JEREMIAH 21
21
Keesyechin Zedekiah soomennyi
1Ki nyoonji Jeremiah `ng'olyoot ne ki punu Kamuktaindet ne Toroor, ye ki iyooktoi ineendet Laitoryat Zedekiah kwo kap Pasur weeriitap Malkija, ak Sepania weeriitap Maaseia tisiindet, koleenji, 2#2Lai 25.1-11; 2A.Pet 36.17-21 asoomin ale, teebwech eng' Kamuktaindet ne Toroor; amu ibookyinech Nebukadresar laitoryatap Babilon: tamangap koyaiywech Kamuktaindet ne Toroor ko uu poisyonikyik tugul che kikwong'ee, si kobiit kwo koistoeneigei.
3Ki mwachi anyun Jeremiah koleenji, omwachi Zedekiah ko uu ni oleenji: 4Mwaei Kamuktaindet ne Toroor, Kamuktaindetap Israel, kole, ogeero, aweektoi kariigap lugeet che miitei eunekwok, che obaregei ak laitoryatap Babilon, ak Kaldeik che yiemok, eng' saang'utap irimoik, ak ayumji icheek kwenutap nganasani. 5Ak kebaregei ak okweek eng' euut ne chuulaat, euut ne kiim, eng' nereegek, ak eng' nereegek che ng'woneen, ak eng' nereegek che eecheen. 6Ak abir piik che menyei nganasani, chii ak tyony: pegu eng' koroito ne oo. 7Ak ye ibata, mwaei Kamuktaindet ne Toroor, asaru Zedekiah laitoryatap Judah, ak otwogikyik, ak piik, piik che ng'etu eng' nganasaniito, asaru eng' koroito, ak eng' rotwetap chok, ak eng' rubeet, agoite koba eutap Nebukadresar laitoryatap Babilon, ak koba eunegap puunikwak, ak eunegap icheeget che cheeng'ei saboonwekwak: ak kobar icheek eng' rotwetap chok; ma pagaaktoi, ama riiree, ama rireegei.
8Ak ileenji pichu, Mwaei Kamuktaindet ne Toroor kole: Ogeero, kande taing'wong' ooreetap saboondo ak ooreetap meet. 9Ineendet ne tebee nganasani, kebarei eng' rotwetap chok ak eng' rubeet, ak eng' koroito: ago sabei ineendet ne mandoi, ak komut ineendet Kaldeik che yiemok, ak koek sabeennyi ne kiluulei. 10Amu kaatokyi togeennyu nganasani aipchi yaityet, ma agobo myeeindo, mwaei Kamuktaindet ne Toroor; kindoi eutap laitoryatap Babilon si kobeel.
11Ak okweek kootap laitoryatap Judah, ogas ng'olyootap Kamuktaindet ne Toroor. 12Ee kootap Daudi, mwaei Kamuktaindet ne Toroor kole, oyai kirwooget karon, osaru ne ki kiluul komong' eng' eutap usiindet, si ma mong' nereegekyuk che koroomen ko uu maat, ak kolal kot koma mi ne imuuchi komis, amu yaityetap poisyonikwok. 13Keero, aboryenen, ee inyee ne imenye atebweet, ak ne menyei rwandet ne po warenget, mwaei Kamuktaindet ne Toroor; okweek che omwae ole, Ng'oo ne choorugei kebarge? Anan ng'oo ne nyoonei ole ki menye? 14Ak abirok ko uu logoegap poisyonikwok, mwaei Kamuktaindet ne Toroor: ak anaam maat eng' osnennyi, ak kobeel tugul che miitei komoswekyik.
Currently Selected:
JEREMIAH 21: KAPR
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
