MATAYO 8
8
Kisoobi chiito ne tinyei mogondosaik
(Mar 1:40-45; Luk 5:12-16)
1Ye kingo choorgei eng' tulweet, koosup ineendet tuiyosyek che eecheen. 2Ak ogeero, ki nyoonji chii ne ki tinyei mogondosaik ak kogutung'ji ak koleenji, “Kiptaiyat, ngot icham, imuuchi itiliilo.” 3Ki iito eunnyi ak kotwekyi ineendet koleenji, “Kaacham, tiliiliitu.” Ak kisop chiichooto sainooto eng' mogondosaik. 4#A.La 14.1-32 Ak ki mwachi Jeso koleenji, “Riipkei, memwachi chii, ago ui iboorchigei tisiindet, ak igoite kagoochinet ne ki ng'at Musa, si koek paornateet eng' icheek.”
Kosoobi `Jeso chii ne ki meat poor
(Mar 1:40-45; Luk 5:12-16)
5Ak ye kingo kagomong'ji Kapernaum, konyonji chemogetap kiplugotinik pogol kogaigai, 6kole, “Kiptaiyat, myani otwogindennyu eng' kaa, kasaat miising', meat poorto.”
7Ak ki leenji, “Anyo si asoop ineendet.” 8Ak ki wolji chemogonooto po kiplugotinik pogol kole, “Kiptaiyat, ma nyoljino inyoo koonnyu; ago mwaa ng'olyoot kityo, si kosap otwogindennyu. 9Amu aa chii agane ne kiboiywa, ak atinye kiplugotinik che abou; ak ngamwachi ni aleenji, ‘Ui!’ kowendi; ak ngamwachi age aleenji, ‘Nyoo!’ konyonei; ak ngamwachi otwogindennyu aleenji, ‘Yai ni!’ koyaei.”
10Ye kingo kas Jeso, kokwong' ak koleenji icheek che ki isubi, “Amwaiwok iman ale, tomo anyooru kayaneet ne tee ni agot eng' Israel. 11#Luk 13.29 Amwaiwok ale tuun pwoonei che chaang' kobun kong'asiis ak cherongo, kobwa kotebi ak Abraham ak Isak ak Jakobo eng' pounatetap kipsengwet, 12#Mat 22.13; 25.30; Luk 13.28 ye tuun kitoorchin weeriik che po laitornatetap mesundeito ne po saang', ole mi riirek ak nyeetap kelek.” 13Ki leenji anyun Jeso chemogonooto po kiplugotinik pogol, “Ui oldang'ung', ingeyaun ko uu ye kaiyan.” Ak kisop eng' sainooto otwogindennyi.
Kosoobi `Jeso piik che chaang'
(Mar 1:29-34; Luk 4:38-41)
14Ak ye kingo kakwo Jeso kootap Petero, kogeer kametap osotyotap Petero koruei koamei eseet. 15Ak kitwa eunnyi, ak kobagaakta eseet ineendet; ak king'eet koboisyechi. 16Ak ye ki machei koimen, komutyi icheek che chaang' che tinyei oik: ak ki oon oik eng' ng'olyoot, ak kosoop tugul che ki myandos: 17#Isa 53.4 si kobiit kosulda ne ki kamwa maotyot Isaiah, kole, “Ki nam ineendet nyalulnatennyo ak koip myanwekyok.”
Kasubigap Jeso
(Luk 9:57-62)
18Ak kingo keer Jeso tuiyosyek che eecheen koga yiem ineendet, kong'at kolanda pitoniin. 19Ak ki nyo siriindet age, ak koleenji, “Kaneetindoni, asubin eng' ui tugul ole iwendi.” 20Ak ki leenji Jeso, Tinyei lelwek keriingonik, ak tinyei toriitik che po parak kesonok; ago ma tinyei Weeriitap chii ole indoi metinnyi.
21Ki mwachi agenge eng' kasubikyik koleenji, “Kiptaiyat, chamwo korook awo atup abba.” 22Ago ki leenji Jeso, Isubwo, pagakte piik che ki kobek kotup chechwaak che ki kobek.
Kogerei kong' `Jeso usoonet
(Mar 4:35-41; Luk 8:22-25)
23Ak kingo kagolaany moingetap peek, koosup ineendet `kasubikyik. 24Ak ogeero, king'eet usoonet ne oo eng' araraita, kot komaaluuch mildaetapkei ne po peek moinget: ago ki inuuchi ineendet. 25Ki pwa anyun kong'eet ineendet, koleenji, “Kiptaiyat, sarwech! Kagibegu!” 26Ak ki leenji, “Kalya si oiywei, okweek che otinye kayaneet ne ming'in?” Ki ng'eet anyun koger kong' usoonet eng' araraita; ak ki imung'do anyun kalunguletapkei. 27Ago ki kwong'yo piik, kole, “Chii nee chiichi, amu kase iit ineendet agot usoonaik ak araraita?”
Kosoobi Jeso piik aeng' tinyei oik
(Mar 5:1-20; Luk 8:26-39)
28Ak ye kingo kagoit pitoniin emetap Gadarenes, kotuiyo ak ineendet piik aeng' che ki tinyei oik, kobunu ye mi kereeriisyek; ki koroomen miising', kot ko ki ma komuuchi chii kosiir oranooto. 29Ak ogeero, kiwaach, kole, “Kiting'egei nee ak inyee, Weeriitap Kamuktaindet? Kenyo yu inyalilech kotom koit peetuut?”
30Ak ki agete ole ki ma ko neegitee icheek akweet ne po toorook che chaang'. 31Ak ki soom ineendet oik, kole, “Ngioonech kemande, iyooktech kechut akweet ne po toorook.” 32Ak ki leenji icheek, “Oba!” Ak kimanda koba kochut toorook: ak ogeero, ki rwai miising' akweet komugul kochoortaegei chemng'eisut koba araraita, ak kobekyi peek. 33Ak ki mwei che ki iyagi tooroochooto koba nganaseet ak komwaita kiy age tugul, ak kiit ne kiga keyachi che ki tinyei oik. 34Ak ogeero, ki mong' saang' nganaseet komugul kotuiyo ak Jeso: ak kingo keer ineendet, kosoom mat komanda eng' nganaseennywa.
Currently Selected:
MATAYO 8: KAPR
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019