi kondang'ung' inyeendet? 4Anan imwachindoi ano ne otupche ileenjini, “Inganemun petbetyat eng' kondang'ung',” ye mi `pambaniat kondang'ung' inyeendet? 5Chombilindoni, icheru korook pambaniat eng' kondang'ung', si igeer anyun komyee inemu petbetyat eng' kondap ne otupche.
6Amogoochi sesenik kiit ne itabaanat, anan owiirchi toorook sonoegap kamanuut si ma tyech eng' keelyekwak, ak koweekyogei okweek kogereerak.
Osoom, ocheeng', ogonykony.
(Luk 11:9-13)
7Osoom si kegoonok; ocheeng' si onyooru; ogonygony si keyatwok. 8Amu age tugul ne soomei kigoochin; ak ne cheeng'ei konyooru; ak ineendet ne igonygonyi keyatyin. 9Tos ng'oo eng' okweek ne ngo soom weeriinnyi magatyat, kogoochi koita? 10Anan ngo soom njiryot, kogoochi ereneet? 11Ngot ongen okweek anyun nga oo yaach ogoochi lagokwok kagoochinoik che myach, ko tos yaei myeein ne tya Kwandang'wong' ne mi kipsengwet. Tos ma igoochin che soomei ineendet tuguuk che myach?
12 # Luk 6.31 Nooto anyun, tuguuk tugul che omache koyaiywok piik, ko kanyool oyachi ak icheek ko uu nooto: amu chuuto ng'atuutigap Musa ak kaneetisyosyegap maotik.
Kurgeet ne mariich
(Luk 13:24)
13Obun okweek kurgeet ne mariich; amu kurgeet ne paraa ak ooreet ne tebees ko wendi ng'emisyet, ak chaang' che punei nooto kot koit olooto. 14Mariich kurgeet ak ko pichiy ooreet ne wendi saboon ak ng'ering' che nyooru.
Ki naen keetit logoekyik
(Luk 6:43-44)
15Oriibegei maotik che po lembech, che pwonjinok eng' ngoroik che po keechiirek nga suik che amei piich. 16Onae icheek logoekwak. Tos kesei piik sabibuk eng' katook, anan logoegap mogoonik eng' katook che rutei piich? 17Uu nooto keetit age tugul ne myee, yiei logoek che myach; ago keetit ne ya, koyiei logoek che yaach. 18Ma imuuchi keetit ne myee kooi logoek che yaach, amaimuuchi keetit ne ya kooi logoek che myach. 19#Mat 3.10; Luk 3.9 Keetit age tugul ne mayiei logoek che myach keebei ak kewiirchi ma. 20#Mat 12.33 Nooto anyun onae icheek logoekwak.
Ma ngenook okweek
(Luk 13:25-27)
21Ma age tugul ne leenjino “Kiptaiyat, Kiptaiyat,” ne itei pounatetap kipsengwet, ago ineendet ne yaei mageetap Abba ne mi kipsengwet. 22Leenjino che chaang' peetuunooto, “Kiptaiyat, Kiptaiyat, tos ki ma kiyai maonateet eng' kaineng'ung', ak keon oik eng' kaineng'ung', ak keyai eng' kaineng'ung' poisyonik che chaang' che po kimnateet?” 23#T.Kal 6.9 Ak amwachi anyun icheek eng' yooto kotook aleenji, “Mangenok kobooch agoi; oistoenage okweek che oyae yaityo.”
Kalewenet agobo tegiik aeng'
(Luk 6:47-49)
24Nooto anyun age tugul ne kasei ng'aleechuchuk ak koyai, kiyanie chiito ne utaat ne ki teech koonnyi rwandet parak: 25ak ki roobon, ak ki pwa mogoochek, ak kius usoonaik, ak koryep koyooto; ama iluul, amu ki kiteech rwandet parak.
26“Ak age tugul ne kasei ng'aleechuchuk, ama yaei, kiyanie chiito ne perber, ne ki teech koonnyi ng'aniek: 27ak ki roobon, ak ki pwa mogoochek, ak kius usoonaik, ak koryep koyooto; ak kiluul: ak kieet luulennyi.”
Kaneetisyetap Jeso
28 # Mar 1.22; Luk 4.32 Ak ye kingo kes Jeso ng'aleechu, kokwong'yo tuiyosyek amu kaneetisyennyi: 29amu ki ineet ko uu ne tinyei kimnateet, ama uu siriikwak.
Currently Selected:
MATAYO 7: KAPR
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019