JEREMIAH 22

Maonateet agobo laitorinigap Judah

1Kamwa Kamuktaindet ne Toroor kole: Choorchigei kootap laitoryatap Judah, ak imwa eng' olooto ng'olyoondoni, 2ile, Kas ng'olyootap Kamuktaindet ne Toroor, ee laitoryatap Judah, ne itebee ng'echereetap laitornatet ne po Daudi, inyee, ak otwogiguk, ak piiguk che pendi oriit kobunei ormariichochu. 3Mwaei Kamuktaindet ne Toroor kole: Oyai okweek kirwooget ak imanda, ak osaru ne ki kiluul komong' eng' eutap usiindet: amat oyai ne ya, anan koroomnateet, oyachi toondet, anan ne ma tinyei sigiik, anan mosoget, amotumde korotiik che ma tinyei tengek, eng' olito. 4Amu ngot oyai iman kiito, kobendi oriit anyun kobunei ormariichogap kooi, laitorinik che tebee ng'echereetap laitornatet ne po Daudi, kolaanyei kariisyek, ak paraisisyek, ineendet ak otwogikyik, ak piikyik. 5#Mat 23.38; Luk 13.35 Ago ngot ko mogas iit ng'aleechuuto, ayosyechinigei anyun, mwaei Kamuktaindet ne Toroor, ale, egu kooi karaatya.

6Amu mwaei ko uu ni Kamuktaindet ne Toroor agobo kootap laitoryat ne po Judah kole, ii Gilead eng' anee, ak ko ii metitap Lebanon; ago ayain iman iegu surkwen, ak nganasook che ma ki menyei. 7Ak achop ng'emiik agobo inyee, chii tugul ak kariikyik: ak koluul icheek taragoniguk che korooron ak kowiirchi ma.

8Ak kosiirtoe pororyosyek che chaang' nganasani, ak koleenji chii age tugul chiitap kokwennyi, Amu nee si koyachi Kamuktaindet ne Toroor ko uu ni nganasani oo? 9Kowol anyun kole, amu kimeto kayomisetap Kamuktaindet ne Toroor Kamuktaindennywa, ak kolas kanamonik che teer, ak koot. 10Amoriirchi ne ki kome, anan ote agobo ineendet: ago orir miising' agobo ineendet ne mandoi; amu ma koweeksei ineendet kogeny, anan kogeer emennyi ne ki kisikyin.

11 # 2Lai 23.31-34; 2A.Pet 36.1-4 Amu kamwa Kamuktaindet ne Toroor agobo Shallum weeriitap Josiah laitoryatap Judah, ne ki laitoran kogeer Josiah kwandanyi, ne kimanda eng' olito, kole ma koweeksei kogeny; 12ago mechin ole ki kiluulji, ak ma kogeerei emoni agoi. 13Pwo eng' ineendet ne teechei koonnyi koma eng' imanda, ne teechei kooriikyik che po oriit eng' sastaet; ne poisyee chiitap kokwennyi ama igoochin melekto, ama igoochin kiit ne yamegei ak poisyennyi; 14ne mwaei kole, ateekyinige koot ne oo ak kooriik che paroen che po oriit, ak kondechigei tirisyok; ak ki kitetee taragonik, ak kesalee saleiywek che piriireen. 15Tos ilaitoran, amu igiiligei ibelisye eng' taragonik? Tos ki ma amis kwandang'ung' ak koeeiso, ak koyai kirwooget ak iman? Kimyeeit anyun eng' ineendet. 16Ki irwooksechi ne panan ak ne ma tinyei kiy; ki myeiit anyun. Tos ki ma konaena niito? Mwaei Kamuktaindet ne Toroor. 17Ago matokyingei konyeguk ak muguleldang'ung' kiy age kobatee tuguugap ng'wen, ak tumdaetap korotiik che ma tinyei tengek, ak sastaet, ak koroomnateet, koyai chooto.

18 # 2Lai 23.36-24.6; 2A.Pet 36.5-7 Mwaei anyun Kamuktaindet ne Toroor agobo Jehoiakim weeriitap Josiah, laitoryatap Judah, kole: Ma iteei chii agobo ineendet kole, pwo eng' weeriit ne kitupche anan pwo eng' chepto ne kitupche! Ma iteei chii agobo ineendet kole, “Pwo Kiptaiyat anan pwo eng' etunatennyi!” 19Kitubei ko uu ye kitubei sigiryet, kichuuti ak kewiirta kosiir ormariichogap Jerusalem. 20Togoste Lebanon, ak iriir; ak iwaach eng' Bashan: ak iriir eng' Abarim; amu kagobar chamaniguk tugul. 21Ki ang'alaalun eng' peetuusyegap poroteng'ung'; ago ki imwa ile, “Ma kase.” Ki koek piteeng'ung' niito kobooch ming'inateng'ung', ile, megase iit kutinnyu. 22Paei usoonet mestoweguk tugul, ak keluul chamaniguk: ililan iman anyun ak itoptoben agobo yaityeng'ung' tugul. 23Ee inyee ne imenye Lebanon, ne iteeche kesweng'ung' eng' taragonik, iegu chii ne kiriirchin miising' ye kabwonjin ng'waninwek, ng'wanindo ne uu ne po kwondo ne machei kosigiis!

24 # 2Lai 24.8-15; 2A.Pet 36.9-10 Ko uu ye asabe, mwaei Kamuktaindet ne Toroor, agot nganda ko waet ne po ng'ookset eng' eunnyu ne po tai Konia weeriitap Jehoiakim laitoryatap Judah, ang'usin ui tugul eng' olooto; 25ak andein eunegap icheeget che cheeng'ei saboondang'ung', ak eunegap icheek che iywei, eutap Nebukadresar laitoryatap Babilon, ak eutap Kaldeik. 26Ak atimden imande, kobooto kamenng'ung' ne kisichin, obe emet age, ne ki ma kesikyinok; ak obekyi olooto. 27Ago ma weekyingei emet ne machei saboonwekwak. 28Tos chiichito Konia ne tereet ne kisasei ne ki koyie? Tos ineendet ko tereet ne ma kiboiboitune? Amu nee anyun si ketimda icheeget, ineendet ak iyotennyi, ak king'eetoochi emet ne ma ingen? 29Ee emoni, emoni, emoni, kas ng'olyootap Kamuktaindet ne Toroor. 30Mwaei Kamuktaindet ne Toroor kole, osir chiichi ole ma tinyei lakwa, chiito ne maborei eng' peetuusyekyik: amu maborei chii ne po iyotennyi, ne tebee ng'echereetap laitornatet ne po Daudi, ak koboi kogeny eng' Judah.

Currently Selected:

JEREMIAH 22: KAPR

Highlight

Copy

Compare