JEREMIAH 23
23
Temet ne po iman
1Pwo eng' mestoweek che ng'emei ak koyestoi keechiiregap akweennyu! Mwaei Kamuktaindet ne Toroor. 2Mwaei anyun Kamuktaindet ne Toroor, Kamuktaindetap Israel, ko uu ni, agobo mestoweek che paei piikyuk, kole, ki oiyeste akweennyu, ak oon, ama obe ogeer; ogeero, aitwok pireet ne po yaityetap poisyonikwok, mwaei Kamuktaindet ne Toroor. 3Ak ayum che ki ng'et che po akweennyu komong' eng' emotinwek tugul ole kigaonji, ak amutu kogeny kobwa piusyekwak; ak koiiyo kotesagis. 4Ak ande mestoweek che iyagi: ama koiyweisyei kogeny, anan koaragenso, ama piitu chii ne rarchin kiy, mwaei Kamuktaindet ne Toroor.
5 # Jer 33.14-16 Ogeero, pwoonei peetuusyek, mwaei Kamuktaindet ne Toroor, che ang'eetyini Daudi Temet ne po iman, ak kolaitoran ko laitoryat, ak kobois eng' ng'omnateet, ak koyai kirwooget ak imanda eng' emet. 6Kisaru Judah eng' peetuusyekyik, ak komeng'iis Israel eng' chametapkei: ak ni kainennyi ne kemwaitoe, Kamuktaindet ne Toroor ko imandanyo.
7Nooto anyun, ogeero, pwoonei peetuusyek, mwaei Kamuktaindet ne Toroor, ye ma komwaei icheek kole, ko uu ye sabei Kamuktaindet ne Toroor, ne ki imut piigap Israel komong' eng' emetap Misiri. 8Ago, mwaei kole, ko uu ye sabei Kamuktaindet ne Toroor, ne ki imut iyoteetap kootap Israel komong' eng' emet ne po murot kaataam, ak eng' emotinwek tugul ole kigaonji icheek, ak komeny emennywa.
Maotik che ma po iman
9Kagomea mugulel agobo maotik, irigisistos kawekyuk; auu chii ne kabogit, ak auu chii ne kagoterteer divaik; amu Kamuktaindet ne Toroor, ak amu ng'aleekyik che tiliileen. 10Amu nyiitaat emet piik che yaei ibeetapkei; amu riirei emet amu kayasyoet; ki koyaam ole agete akwotisyek eng' surkwen; ya pandanywa, ak ma po iman kimnateennywa. 11Amu murwoon maotyot ak tisiindet; ee, ki anyoorchi koonnyu yaityennywa, mwaei Kamuktaindet ne Toroor. 12Egu anyun ooreenywa komoswek che chaboen eng' mesundeito: ki oonei kot kobutyo: amu aipchini yaityet, eng' kenyiit ne aityini pirennywa, mwaei Kamuktaindet ne Toroor. 13Ak ki ageer perberyo eng' maotigap Samaria; ki maotene Baal, ak kogoochi piikyuk Israel kolel. 14#Tau 18.20; Ezk 16.49 Ki ageerchi maotigap Jerusalem ak icheek kiit ne samis miising'; yaei ibeetapkei, ak kobendote lembechek, ak kogimit eunegap yaigap yaityet, kot koma mi chii ne weeksei eng' yaityennyi: kaigei icheek tugul Sodom eng' anee, ak kaigei che menyei yooto, Gomorah.
15Mwaei anyun Kamuktaindet ne Toroor ne po lugoosyek agobo maotik kole: Ogeero, abae icheek ng'wonet, ak agoochi peek koe: amu ki koyom emet tugul murwoonindap maotigap Jerusalem.
16Mwaei Kamuktaindet ne Toroor ne po lugoosyek kole, amoepchi iit ng'aleegap maotik che maotenwok; ineetook tangoita: mwaei ng'ang'utyet ne punu mugulelwekwak, ama ne mang'une kutitap Kamuktaindet ne Toroor. 17Mwachin icheek kotugul piik che sasa, koleenjin, Kamwa Kamuktaindet ne Toroor kole, onyooru kaalyeet; ak komwachi chii age tugul ne wendote uuindap muguleldanyi, koleenjin, Manyonjinin yaityet age tugul. 18Amu ng'oo ne ki kotonon eng' kapkirwoogetap Kamuktaindet ne Toroor, kot komuuch koguiyo ak kogas ng'olyoondennyi? Ng'oo ne ki epchi iit ng'olyoondennyu, ak kogas? 19Ogeero, kagomong' kipchurchuryetap Kamuktaindet ne Toroor, nooto nereegekyik che koroomen, ee, kipchurchuryet ne usei kot: kwerei metowegap kiptengeginik. 20Ma weeksei nereegegap Kamuktaindet ne Toroor, agoi koyai kogees, agoi koyai magutigap muguleldanyi kosulda: oguitosi ng'olyoondoniito komyee eng' peetuusyek che po let. 21Ki ma ayookte maotichuuto, ago ki rwai: ki ma ang'alaalji, ago ki maotenso. 22Ago nda kiga tononso eng' kapkirwoogennyu, ta ki igoochin piikyuk kogas ng'aleekyuk, ak ta kiweechi pichooto koweek eng' ooreenywa ne ya, ak eng' yaityetap poisyonikwak.
23Tos aa Kamuktaindet ne Toroor ne mi ye neegit kityo, mwaei Kamuktaindet ne Toroor, ak ma aa Kamuktaindet ne Toroor ne mi ole loo? 24Tos imuuchi chii kounygei eng' komoswek che ung'ootiin, kot koma keer ineendet? Mwaei Kamuktaindet ne Toroor. Tos ma anyii kipsengwet ak ng'wony? Mwaei Kamuktaindet ne Toroor. 25Ki agas kiit ne ki mwa maotik, che maoteni lembechek eng' kainennyu kole, koarwotyi, koarwotyi. 26Tebee kot kotyanit niito mugulelwegap maotik che maoteni lembechek, maotigap kaberberisyetap mugulelwekwak, 27che leen kogoochi piikyuk koutye kainennyu eng' karwotitaosyekwak che mwachin chii tugul chiitap kokwennyi, ko uu ye kiutye kwanisyekwak kainennyu amu Baal? 28Ingomwa maotyot karwotitoet ne koirwotyi; ak ineendet ne tinyei ng'olyoondennyu komwa eng' imanda. Ting'egei nee meteteek ak nganuuk? Mwaei Kamuktaindet ne Toroor. 29Tos ma uu ng'olyoondennyu maat? Mwaei Kamuktaindet ne Toroor; ak ma uu kiriswet ne tonei rwandet? 30Nooto anyun, mwaei Kamuktaindet ne Toroor kole, ogeero, agirindoi maotik, che kichor chii age tugul ng'aleekyuk kochore chiitap kokwennyi. 31Mwaei Kamuktaindet ne Toroor kole, ogeero, agirindoi maotik, che poisyee ng'elyebwekwak, koleen, Kole ineendet. 32Mwaei Kamuktaindet ne Toroor kole, ogeero, agirindoi icheek che maoteni karwotitaosyegap lembech, komwaita, ak kogoochi piikyuk kolel amu lembechekwak, ak eng' kachaunennywa pogei ne po puch: ago ma ayookte, anan ang'at icheek; ama toreti pichu agot kitigin, mwaei Kamuktaindet ne Toroor.
Maotik che po lembech
33Ye teebenen pichu, anan ko maotyot, anan ko tisiindet, koleenjin, “Nee mileetap Kamuktaindet ne Toroor?” Imwachi anyun ileenji, “Okweek mileet! Atimdok,” mwaei Kamuktaindet ne Toroor. 34Ak abire maotyot, ak tisiindet, ak piik, che mwaei kole, “Mileetap Kamuktaindet ne Toroor,” abire chiichooto ak koonnyi. 35Omwachi anyun okweek, chii age tugul chiitap kokwennyi, ak komwachi chii age tugul ng'eetap kamet, koleenji, kawol nee Kamuktaindet ne Toroor? Ak kamwa nee Kamuktaindet ne Toroor? 36Ama omwae mileetap Kamuktaindet ne Toroor kogeny: amu egu ng'olyootap chii age tugul lautyennyi; amu ki omaas ng'aleegap Kamuktaindet ne Toroor ne sabei, che po Kamuktaindet ne Toroor ne po lugoosyek, Kamuktaindennyo. 37Mwachi maotyot ko uu ni ileenji, “Tos kawolun nee Kamuktaindet ne Toroor? Ak kamwa nee Kamuktaindet ne Toroor?” 38Ago ngot omwa ole, “Nyigiisindap Kamuktaindet ne Toroor;” mwaei anyun Kamuktaindet ne Toroor ko uu niito kole: “Amu omwae ng'olyoondoni,” ole, mileetap Kamuktaindet ne Toroor, ak ki ayoogu kemwaiwok keele, Amat ole, Mileetap Kamuktaindet ne Toroor; 39nooto anyun, ogeero, autyenok agoi, ak atimdok, kobooto nganaseet ne ki agoonok ak kwanisyekwok, obe eng' tainnyu: 40ak aibwok chotisyet ne po agoi, ak kalilanet ne po kotugul, ne ma kiutye.
Currently Selected:
JEREMIAH 23: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
